မဲခေါင်၊ နိုဝင်ဘာ ၄
ကရင်ပြည်နယ် မြ၀တီမြို့ရှိ KK Park ကျားဖြန့်ဝင်းအား စကစနှင့် BGF တို့ ရှင်းလင်းနေသဖြင့် ထွက်ပြေးလာသည့် နိုင်ငံခြားသား ၁၅၉၈ ဦးကို ထိုင်းနိုင်ငံ လူဝင်မှုကြီးကြပ်ရေးမှ တာ့ခ်ခရိုင်တွင် မှတ်ပုံတင်ခဲ့ပြီးနောက် လက်ခံမှုအား နိုဝင်ဘာ ၂ ရက်မှ စတင်ရပ်ဆိုင်းလိုက်ပြီဖြစ်သည်။
၂၀၂၅ နိုဝင်ဘာ ၃ ရက် ဒေသစံတော်ချိန် နံနက် ၇ နာရီတွင် တာ့ခ်ခရိုင် လူဝန်မှုကြီးကြပ်ရေးအဖွဲ့မှ ယခင်ရက်များက ရောက်ရှိလာသော KK Park မှ နိုင်ငံခြားသား အမျိုးသား ၁၃၃၃ ယောက်၊ အမျိုးသမီး ၂၆၅ ယောက်ကို မှတ်ပုံတင်ကာ စစ်ဆေးလက်ခံခဲ့ပြီး အများဆုံးမှာ အိန္ဒိယမှဖြစ်ကာ ၄၆၅ ဦး၊ ဖိလစ်ပိုင်မှ ၂၂၀ ဦး၊ တရုတ်မှ ၁၈၅ ဦး၊ ဗီယက်နမ်မှ ၁၅၁ ဦး၊ အီသီယိုးပီးယားမှ ၁၃၀ ဦးပါဝင်ကာ နိုဝင်ဘာ ၆ ရက်မှ ၁၀ ရက်အတွင်း အိန္ဒိယလေတပ်က မဲဆောက်လေဆိပ်မှတစ်ဆင့် အိန္ဒိယသို့ ၃ သုတ်ခွဲကာ ပြန်လည်ခေါ်ဆောင်သွားမည်ဟု သိရသည်။
တစ်ဆက်တည်း နိုဝင်ဘာ ၃ ရက်ထုတ်ပြန်မှုအရ တာ့ခ်ခရိုင် နယ်စပ်ဖြတ်ကျော်ဂိတ် ၅ ခုဖြစ်သော သာဆောင်ယန်း၊ မဲ့ရမတ်၊ မဲဆောက်၊ ဖုပ်ဖရနှင့် အမ်ဖန်းနယ်မြေများမှ ထိုင်းနိုင်ငံအတွင်းသို့ ကျားဖြန့် သမားပြည်ပသားများ ထပ်မံဝင်ရောက်လာမှုကို နိုဝင်ဘာ ၂ ရက်နောက်ပိုင်း လက်ခံတော့မည်မဟုတ်ဘဲ မှတ်ပုံတင်ခြင်း ပိတ်လိုက်ပြီဖြစ်ကာ ဝင်လာသူများသည် တရားမဝင်နိုင်ငံတွင်း ခိုးဝင်သူများအဖြစ် ဥပဒေအရ အရေးယူခံရမည်ဖြစ်သော ရဲမှုခင်းရေးရာနှင့် သက်ဆိုင်သူများဖြစ်မည်ဟု တာ့ခ်ခရိုင် လူဝန်မှုကြီး ကြပ်ရေးအဖွဲ့က ထုတ်ပြန်အသိပေးခဲ့သည်။
ကိုကလင်း
Ref: Khaosod
#MeKongNews
#ကျားဖြန့်
#မြဝတီ
#မဲဆောက်
#စောချစ်သူ
