မဲခေါင်၊ စက်တင်ဘာ ၂၀
စက်တင်ဘာ ၁၈ ရက်က ပြင်သစ်နိုင်ငံတစ်ဝန်းလုံးအတိုင်းအတာဖြင့် လက်ရှိပြင်သစ်သမ္မတ မက်ခရွန်း လာမည့်နှစ်အတွက်ချမှတ်လိုက်သော ချိုးခြံခြွေတာသည့် ဘတ်ဂျက်ကြောင့် ပေါင် ၄၀ ဘီလီယံ လျှော့ချမှုကို မကျေနပ်သဖြင့် ဆန္ဒပြမှုများသည် အဓိကရုဏ်အသွင်ဆောင်ခဲ့ပြီး ဆန္ဒပြသူ ၁၅၀ ကျော် ဖမ်းဆီးခံခဲ့ရသည်။
Black Thursday ဟုအမည်ပေးထားသော တစ်နိုင်ငံလုံးအတိုင်းအတာဖြင့် အလုပ်သမား သမဂ္ဂများ၊ ကျောင်းသားများ၊ ပြည်သူများ၊ ပင်စင်စားများပါဝင်သည့် ချီတက်ဆန္ဒပြမှုကို ပဲရစ်မှသည် မာဆေး၊ လိုင်ယွန်မှသည် တူးလုစ်စသည့် မြို့ကြီးများအနှံ့ သပိတ်စစ်ကြောင်း ၂၅၀ ကျော် ချီတက်ဆန္ဒပြရာတွင် ရဲနှင့် လုံခြုံရေးတပ်ဖွဲ့များဖြင့် အဓိကရုဏ်းအသွင်ဆောင်ကာ မီးရှို့တိုက်ခိုက်မှုများဖြစ်ပွားပြီး အယောက် ၁၅၀ ကျော် တစ်နိုင်ငံလုံးအတိုင်းအတာဖြင့် ဖမ်းဆီးခံရခြင်းဖြစ်သည်။
ကျောင်းသားသမဂ္ဂမှ ကျောင်းဝင်ပေါက်များ ပိတ်ထားခြင်း၊ ရထားဝန်ကြီးဌာနဝန်ထမ်းများ ရုံးချုပ်သို့ ချီတက်ကာစုပေါင်း သပိတ်မှောက်မှု၊ ဆရာ၊ ဆရာမ ၃ ပုံ ၁ ပုံ ကျောင်းများမှ ထွက်ကာ ဆန္ဒပြမှု၌ ပါဝင်ခြင်းများကြောင့် ရဲတပ်ဖွဲ့ဝင် ၈၀၀၀၀၊ သံချပ်ကာ ၂၄ စီး၊ ရေအမြောက် ၁၀ စီးနှင့်ဒရုန်းများပါ သုံးပြီး လုံခြုံရေးတပ်ဖွဲ့များ အသည်းအသန် ထိန်းချုပ်ခဲ့ကြရသည်။
ပဲရစ်ရဲချုပ် လောရင်းနူနက်ဇ်က ဆန္ဒပြသူများထဲတွင် ပဲရစ်တစ်မြို့တည်း၌ မင်းမဲ့ဝါဒီ Black Bloc အဖွဲ့ဝင် ၁၀၀၀ ကျော်ပါဝင်ကာ ဖျက်လိုဖျက်ဆီးခြင်းများ လုပ်ဆောင်သဖြင့် ပျက်စီးဆုံးရှုံးမှုများရှိခဲ့သည်ဟု ဆိုသည်။
ပြင်သစ်ပြည်ထဲရေးဝန်ကြီးဌာနက မွန်လွဲပိုင်းထုတ်ပြန်မှုမှာပင် ၉၄ ဦးဖမ်းမိကာ ၁၅ ဦးမှာ ပဲရစ်မှဖြစ်ပြီး မီးရထားလမ်းနှင့်ကားလမ်းများပိတ်ဆို့ရန် နေရာ ၂၀ တွင် မီးရှို့မှုများ လုပ်ခဲ့သည်ဟု ဆိုကာ တစ်နေ့တာ ဖမ်းဆီးခံရသူပေါင်း ၁၅၀ ကျော်သွားခဲ့သည်ဟု ညဦးပိုင်း၌ ထုတ်ပြန်ခဲ့သည်။
ပြည်ထဲရေးဝန်ကြီးဘရူနိုရီတေလီယူက ယခု သန်းချီဆန္ဒပြမှုနှင့် အများပြည်သူဆိုင်ရာ မငြိမ်သက်မှုသည် ကြောက်စရာအဆင့်ရောက်နေသည်ဟုလည်း စိတ်ပူပန်ကြောင်း ထုတ်ပြန်ခဲ့သည်။
ပြင်သစ်နိုင်ငံသည် နိုင်ငံစုစုပေါင်းပြည်ထွင်းထုတ်ကုန်တန်ဖို့ GDP ၏ ၁၁၄ ရာခိုင်နှုန်းရှိသော ကြွေးမြီ ပေါင် ၃ ထရီလီယံ တင်ရှိနေသလို ပြီးခဲ့သည့်တစ်ပတ်က ပြင်သစ်ငွေကြေးတန်ဖိုးပါ ကျဆင်းနေသဖြင့် အကျပ်ရိုက်နေကာ သမ္မတအဆင့်က တစ်နှစ်လစာ ပေါင် ၄ သန်းယူနေချိန် အလုပ်လက်မဲ့များ၊ သက်ကြီးရွယ်အိုများ၊ မကျန်းမာသူများအတွက် ထိခိုက်မှုဆိုးရွားစေမည့် သက်သာချောင်ချိရေး ရန်ပုံငွေများကို လာမည့် ဘဏ္ဍာနှစ်၌ ဘတ်ဂျက် ပေါင် ၄၀ ဘီလီယံအထိ လျော့ချဖြတ်တောက်ရန် ဆုံးဖြတ်ခဲ့သဖြင့် ယခုလို တစ်နိုင်ငံလုံးအတိုင်းအတာဖြင့် လူထုအုံကြွမှုကြီး ဖြစ်ပေါ်လာရခြင်းဖြစ်သည်။
ကိုကလင်း
Ref:Thesun
#MeKongNews
#ပြင်သစ်
#ဆန္ဒပြ
#ဘတ်ဂျက်
#လူထုအုံကြွမှု
