မဲခေါင်၊ နိုဝင်ဘာ ၇
ထိုင်းနိုင်ငံ၏ နာမည်ကြီး ဒုရဲချုပ်ဟောင်း ဆူရာချိတ်ဟက်ခ်ပန်းကိုယ်တိုင် ထိုင်းအောက်လွှတ်တော် နိုင်ငံတော်လုံခြုံရေးကော်မတီထံသို့ မိမိတို့ ရဲတပ်ဖွဲ့ အရာရှိကြီးများ အယောက် ၃၀ ကျော်သည် တရားမဝင်အွန်လိုင်းလောင်းကစားကွန်ရက်များဆီမှ လာဘ်စားခဲ့ကြောင်း သက်သေအထောက်အထားများကို နိုဝင်ဘာ ၆ ရက်တွင် တင်သွင်းသွားခဲ့သည်။
ထိုင်းပြည်သူ့ပါတီ ခေါင်းဆောင်တစ်ဦးဖြစ်ပြီး နိုင်ငံတော်လုံခြုံရေး၊ နယ်စေပ်ရေးရာ၊ အမျိုးသား မဟာဗျူဟာနှင့် ပြန်လည်ပြင်ဆင်ဖွဲ့စည်းရေး အောက်လွှတ်တော်ကော်မတီ ဥက္ကဌ ရန်ဆီမန်ရုမ်း ထံသို့ ဟက်ခ်ပန်းက ယင်းလာဘ်စားခဲ့သည့် ရဲအရာရှိများ စာရင်းနှင့် သက်သေများကို တင်ပြပေးအပ်ခဲ့ခြင်းဖြစ်ကာ ရာထူးမှ ဖြုတ်ခံလိုက်ရသူဖြစ်သော်လည်း ပြည်သူတစ်ယောက်အခွင့်အရေးဖြင့် ယခုလို တင်ပြခြင်းဖြစ်ကြောင်း ရှင်းလင်းပြောကြားခဲ့သည်။
၎င်းတင်ပြသည့် သက်သေများတွင် လောင်းကစားဝက်ဘ်ဆိုက်များမှ ထိုင်းရဲတပ်ဖွဲ့ အရာရှိများ၏ ဘဏ်စာရင်းများထဲသို့ လာဘ်ထိုးငွေများစွာပေးပြီး နှုတ်ပိတ်စေခဲ့သည့် သက်သေများပါဝင်သည်။
၂၀၂၄ ခုနှစ် ဩဂုတ် ၂၄ ရက်ကတည်းက ယခုစာရင်းနှင့်သက်သေများကို ရဲချုပ် ကီထရတ်ဖန်ဖတ်ထံ တင်ပြခဲ့သေးသော်လည်း အရေးယူမှုမရှိသည့်အပြင် မိမိကိုယ်ပင် အလုပ်မှ ထုတ်ပယ်ခဲ့သည့်အတွက် လွှတ်တော်သို့ ယခုလို သက်သေများပေးပို့ရန် ဆုံးဖြတ်ခဲ့သည်ဟု ဟက်ခ်ပန်းက ဆိုသည်။
လာဘ်စားသည့် ရဲအရာရှိများထဲတွင် အွန်လိုင်းလောင်းကစားတိုက်ဖျက်ရေး အထူးရဲတပ်ဖွဲ့မှ အရာရှိ ကြီးများပင် ပါဝင်နေကာ ကနဦး T ဟုသာ အမည်တပ်ထားသော ရဲချုပ်တစ်ဦးဆီသို့ ဇနီးများ၊ ညီအစ်ကိုမောင်နှမများ ဘဏ်စာရင်းထဲသို့ လာဘ်ထိုးငွေများစွာ လွှဲပေးခဲ့သည့် သက်သေပါ ပါဝင်သည် ဟု ဟက်ခ်ပန်းက ဖောက်သည်ချခဲ့သည်။
ဟက်ခ်ပန်းသည် ရာဇဝတ်မှုဆိုင်ရာ အကြီးမားဆုံး အဖွဲ့အစည်းမှာ ရဲအဖွဲ့အစည်းသာဖြစ်သည်ဟု မိမိပြောဆိုခဲ့သည်မှာ မှန်သော်လည်း ရဲချုပ်ကီထရတ်က မိမိနှင့်ရဲတပ်ဖွဲ့မိသားဝင်များအားလုံးကို ရန်တိုက်ပေးပြီး ဆန့်ကျင်ရန် လှုံ့ဆော်ခဲ့ခြင်းသာဖြစ်ကြောင်း၊ မိမိဆိုလိုသည့်အစစ်အမှန်မှာ အင်အား ၂၀၀၀၀၀ ရှိသော ထိုင်းရဲမိသားစုကြီးတစ်ခုလုံးကို မဆိုလိုဘဲ ဒုစရိုက်မှ လာဘ်ငွေများစွာရယူနေသော ရဲအနည်းစုကို ဆိုလိုခြင်းသာဖြစ်သည်ဟုပါ ဖွင့်ဟပြောဆိုသွားခဲ့သည်။
ကိုကလင်း
Ref: The Nation
#MeKongNews
#ထိုင်းနိုင်ငံ
#အွန်လိုင်းလောင်းကစား
#ရဲတပ်ဖွဲ့
#လာဘ်စား
