မဲခေါင်၊ အောက်တိုဘာ ၁၅
ထိုင်းနိုင်ငံ၊ နောင်ဆွာခရိုင်၊ တူးမြောင်းလမ်းအမှတ် ၁၀ အနီး အရှိန်ဖြင့်မောင်းနှင်လာသည့် Tesla Model 3 လျှပ်စစ်ကားသည် ထိန်းမရဘဲ မီတာ ၁၀၀ ကျော် ဒရွတ်ဆွဲကာ လမ်းဘေး တူးမြောင်း အတွင်း ကျသွားရာ ယာဉ်မောင်းသည် ကားတံခါးများလော့ခ်ပြန်ဖွင့်မရတော့ဘဲ ကားနှင့်အတူ ရေနစ်သေဆုံးခဲ့ရသည်။
အောက်တိုဘာ ၁၅ ရက် ဒေသစံတော်ချိန် နံနက် ၅ နာရီခွဲတွင် ထိုအခင်းဖြစ်ပွားခဲ့ရာ ကယ်ဆယ်ရေး အဖွဲ့ အမြန်ဆုံးရောက်ရှိလာနိုင်သော်လည်း ကားသည် ရေထဲနစ်သွားပြီး အတွင်းမှကားသမားသည် တံခါးများကို ထုရိုက်ဖွင့်ရန်ကြိုးစားရင်းမှာပင် ရေနစ်သေဆုံးခဲ့ရခြင်းဖြစ်သည်။
ကယ်ဆယ်ရေးအဖွဲ့ အမြန်ရောက်ရှိပြီး နစ်မြုပ်ကား အမိုးပေါ်မှ ခွဲပြီးဆွဲထုတ်ကာ ရှေးဦးသူနာပြု နည်းများဖြင့် မိနစ် ၃၀ ကြာ နှလုံးပြန်ခုန်နိုင်စေရန် CPR အစွမ်းကုန်ကြိုးစားခဲ့သော်လည်း ဝစ်သာဝပ်ဟု အမည်ရသည့် ၅၅ နှစ်အရွယ် ဘန်ကောက်မြို့သား အသက်ပြန် မရှင်လာနိုင်ခဲ့ပေ။
လျှပ်စစ်ကားများစွာသည် ကမ္ဘာတစ်ဝန်း ပြဿနာများစွာ ရှိနေခဲ့ကာ စက်သေသည်နှင့် ကျသွားသည့် တံခါးလော့ခ်များကို ပြန်မဖွင့်နိုင်တော့သဖြင့် သေဆုံးသူများ တိုးသထက်တိုးလာသည်။
တရုတ်နိုင်ငံ၊ စီချွမ်းပြည်နယ် ချိန်တူးမြို့တွင်လည်း ပြီးခဲ့သည့် အောက်တိုဘာ ၁၃ ရက်က ရှောင်းမီထုတ်လျှပ်စစ်ကား အရှိန်ဖြင့် သစ်ပင်ဝင်တိုက်မိကာ မီးလောင်ကျွမ်းရာတွင် ကားတံခါးဖွင့်မရသဖြင့် လူ ၄၊ ၅ ယောက် အပြင်မှ တံခါးဖွင့်ရန်ဝိုင်းကြိုးစားသည့်ကြားမှ ကားမောင်းလာသူ မီးစွဲလောင် သေဆုံးမှု ဖြစ်ပွားခဲ့သေးသည်။
ကိုကလင်း
Ref: Khaosod
#MeKongNews
#ထိုင်းနိုင်ငံ
#ဘန်ကောက်
#လျှပ်စစ်ကား
#ရေနစ်
