မဲခေါင်၊ စက်တင်ဘာ ၁၅
လူမှုကွန်ရက် ၂၆ ခုကို ပိတ်ပင်ကြောင်း ဝန်ကြီးချုပ် အိုလီဦးဆောင်သော အစိုးရက ထုတ်ပြန်ကြေညာ အပြီး ပြီးခဲ့သည့်တစ်ပတ်အတွင်း နီပေါနိုင်ငံတစ်ဝန်း Gen Z များဦးဆောင်သည့် ဆန္ဒပြမှုများမှသည် အဓိကရုဏ်းများအသွင်ဆောင်ကာ အကြမ်းတမ်းဆုံး လူထုအုံကြွမှုနှင့်အတူ အိုလီအစိုးရ ပြုတ်ကျသွား ပြီးနောက် ထိုကာလအတွင်းသေဆုံးသူစာရင်းကို ထုတ်ပြန်ရာ အနည်းဆုံး ၇၂ ဦးရှိခဲ့သည်ဟု စက်တင်ဘာ ၁၄ ရက်နေ့က ထုတ်ပြန်သွားခဲ့သည်။
အစိုးရအဆောက်အအုံများ၊ နေအိမ်များနှင့်အခြားသော အဆောက်အအုံများအား မီးရှို့ဖျက်ဆီးမှုများ စွာရှိခဲ့ရာထိုအဆောက်အအုံများအတွင်း စစ်ဆေးရှာဖွေမှုများလုပ်ဆောင်ရာတွင် အလောင်းများထပ်မံ တွေ့ရှိသဖြင့် သေဆုံးသူစာရင်းသည် ၇၂ ယောက် ရှိလာသည်ဟု နီပေါ ကျန်းမာရေးဝန်ကြီးဌာနက ထုတ်ပြန်သွားခဲ့ခြင်းဖြစ်သည်။
ဆန္ဒပြပွဲတွင် လုံခြုံရေးတပ်များက လူငယ်များခေါင်းကို သေနတ်ဖြင့် ပစ်ခတ်ရာမှ သေဆုံးမှုများကြောင့် ဒေါသထွက်လာသော လူအုပ်ကြီးသည် အဆောက်အအုံများ၊ တရားရုံးချုပ်၊ လွှတ်တော်၊ ရဲစခန်း၊ နိုင်ငံရေးခေါင်းဆောင်များ၏ နေအိမ်များ၊ စီးပွားရေးအဆောက်အအုံနှင့် လုပ်ငန်းရုံးများကို မီးရှို့ဖျက်ဆီးကာ အကြမ်းဖက်မှုအသွင်ဆောင်လာခဲ့သည်။
ထပ်မံရှာတွေ့သည့်အလောင်းအများစုသည် ကုန်တိုက်များ၊ လူနေတိုက်ခန်းများမီးရှို့ဖျက်ဆီးခံရသည့် အထဲမှ တွေ့ရခြင်းဖြစ်သည်ဟုဆိုကာ ဒဏ်ရာရသူပေါင်းလည်း အနည်းဆုံး ၂၁၁၃ ဦးရှိသည်ဟု ကျန်းမာရေးဝန်ကြီးဌာနက ဆိုသည်။
နီပေါနိုင်ငံ၏ ပထမဆုံး အမျိုးသမီးဝန်ကြီးချုပ်အဖြစ် တင်မြှောက်ခံထားရသော ယာယီဝန်ကြီးချုပ် ဆူရှီလာကာကီက သေဆုံးသူများ၏ မိသားစုများအား နီပေါရူပီး ၁၀ သိန်းစီ နစ်နာကြေးပေးမည်ဖြစ်ကာ နိုင်ငံအတွက် မရှိမဖြစ် အဆောက်အအုံများအား မီးရှို့ဖျက်ဆီးသူများသည် ရှက်ဖွယ်ရာ အဖျက်အမှောင့်လုပ်ငန်းများလုပ်ဆောင်သူများဖြစ်သောကြောင့် စုံစမ်းဖော်ထုတ် အရေးယူသွားမည်ဟုလည်း စက်တင်ဘာ ၁၄ ရက်တွင် ထုတ်ပြန်သွားခဲ့သည်။
ကိုကလင်း
Ref: scroll
#MeKongNews
#နီပေါနိုင်ငံ
#ဆန္ဒပြပွဲ
#အမျိုးသမီးဝန်ကြီးချုပ်
#ဆူရှီလာကာကီ
