မဲခေါင်၊ စက်တင်ဘာ ၂၆
ဒိန်းမတ်နိုင်ငံရှိ လေဆိပ် ၄ ခုပေါ် ၂ ရက်ဆက် ထူးဆန်းသည့် ဒရုန်းများစွာ ကျူးကျော်ပျံသန်းနေခဲ့သလို ယင်းပုံစံအတိုင်း ပြင်သစ်နိုင်ငံ လေတပ်အခြေစိုက်စခန်းပေါ်သို့လည်း ဒရုန်းများ စက်တင်ဘာ ၂၅ ရက်က ထပ်မံ တွေ့ရှိရပြန်သည်။
ဒိန်းမတ်နိုင်ငံရှိ အရေးပါသော လေဆိပ်ကြီး ၄ ခုပေါ်သို့ ထူးဆန်းသည့် ဒရုန်းများ ၂ ညဆက်တိုက် ကျူးကျော်ပျံသန်းလာသဖြင့် မည်သူ့လက်ချက်ဖြစ်သည်ကို စုံစမ်းနေရာ ထိုဖြစ်ရပ်များနှင့်တိုက်ဆိုင်စွာ မသင်္ကာဖွယ်ရာ ရုရှားသင်္ဘော ၃ စီး ကမ်းလွန်ဒေသတွင် ရှိနေကြောင်း သိရှိရသည်ဟု ဒိန်းမတ် ထောက်လှမ်းရေးမှ ထုတ်ပြန်ခဲ့သည်။
နော်ဒစ်ဒေသရှိ အရေးအပါဆုံးသော ကိုပင်ဟေဂင်လေဆိပ်ပေါ်တွင် များစွာသော ဒရုန်းများ စက်တင်ဘာ ၂၄ နှင့် ၂၅ ရက်တို့တွင် ၂ ရက်ဆက် ကျူးကျော်ပျံသန်းရောက်ရှိလာသဖြင့် နေတိုးအဖွဲ့ စည်းမျဉ်း Article 4 အသုံးပြုကာ အစည်းအဝေးခေါ်ယူရန် စဉ်းစားနေသည်။
ဒိန်းမတ် ထောက်လှမ်းရေးအဖွဲ့က မိမိတို့နိုင်ငံသည် အဖျက်အမှောင့်အန္တရာယ်ကြီးမားစွာ ရောက်ရှိလာနေပြီဟု ထုတ်ပြန်ခဲ့သည်။
ယင်းဒရုန်းများ မည်သည့်နေရာမှ မည်သူ့လက်ချက်ဖြင့်ရောက်လာသည်ဆိုခြင်းကို သက်သေတစ်စွန်းတစ်စမှ မရသေးသော်လည်း ဒိန်းမတ် ကမ်းလွန်ပင်လယ်ပြင်တွင် ရုရှား၏ နာမည် ဆိုးဖြင့်ကျော်ကြားကာ ပိတ်ဆို့အရေးယူခံထားရသည့် အရိပ်ရေယာဉ်စု (shadow fleet) မှ ရုရှား သင်္ဘော ၃ စီးရှိနေသည်ကို စုံစမ်းသိရှိရကာ ထိုဒရုန်းများကို အဆိုပါ သင်္ဘောများပေါ်မှ ထိန်းချုပ် စေလွှတ်ခြင်းဖြစ်မည်ဟု ယူဆကြောင်း ဒိန်းမတ်ထောက်လှမ်းရေးက ဆိုသည်။
ပြင်သစ်အရှေ့ပိုင်း မာနီအရပ်ရှိ Mourmelon-le-Grand လေတပ်အခြေစိုက်စခန်းပေါ် ဒရုန်းများ ကျူးကျော်ပျံသန်းရောက်ရှိ လာသဖြင့် လုံခြုံရေးတိုးမြှင့်ခဲ့ရသော်လည်း မည်သည့် သက်သေမှ မရနိုင် သေးကြောင်း ပြင်သစ်အာဏာပိုင်များက ကြေညာခဲ့သည်။
ယင်းလေတပ်စခန်းသည် မနှစ်က ယူကရိန်းစစ်သားများကို လေ့ကျင့်သင်ကြားပေးခဲ့သောစခန်းလည်းဖြစ်ရာ ရုရှားလက်ချက်ဟုသာ ထင်ကြေးပေးနေကြပြီး နေတိုးနှင့်ရုရှားတို့ ထိပ်တိုက်တွေ့မည့် တတိယ ကမ္ဘာစစ် စတင်ရန် နီးကပ်လာ ပြီး စိုးရိမ်နေကြရပြီဖြစ်သည်။
ဒေါ်နယ်ထရမ့်ကိုယ်တိုင်က ရုရှားဖိုက်တာဂျက်လေယာဉ်များ ကျူးကျော်ဝင်ရောက်လာလျှင် ပစ်ချသင့်သည်ဟု ပြောဆိုခဲ့ပြီးနောက် စက်တင်ဘာ ၂၅ ရက်က အမေရိကန်၏ အလက်စကားပြည်နယ် ကမ်းလွန်ပင်လယ်ပြင်ပေါ် ရုရှား၏ နျူကလီးယားတင်ဆောင် နိုင်စွမ်းရှိ ဖိုက်တာဂျက်လေယာဉ် ၄ စီး ကျူးကျော်ဝင်ရောက်လာခဲ့သေးသဖြင့် အမေရိကန်နှင့် ကနေဒါ မှ ဖိုက်တာဂျက်လေယာဉ်များဖြင့် ကြားဖြတ်တားဆီးမှုများ လုပ်ခဲ့ရသေးသည်။
တပြိုင်တည်းပင် ယူကေ ရေပိုင်နက်မြောက်ပင်လယ် နှင့် အင်္ဂလိပ်ရေလက်ကြားတို့သို့ ရုရှား ကုန်တင်သင်္ဘော Sparta IV ဝင်ရောက်လာသဖြင့် ဗြိတိန် တော်ဝင်ရေတပ်ကလည်း စစ်ရဟတ်ယာဉ်များ ခြံရန်ကာ HMS Iron Duke စစ်သင်္ဘောကြီးကို စေလွှတ်စောင့်ကြည့်မှုများ လုပ်နေကြောင်း ထုတ်ပြန်ကြေညာခဲ့သည်။
ကိုကလင်း
Ref:Thesun
#MeKongNews
#ဒိန်းမတ်
#ပြင်သစ်
#ဒရုန်း
#ရုရှား
#ဗြိတိန်
#ကိုပင်ဟေဂင်
