မဲခေါင်၊ အောက်တိုဘာ ၃၁
တောင်ကိုရီးယားနိုင်ငံ ဘူဆန်မြို့တွင် စတင်ကျင်းပနေသည့် အာရှ-ပစိဖိတ် စီးပွားရေး ပူးပေါင်းဆောင် ရွက်မှု (APEC) ထိပ်သီးအစည်းအဝေးတွင် အောက်တိုဘာ ၃၀ ရက်မနက်က ကမ္ဘာ့မဟာအင်အားကြီး အမေရိကန်နှင့်တရုတ်ခေါင်းဆောင် ဒေါ်နယ်ထရမ့်နှင့် ရှီကျင့်ဖျင်တို့ ၁ နာရီ ၄၅ မိနစ်ကြာ မျက်နှာချင်း ဆိုင်တွေ့ဆုံဆွေးနွေးပြီးနောက် အောင်မြင်အကျိုးဖြစ်ထွန်းမှုသည် ၁၂ ဆင့်တွင် ၁၀ ဆင့် အောင်မြင် သလောက်ရှိခဲ့သည်ဟု ဒေါ်နယ်ထရမ့်က ထုတ်ပြန်ခဲ့သည်။
ကမ္ဘာ့ နောက်ဆုံးပေါ် စစ်လက်နက်များနှင့် နည်းပညာကဏ္ဍတွင် မရှိမဖြစ်သော မြေရှားသတ္တုကို တရုတ်က ကမ္ဘာစျေးကွက်၏ ၇၀ မှ ၉၀ ရာခိုင်နှုန်းအထိ ထိန်းချုပ်ထားရာ မကြာသေးမီက ရှီကျင့်ဖျင် သည် ပြည်ပသို့ မြေရှားပါဝင်သည့် ဓာတ်သတ္တုများတင်ပို့မှုအား တင်းကြပ်စွာ ကန့်သတ်ပိတ်ပင်မှုများ လုပ်ကြောင်း အတည်ပြုကြေညာခဲ့သည်။
ယင်းအနေအထားကြောင့် ဒေါ်နယ်ထရမ့်က ကမ္ဘာ့စျေးကွက်ကို စိုးမိုးဗိုလ်ကျခြင်း၊ မတည်မငြိမ်ဖြစ်စေသည့် လုပ်ရပ်ဟုဆိုကာ တရုတ်အား သွင်းကုန်အခွန် ၅၇ ရာခိုင်နှုန်းချမှတ်ထားသည့်ကြားမှ နိုဝင်ဘာ ၁ ရက်မှ စတင်ပြီး နောက်ထပ် သွင်းကုန်ခွန် ၁၀၀ ရာခိုင်နှုန်း ထပ်တိုးချမှတ်မည်ဟု ထုတ်ပြန်ကာ ကုန်သွယ်ရေးစစ်ပွဲအသွင် တင်းမားမှုမြင့်တက်လာခဲ့သည်။
ထရမ့်သည် ယခုခရီးစဉ်မတိုင်မီ အာဆီယံအစည်းအဝေးသို့တက်ရောက်စဉ်တွင် ထိုင်း၊မလေးရှားနှင့် ဖိလစ်ပိုင်နိုင်ငံများ၌ မြေရှားသတ္တုထုတ်လုပ်ရန် MOU စာချုပ်များ ချုပ်ဆိုသွားခဲ့ပြီး တရုတ်ကို တန်ပြန် ရန် ကြိုးစားခဲ့သေးကာ ယခုတွေ့ဆုံမှုတွင် တရုတ်ဘက်မှ မြေရှားတင်ပို့မှု ပိတ်ပင်ကန့်သတ်မှုအား အမေရိကန်အား မသက်ရောက်စေဘဲ ၁ နှစ်ပြန်လည်တင်သွင်းခွင့်ပြုသည်ဟု ရှီကျင့်ဖျင်ဘက်မှ သဘောတူပေးခဲ့သလို ထရမ့်ဘက်မှလည်း လက်ရှိ သွင်းကုန်ခွန် ၅၇ ရာခိုင်နှုန်းမှ ၄၇ ရာခိုင်နှုန်းအထိ လျှော့ချပေးပြီး နှစ်နိုင်ငံ အပြန်အလှန်ကုန်သွယ်မှု ညှိနှိုင်းခဲ့မှုများ အောင်မြင်ခဲ့သည်ဟု ထရမ့်ဘက်မှ ထုတ်ပြန်ခဲ့သည်။
ရှီကျင့်ဖျင်နှင့်တွေ့ဆုံမှုတွင် တရုတ်သည် အမေရိကန်သို့ မူးယစ်ဆေးဝါးတင်သွင်းနေမှုအား ၁၀ ရာခိုင်နှုန်းလျှော့ချနိုင်ခဲ့သဖြင့် ကျေနပ်ရကြောင်း၊ သို့သော် ထိုင်းနှင့်ကမ္ဘောဒီးယားတို့ ငြိမ်းချမ်းရေး ရရှိရန်တွင်မူ တရုတ်သည် အိမ်နီးချင်းဖြစ်ပါလျှက် မည်သည့် ပါဝင်မှုမျိုးမှ မလုပ်ခဲ့ဟု ပြောင်ပြောင် တင်းတင်းပြောဆိုခဲ့သေးသည်။
ထိုပြောဆိုမှုကို ရှီကျင့်ဖျင်က မိမိတို့ ထရမ့်၏ ငြိမ်းချမ်းရေးလုပ်ငန်း စဉ်များအားလုံးအား လေးစားရပြီး ထိုင်းနှင့်ကမ္ဘောဒီးယား ငြိမ်းချမ်းရေးရရှိရေ ကိုယ့်နည်းကိုယ့်လမ်း ဖြင့် ဝင်ရောက် အားဖြည့်ခဲ့ခြင်းများရှိခဲ့သည်ဟု တုံ့ပြန်ပြောဆိုခဲ့ကြောင်းလည်း သိရသည်။
ဘူဆန် APEC ညီလာခံတွင် ဒေါ်နယ်ထရမ့်သည် မဟာမိတ်တောင်ကိုရီးယားနိုင်ငံ နျူကလီးယားရေငုပ် သင်္ဘောတည်ဆောက်ရေးအတွက် ခွင့်ပြုပေးလိုက်ကြောင်းလည်း အတည်ပြုထုတ်ပြန်သွားခဲ့သည်။
ယင်းနျူကလီးယားရေငုပ်သင်္ဘောကို ဖီလာဒဲဖီးယားဆိပ်ကမ်းတွင် တည်ဆောက်မည်ဖြစ်ကာ တောင်ကိုရီးယားဘက်မှ ရင်းနှီးမြှုင်္ပနှံမှုများအတွက် အကူအညီဖြည့်ပြီး အကောင်အထည်ပေါ်စေမည် ဟု ထရမ့်က ပြောဆိုသွားခဲ့ခြင်းဖြစ်သည်။
ကိုကလင်း
Ref: yenisafak
#MeKongNews
#ရှီကျင်းဖျင်
#တရုတ်
#အမေရိကန်
#မြေရှားသတ္တု
#တောင်ကိုရီးယား
