မဲခေါင်၊ စက်တင်ဘာ ၂၅
ရုရှား ဒရုန်းများ ပိုလန်နှင့်ရိုမေးနီးယားလေပိုင်နက်ထဲသို့ဝင်ပြီးနောက် အက်စတိုးနီးယားလေပိုင်နက်ထဲ သို့ စက်တင်ဘာ ၁၉ ရက်က ရုရှား၏ MiG-31 ဖိုက်တာဂျက်လေယာဉ် ၂ စီး ၁၂ မိနစ်ကြာ ဝင်ရောက် လာမှုအပေါ် အမေရိကန်သမ္မတ ဒေါ်နယ်ထရမ့်က ထပ်ဝင်လာလျှင် နေတိုးအဖွဲ့ဝင်နိုင်ငံများ ပစ်ချသင့်သည်ဟု တိုက်တွန်းပြောဆိုခဲ့သည်။
အိမ်ဖြူတော်မှ ယခုလိုပြောဆိုမှုကို အခိုင်အမာ တိုက်တွန်းခြင်းလားဟု မေးမြန်းမှုကိုမူ ထရမ့်က အခြေအနေပေါ် မူတည်သည်ဟု အနည်းငယ်လျှော့ချကာ ပြန်ပြောသွားခဲ့သော်လည်း ကုလသမဂ္ဂ အစည်းအဝေးတွင် ယူကေ နိုင်ငံခြားရေးဝန်ကြီး မစ္စဗက်တီကူးပါးက မိမိတို့နေတိုးအဖွဲ့သည် ကုလသမဂ္ဂချာတာကိုင်စွဲထားသလို ယူကရိန်းကို ထိပါးခြင်း၊ နေတိုးအဖွဲ့ဝင်များကို ထိပါးခြင်းများအား စုပေါင်း တုံ့ပြန်ရန် ကတိကဝတ်ပြုထားပြီးဖြစ်သောကြောင့် နောက်တစ်ကြိမ် ရုရှား ကျူးကျော်ဝင်ရောက်လာပါက ပစ်ချရန် တွန့်ဆုတ်မနေဘဲ ခြေလှမ်းအားလုံး အသင့်ပြင်ဆင်ထားပြီဟု စက်တင်ဘာ ၂၃ ရက်က ပြောကြားသွားခဲ့သည်။
ဗက်တီကူးပါးက “ရုရှားလုပ်ရပ်ဟာ မဆင်မခြင်နဲ့ စစ်ပွဲဆီ ဦးတည်စေမယ့် ရန်စမှုပဲ။ သူတို့ဟာ ဒီမိုကရေစီပျောက်ပျက်အောင်၊ ဥရောပနယ်စပ်စည်းတွေကိုကျော်လွန်ဝင်ရောက်ပြီး မတည်ငြိမ်မှုတွေ ဖြန့်ကျက်နိုင်အောင်၊ ပဋိပက္ခတွေဖြစ်အောင် လုပ်နေတာပါ။ နေတိုးလေပိုင်နက်ထဲ ဝင်ရောက်ရန်စခြင်း အတွက် နေတိုးအဖွဲ့ဟာ ပစ်ချဖို့ အားလုံးအသင့်ပြင်ဆင်ထားပါပြီ” ဟု ပြောသွားခဲ့သည်။
ကိုကလင်း
Ref: Thesun
#MeKongNews
#နေတိုး
#ရုရှား
#ဥရောပ
#ကုလသမဂ္ဂ
