မဲခေါင်၊ အောက်တိုဘာ ၂၈
အောက်တိုဘာ ၂၆ ရက်က ကရင်ပြည်နယ်၊ မြ၀တီမြို့ရှိ KK Park ကျားဖြန့်ဝင်းအတွင်းမှ ထိုင်းဘက်သို့ ထွက်ပြေးလာသည့် ၂၈ နိုင်ငံမှ ၁၂၄၃ ယောက်သော လူများထဲတွင် ယင်းဒုစရိုက်ရပ်ဝန်း၏ ခေါင်းဆောင်ကြီးဖြစ်သော တရုတ်နိုင်ငံသား ဇောင်ဝေ (Zhao Wei) ပါဝင်ဖွယ်ရှိသည်ဟု ထိုင်း The Nation မီဒီယာက ဖော်ပြသွားခဲ့သည်။
KK Park ကျားဖြန့်ဝင်းကြီးအား မြန်မာစစ်ကောင်စီမှ ချေမှုန်းနေသည်ဟု ထုတ်ပြန်ကာ ထိုဒေသအား ထိန်းချုပ်ထားသည့် ကရင်နယ်ခြားစောင့်တပ် BGF များနှင့်ပေါင်းကာ ၃၊ ၄ ည ဆက်တိုက် အဆောက်အအုံအတွင်း ဖောက်ခွဲမှုများ လုပ်ဆောင်ကာ ကျားဖြန့်လုပ်သားများနှင့် ဂိုဏ်းခေါင်းဆောင် များစွာလည်း ထွက်ပြေးရာ ဇောင်ဝေသည် မဲ့ရမတ် သဘာ၀နယ်စပ်ဖြတ်ကျော်လမ်းမှ ထိုင်းဘက်သို့ အောက်တိုဘာ ၂၆ ရက်တွင် ဝင်လာခဲ့ပြီး ထိုမှတစ်ဆင့် ၎င်းအထိုင်ချထားသော ရွှေတြိဂံနယ်မြေ လာအိုပိုင်နက်တွင်းရှိ Kings Romans ကာစီနိုစီမံကိန်းဝင်းကြီးထဲ ဦးတည်သွားနေသည်ဟု ယင်းသတင်းက ဖော်ပြခဲ့သည်။
ထိုင်း၊ မြန်မာနှင့်လာအိုတို့ ဆုံရာရွှေတြိဂံဒေသ လာအိုနိုင်ငံဘက်ခြမ်း ဘိုခဲရို ခရိုင် Houay Xay အရပ်တွင် ၂၀၀၇ ခုနှစ်က ဇောင်ဝေသည် လာအိုအစိုးရ၏ ဖိတ်ခေါ်မှုနှင့် Kings Romans ကာစီနို မြို့တော်ကြီးကို ထူထောင်ခဲ့ကာ ထိုရပ်ဝန်းသည် ကျားဖြန့်နှင့်ပတ်သက်သော လူမှောင်ခို၊ တိရစ္ဆာန် မှောင်ခို၊ ငွေကြေးခဝါချမှုများကို အဓိကလုပ်ဆောင်သဖြင့် အမေရိကန်က ပိတ်ဆို့အရေးယူမှု လုပ် ထားခဲ့သည်။
Kings Romans ကုမ္ပဏီသည် ဟောင်ကောင်မှတ်ပုံတင်ထားသော ကုမ္ပဏီဖြစ်ကာ ဇောင်ဝေသည် မက္ကာအိုမှ ဒုစရိုက်ကွန်ရက်ခေါင်းဆောင်အဖြစ် ထိုနေရာသို့ ရွှေ့လာသူဖြစ်ကာ မဲခေါင် မြစ်ဝှမ်းတစ်လျှောက် တရုတ်ကျားဖြန့်များစိုးမိုးရေးကို ဦးဆောင် ထူထောင်ခဲ့သူဖြစ်သည်။
ယခင် မိုင်းလားတွင်လည်း ကာစီနိုမြို့တော်ဟုဆိုကာ ၀ တပ်(UWSA)၊ NDAA တို့နှင့်ပူးပေါင်းပြီး မူးယစ်ဆေးနှင့်ငွေကြေးခဝါချ၊ ကျားဖြန့်လုပ်ငန်းများပါ ထူထောင်ခဲ့သူ ဒုစရိုက်ခေါင်းဆောင်အဖြစ် ကမ္ဘာက သတ်မှတ်ထားသည့် ဇောင်ဝေ (၇၃ နှစ်) သည် ယခု KK Park မှ ထွက်ခွာကာ ထိုင်းသို့ မဲ့ရမတ် နယ်စပ်ဖြတ်ကျော်သဘာ၀လမ်းမှ ဝင်လာပြီး ၎င်းအခြေစိုက်ထူထောင်ထားသော ရွှေတြိဂံဇုန် လာအို ဘက်ခြမ်းသို့ ထိုင်းနိုင်ငံ ချင်းရိုင်ခရိုင် ချင်းဆန်မှ ဖြတ်ထွက်ရန် သွားနေလောက်သည်ဟု The Nation က ဖော်ပြသွားခဲ့ခြင်းဖြစ်သည်။
ထောက်လှမ်းရေးသတင်းများအရ မဲခေါင်မြစ်ဝှမ်းဒေသတစ်လျှောက် တရုတ်စိုးမိုးလာနိုင်ရေး တရုတ်အစိုးရမှ ကာစီနိုများတည်ကာ ဖျက်စီးရေးစီမံချက်တွင် ယောင်ဝေသည် သူလျှိုအဖြစ် စေလွှတ်ထားသူဖြစ်နိုင်သည်ဟုလည်း ဖော်ပြမှုများ ရှိခဲ့သည်။
ကိုကလင်း
Ref: The Nation
#MeKongNews
#ဇောင်ဝေ
#ကာစီနို
#ကျားဖြန့်
#မဲခေါင်မြစ်
#ဒုစရိုက်ခေါင်းဆောင်
