မဲခေါင်၊ စက်တင်ဘာ ၂၃
စက်တင်ဘာ ၁၇ ရက်က ချင်းမိုင်ခရိုင်၊ နောင်ပါကရန်ခရိုင်ခွဲရှိ အဝတ်လျှော်ဆိုင်တွင် အသက် ၁၄ နှစ်အရွယ် မိန်းကလေး လက်ကောက်ဝတ်အား ဓားဖြင့် မွှမ်းကာလှီးဖြတ်ခဲ့သည့် ချင်းမိုင် ရှမ်း ၉၉၉ ဂိုဏ်းခေါင်းဆောင် ချိုင်လင်းခေါ် မစ္စတာတော့ပ်ကို ဖမ်းဆီးနိုင်ခဲ့ပြီဟု ထိုင်းရဲမှူးချုပ်အပါ ဒေသဆိုင်ရာ ရဲတပ်ဖွဲ့ အကြီးအကဲများက စက်တင်ဘာ ၂၃ ရက်တွင် အတည်ပြု ထုတ်ပြန်သွားခဲ့သည်။
ချင်းမိုင်တွင် ထိုင်းရဲတပ်ဖွဲ့က လူဆိုး၊ လူမိုက်ဂိုဏ်းများနှိမ်နင်းရေးကို လုပ်ဆောင်နေပြီး တော့ပ်အပါအဝင် ဂိုဏ်းစတားများကို ဖမ်းဆီးရန် စစ်ဆင်ရေးတစ်ရပ်ဖော်ဆောင်ကာ တရားခံများကို ရှာဖွေနေခဲ့ရာ နယ်စပ်သို့ဆိုင်ကယ့်ဖြင့် ထွက်ပြေးသည့် တော့ပ် ကို ဖမ်းမိခဲ့ခြင်းဖြစ်သည်။ ရဲတပ်ဖွဲ့သည် တရားမဝင် ရွှေ့ပြောင်းလုပ်သားများ ကိုလည်း နှိမ်နင်းဖမ်းဆီးရန် ကြိုးပမ်းနေရာတွင် သံသယရှိသူ ၁၈၉ ယောက်ကို ဖမ်းဆီးထားကြောင်း သိရသည်။
မစ္စတာတော့ပ်သည် ဘန်ကောက်ရှိ ရှမ်း ၉၉၉ ဂိုဏ်းခေါင်းဆောင်ဖြစ်ကာ ဘန်ကောက်မှထွက်ပြေးပြီး ချင်းမိုင်တွင် အလုပ်အကိုင်ရှာဖွေနေစဉ် ချင်းမိုင်မှ ဂိုဏ်းစတား မစ္စတာ မုန်းနှင့် သိကြွမ်းရင်းနှီးကာ ဆယ်ကျော်သက် လူငယ်ဂိုဏ်းတစ်ခုမှ မစ္စတာမုန်းကို တိုက်ခိုက်ခဲ့သဖြင့် Line အပလီကေးရှင်း Group မှ ရန်သူများကို ရှာဖွေကာ လက်စားချေရန် လုပ်ဆောင်ခဲ့ခြင်းဖြစ်သည်ဟု စစ်ကြောရေး၌ ဝန်ခံထွက် ဆိုသွားခဲ့သည်။
သို့သော် မစ္စတာမုန်းဆိုသူပြောသော မိန်းကလေးကို ဓားဖြင့် လက်ကောက်ဝတ်အား လှီးခဲ့ရာတွင် သူလည်း မမြင်ဖူး၊ မသိဖူးသလို လူမှားပြီး လုပ်မိခဲ့ခြင်းသာဖြစ်သောကြောင့် ခံရသူဆယ်ကျော်သက်မိန်းကလေးအား တောင်းပန်သည်ဟုပင် မစ္စတာတော့ပ်က ထွက်ဆိုခဲ့သည်။
အမှုကျူးလွန်ပြီးနောက် ချာချိုအန်ဆာအိုခရိုင်မှတစ်ဆင့် ကမ္ဘောဒီးယားဘက် ထွက်ပြေးရန် ကြိုးစားရင်းမှ ဖမ်းဆီးရမိခဲ့ခြင်းဖြစ်သည်။
ထို့ကြောင့် ရဲတပ်ဖွဲ့က မစ္စတာတော့ပ်အား ဆိုးရွားစွာ ဒဏ်ရာရရှိစေမှု၊ လူသတ်ရန်ကြိုးစားမှု၊ လူမိုက်ဂိုဏ်းထူထောင်မှု၊ လူပေါင်း ၁၀ ဦးထက်မနည်းကို တိုက်ခိုက်အနိုင်ကျင့်ခဲ့မှု၊ အများပြည်သူ မငြိမ်မသက်ဖြစ်စေရန် ကျူးလွန်မှု၊ လူအများနှင့်သက်ဆိုင် သည့် မြို့၊ နယ်၊ ရွာများတွင် လက်နက်ကိုင်ဆောင်မှုများဖြင့် အမှုဖွင့်အရေးယူတော့မည်ဟု ထိုင်းရဲတပ်ဖွဲ့က ထုတ်ပြန်ခဲ့သည်။
Source – Guru Chiang Mai
ကိုကလင်း
#MeKongNews
#ချင်းမိုင်
#လူဆိုးဂိုဏ်း
#ရွှေ့ပြောင်းလုပ်သား
#ဂိုဏ်းစတား
