မဲခေါင်၊ အောက်တိုဘာ ၂၃
ရှမ်းပြည်မြောက်ပိုင်း စစ်မြေပြင်တွင် TNLA နှင့်အတူပူးတွဲ တိုက်ပွဲဝင်နေသည့် ကျောက်မဲခရိုင် အထူးတိုက်ခိုက်ရေးအဖွဲ့ထံ စစ်ကောင်စီ တပ်ဖွဲ့ဝင်တစ်ဦး အလင်းဝင်လာကြောင်း ယင်းအဖွဲ့က အောက်တိုဘာ၂၂ရက်တွင် ထုတ်ပြန်ကြေညာသည်။
အလင်းဝင်လာသည့် ရဲဘော်မှာ ပြည်သူ့စစ်မှုထမ်းသင်တန်း အပတ်စဥ် ၁၂ဆင်း တပ်သားအောင်ကျော်ဖြစ်ကာ ၎င်းတာ ဝန်ကျနေသည့် နမ့်လန်အခြေစိုက် ခလရ-၂၄၃ မှ လက်နက်မဲ့ ထွက်ပြေးလာပြီး လူထုတော်လှန်ရေးဘက်သို့ အလင်းဝင်လာကြောင်း သိရသည်။
“လက်နက်ခဲယမ်းမပါခဲ့ဘူး။ အလင်းဝင်တဲ့နေ့ရက်ကတော့ ကာယကံရှင်က မဖော်ပြစေချင်လို့ပါ။ လက်ရှိမှာတော့ မဟာမိတ် TNLA နဲ့အတူရှေ့တန်းစစ်မြေပြင်မှာ စစ်ရေးလှုပ်ရှားနေပါတယ်။ ရဲဘော်အသစ်တွေလဲ ခေါ်ယူနေပါတယ်။ ရှေ့တန်းရဲဘော်များအနေနဲ့ အရေးပေါ်စက်သုံးဆီ၊ ဆေးဝါးနဲ့ ရိက္ခာများ လိုအပ်နေပါတယ်။ ရဲဘော်တွေအားလုံး ရပ်မနေပဲ ဆက်လက်ကြိုးစားနေပါတယ်”ဟု ယင်းတပ်မှ ပြန်ကြားရေးတာဝန်ရှိသူတစ်ဦးက မဲခေါင်သို့ ပြောသည်။
အလင်းဝင်လာသူ၏ ပြောကြားချက်တွင် ၎င်းသည် နောင်ချိုဘက်တံတားပြင်ရာမှ အလင်းဝင်လာခြင်း ဖြစ်ကြောင်းသိရသည်။
၎င်းသည် မန္တလေးကျောက်ဝိုင်းဘက် ရောက်ရှိနေစဥ် ပေါ်တာဆွဲဖမ်းဆီးခံရပြီး လေ့ကျင့်ရေးစခန်းသို့ အခြားပေါ်တာဖမ်းခံရသူများနှင့် သင်တန်းတက် ခဲ့ရကြောင်း၊ သင်တန်းတွင် ပါးရိုက်ခံ၊ စစ်ဖိနပ်ဖြင့် အကန်ခံရမှုများ ကြုံတွေ့ခဲ့ရသလို အခြားညှဥ်းပန်းနှိပ်စက်မှုများလည်း ခံစားခဲ့ရကြောင်း ၎င်းကပြောသည်။
“သမီးလေးကို မတွေ့ရသေးဘူး။ မိသားစုနဲ့ အေးအေးချမ်းပဲ နေချင်တယ်။ မတရားဖိနှိပ်ရက်စက်တဲ့ စစ်အာဏာရှင်ကိုတော့ တတ်နိုင်သမျှ ရဲဘော်တွေနဲ့ အတူ ဆန့်ကျင်သွားမယ်” ဟု ၎င်းက ပြောသည်။
စစ်ကောင်စီတပ်အတွင်း မူးယစ်ဆေးဝါးများ ရောင်းချသည်ကို ကိုယ်တိုင်သိမြင်ခဲ့ရပြီး သိသာသိစေ မမြင်စေနဲ့ဟုအထက်က ပြောကြားထားသဖြင့် မူးယစ်ဆေးဝါးသုံးစွဲသူ အများအပြားရှိနေသည်ဟု ၎င်းက ဆိုသည်။
လက်ရှိတွင် စစ်ကောင်စီက အဓမ္မနည်းလမ်းအမျိုးမျိုးဖြင့် လူသစ်စုဆောင်းကာ သင်တန်းပေးခဲ့သည့် ပြည်သူ့စစ်မှုထမ်း အပတ်စဥ် ၁၅ သင်တန်းဆင်းခဲ့ပြီး လက်ရှိ အပတ်စဥ် ၁၈ တက်ရောက်နေကာ ၁၉ အတွက် လူသစ် အဓမ္မစုနေဆဲ ဖြစ်သည်။
မြန်မာ့စစ်ဘက်ရေးရာနှင့် လုံခြုံရေးဆိုင်ရာလေ့လာရေးအဖွဲ့-MDSI အဖွဲ့ဝင်တစ်ဦးကမူ စစ်ကောင်စီတပ်မှ ထွက်ပြေး၊ ပျောက်ဆုံး အနည်းဆုံးအင်အား ၃၀၀၀ ခန့်ရှိနေကြောင်းခန့်မှန်းထားသည်။
#MeKongNews
#ရှမ်းမြောက်
#ကျောက်မဲ
#အဓမ္မစစ်သားစုဆောင်း
#အလင်းဝင်
