မဲခေါင်၊ နိုဝင်ဘာ ၄
စစ်ကောင်စီနှင့် မဟာမိတ်ဖြစ်ခဲ့သော်လည်း တရုတ်သို့ လွှဲပြောင်းခံရသည့် ကိုးကန့်ကျားဖြန့်ခေါင်းဆောင် ပယ်ဆောက်ချိန်နှင့် ၎င်း၏ သားဖြစ်သူ ပယ်ရင်ချိန်အပါအဝင် ၅ ဦးကို တရုတ်နိုင်ငံတောင်ပိုင်း၊ ကွမ်တုံပြည်နယ်၊ ရှန်ကျင်းပြည်သူ့တရားရုံးက နိုဝင်ဘာ ၄ ရက်နေ့တွင် သေဒဏ်ပေးခဲ့ ကြောင်း သိရသည်။
တရုတ်အစိုးရပိုင် ဆင်ဟွာသတင်းတွင် ဖော်ပြမှုများ၌ မည်သူများကို သေဒဏ်ပေးလိုက်သည်အား မဖော်ပြဘဲ မြန်မာပြည်မြောက်ပိုင်း၌ ကျားဖြန့်၊ လူသတ်၊ မူးယစ်မှောင်ခိုမှုများလုပ်ခဲ့သူများကို သေဒဏ်ပေးခြင်းဟုသာ ရေးသားထားသည်။
၁၀၂၇ စစ်ဆင်ရေးကာလတွင် တရုတ်အာဏာပိုင်များသည် ကိုးကန့်ဒေသ ကျားဖြန့်၊ မှောင်ခိုရာဇဝတ် ကွန်ရက်များသို့ လာရောက်ကာ သက်သေပေါင်း ထောင်ချီထံမှ စစ်ဆေးမေးမြန်းမှုများပြုလုပ်ခဲ့ပြီး ၂၀၂၃ ခုနှစ် ဒီဇင်ဘာလတွင် ကိုးကန့်အုပ်ချုပ်ခွင့်ရဒေသ ဥက္ကဌ ပယ်ဆောက်ချိန်နှင့်မိသားစုဝင်များကို မြန်မာစစ်ကောင်စီက ဖမ်းဆီးပြီး တရုတ်ထံ အပ်နှံခဲ့ခြင်းဖြစ်သည်။
ပြီးခဲ့သည့်လပိုင်းက ကိုးကန့်ကျားဖြန့်နှင့် ရာဇဝတ်ကွန်ရက်နှင့်ပတ်သက်ပြီး ခေါင်းဆောင်ဖြစ်သော မြီ မိသားစုဝင်များထဲမှ တချို့ကို သေဒဏ်နှင့် တစ်သက်တစ်ကျွန်းပြစ်ဒဏ်များ ချမှတ်ပြီးနောက် ယခု ပယ်မိသားစုထဲမှ ၅ ဦးကို ကိုးကန့်ဒေသ၌ ကျားဖြန့်နှင့်ဒုစရိုက်အဆောက်အအုံပေါင်း ၄၁ လုံးဆောက်လုပ်ခဲ့မှု၊ အွန်လိုင်း လောင်းကစားလုပ်ငန်းများ၊ နိုင်ငံဖြတ်ကျော်ရာဇဝတ်မှုများအဖြစ် လူသတ်မှု၊ များစွာကို ဒဏ်ရာရစေမှု၊ အဓမ္မ ပြည့်တန်ဆာလုပ်ခိုင်းမှုများဖြင့် စွဲချက်ပေါင်းများစွာ တင်ခဲ့ပြီး တရုတ်နိုင်ငံသား ၆ ဦးကို သတ်ခဲ့ရာတွင် တစ်ဦးမှာ ကိုယ့်ကိုယ်ကိုယ် သတ်သေခိုင်းမှုများ ထင်ရှားသဖြင့် သေဒဏ်ပေးခဲ့ကြောင်း ထုတ်ပြန်ခဲ့သည်။
ယင်းအမှုတွဲနှင့်ပတ်သက်ပြီး နောက်ထပ် တရားခံ ၂ ဦးအား ၂ နှစ်ဆိုင်းငံ့သေဒဏ်၊ နောက်ထပ် ၅ ဦး အား တစ်သက်တစ်ကျွန်းထောင်ဒဏ်၊ ၃ ဦးအား နှစ် ၂၀ ထောင်ဒဏ်၊ နောက်ထပ် ၉ ဦးအား ထောင်ဒဏ် အပြင် ဒဏ်ငွေ၊ ပိုင်ဆိုင်မှု သိမ်းဆည်းခြင်းနှင့် ပြည်နှင်ဒဏ်ပေးခြင်းများပါ စီရင်ချက်ချခဲ့သည်။
သေဒဏ်ပေးခဲ့သူများထဲမှ တစ်ဦးသည် စိတ်ကြွရူးသွပ်ဆေးပြား တန် ၁၁ သန်း ထုတ်လုပ် ဖြန့်ဖြူးရောင်းချခဲ့သည့် ကွန်ရက်အတွင်း ပူးပေါင်းပါဝင်ကြောင်း ထင်ရှားခဲ့သည်ဟု ဆိုသလို လောင်းကစားနှင့် ကျားဖြန့်လိမ်လည်ခဲ့မှု ငွေကြေးပမာဏသည် ယွမ် ၂၉ ဘီလီယံကျော် ရှိသည်ဟုလည်း တရားရုံးက ထုတ်ပြန်ခဲ့သည်။
ကိုကလင်း
Ref: bbc & Xinhua
#MeKongNews
#ပယ်ဆောက်ချိန်
#တရုတ်
#ကျားဖြန့်
#မူးယစ်မှောင်ခို
