မဲခေါင်၊ စက်တင်ဘာ ၁၅
စက်တင်ဘာ ၁၀ ရက်တွင် ပိုလန်နိုင်ငံအတွင်း ရုရှား ဒရုန်း ၁၉ စင်းကျူးကျော်ဝင်ရောက်လာမှုအတွက် နေတိုးအဖွဲ့အား ပုဒ်မ ၁၄ ဖြင့် ခြိမ်းခြောက်မှုအတွက် အားလုံးပါဝင်သည့် အစည်းအဝေးကို ပိုလန်က ခေါ်ခဲ့ပြီး စက်တင်ဘာ ၁၃ ရက်တွင် ရုရှားဒရုန်း တစ်စင်းသည် ရိုမေးနီးယားနိုင်ငံအတွင်း ထပ်မံ ဝင်ရောက်လာပြီးနောက် နေတိုးတပ်ဖွဲ့ဝင်များကို ဥရောပ အရှေ့တံတိုင်းဟုခေါ်သော နယ်စပ်သို့ စေလွှတ်တပ်စွဲစေမည်ဖြစ်ကြောင်း ပိုလန်သမ္မတ ကာရိုးနော်ရော်ကီက ထုတ်ပြန်ပြောဆိုခဲ့သည်။
ပိုလန်အတွင်းသို့ ဝင်လာသည့် ဒရုန်း ၄ စီးကို နေတိုးဖိုက်တာဂျက်လေယာဉ်များက ပစ်ချခဲ့ကာ အုတ်အော်သောင်းနင်းဖြစ်ခဲ့ရသလို ရိုမေးနီးယားနယ်ထဲသို့ဝင်လာသည့်ဒရုန်းမှာမူ ဖိုက်တာ ဂျက်လေယာဉ် ၂ စီးလိုက်လံစောင့်ကြည့်နေစဉ်အတွင်း ရွာတစ်ရွာအနီး ပျောက်သွားခဲ့သည်။
ထိုအခြေအနေတွင် ယူကရိန်းသမ္မတ ဇီလန်းစကီးက ရုရှားသည် စစ်ရေးချဲ့တွင်လာပြီဖြစ်ကာ မှားယွင်းရောက် ရှိလာမှုမဟုတ်သောကြောင့် နေတိုးနှင့်အနောက်မဟာမိတ်အားလုံး ပိုလန်ရှေ့မှ ခါးစည်းခံနေသော ယူကရိန်းအား အပြည့်အ၀ထောက်ပံ့သလို ရုရှားအား ထိရောက်ပြီး စစ်ရပ်တန့်သွားစေမည့် စုပေါင်း အရေးယူမှုမျိုး လုပ်ဆောင်ရတော့မည်ဟု တိုက်တွန်းပြောကြားခဲ့သည်။
ထိုအခြေအနေကြောင့် နေတိုးတပ်ဖွဲ့ဝင်များသည် အရှေ့ခြမ်း ကင်းစခန်း စစ်ဆင်ရေးတစ်စိတ်တစ်ပိုင်း အဖြစ် ဥရောပသို့ ရုရှားဝင်လာပါက ပထမဆုံး ဖြတ်ကျော်ရမည့် ပိုလန်အရှေ့ပိုင်းသို့ တပ်များစေလွှတ် တပ်စွဲစေတော့မည်ဖြစ်ကြောင်း ပိုလန်သမ္မတ နော်ရော်ကီက စက်တင်ဘာ ၁၅ ရက်တွင် ထုတ်ပြန်ခဲ့ခြင်း ဖြစ်သည်။
ကုလသမဂ္ဂလုံခြုံရေးကောင်စီအစည်းအဝေးတွင်လည်း ယူကရိန်း သံအမတ်ကြီး အန်ဒရီးမယ်လ်နစ်ခ် က ပိုလန်နှင့် ရိုမေးနီးယားကိုပင် လေပိုင်နက်ကျူးကျော်ကာ ရုရှားသည် တတိယကမ္ဘာစစ်စတင်ရန် မီးရှို့နေပြီဖြစ်သော်လည်း ထိုစစ်ပွဲကြီးအား ငေးမောနေကာ လက်မချင်းပွတ်၊ ဘုရားသခင်အလာအား စောင့်နေပါက မည်သည့်အခါမှ ရောက်မလာနိုင်ဘဲ ပူတင်၏ ဒုံးကျည်များသည် ဘာလင်၊ ပဲရစ်၊ လန်ဒန် မြို့ကြီးများပေါ် ကျရောက်ကာ ကမ္ဘာမီးလောင်ရုံသာရှိမည်ဟု သတိပေးပြောကြားသွားခဲ့သည်။
ကိုကလင်း
Ref:Thesun
#MeKongNews
#ဥရောပ
#ရုရှား
#ဗြိတိန်
#ပိုလန်
#ယူကရိန်း
