မဲခေါင်၊ စက်တင်ဘာ ၁၀
စက်တင်ဘာ ၉ ရက် ဒေသစံတော်ချိန် နံနက် ၁၁ နာရီဝန်းကျင်တွင် ယူကရိန်းနိုင်ငံ ဒိုးနက်စ်ဒေသရှိ လူဦးရေ ၁၇၀၀ သာ မှီတင်းနေထိုင်သော ယာရိုဗာရွာသို့ ရုရှားဘက်မှ ဂလိုက်ဒ်ဗုံးကြဲတိုက်ခိုက်သဖြင့် ပင်စင်ထုတ်ရန် တန်းစီနေသော အဘိုးအဘွားများစွာ သေဆုံး၊ ဒဏ်ရာရခဲ့သည်။
အနည်းဆုံး သေဆုံးသူ ၂၄ ဦးအနက် တစ်ဦးမှလွဲပြီး ကျန်သူများမှာ ကားဖြင့် ပင်စင်လစာ လာပေးသည်ကို တန်းစီစောင့်ဆိုင်းနေခဲ့သည့် သက်ကြီးရွယ်အို ပင်စင်စားများဖြစ်ကြောင်းနှင့် နောက်ထပ် အနည်းဆုံး ၁၉ ဦး ဒဏ်ရာရရှိခဲ့သည်။
ယာရိုဗာရွာသည် ၂၀၂၂ ခုနှစ်က ရုရှားတပ်များ သိမ်းပိုက်ခြင်းခံခဲ့ရကာ ထိုနှစ်ဆောင်းနှောင်းပိုင်းမှာပင် ယူကရိန်းတပ်များက ပြန်လည်သိမ်းပိုက်နိုင်ခဲ့သော နယ်မြေဖြစ်ကာ လက်ရှိ ရုရှားတပ်များ စစ်ကြောင်းပြန်လည် ထိုးဝင်လာမှု အနီးကပ်အနေအထားသို့ ရောက်ရှိလာသဖြင့် ရွှေ့ပြောင်းနေထိုင်ကြရန် ဒေသဆိုင်ရာ ယူကရိန်းအာဏာပိုင်များက သတိပေးချက်ထုတ်ပြန်ထားသည်။
ထို့ကြောင့် ကားဖြင့်လာရောက်ထုတ်ပေးသည့် ပင်စင်လစာများကို အဘိုးအဘွားများ သွားရောက်တန်းစီရယူနေသည်ကို ရုရှားဘက်မှ သတင်းရပြီး ရည်ရွယ်ချက်ရှိစွာဖြင့် စစ်ရေးထက် အကြမ်းဖက်မှုကို လုပ်ဆောင်လိုက်ခြင်းသာဖြစ်သည်ဟု ဒိုးနက်စ်ရှိ ယူကရိန်းစစ်ရေးစီမံခန့်ခွဲရေး တပ်ချုပ် ဗာလီယံဖီလက်ရှ်ကင်က ဝေဖန်ပြောဆိုခဲ့သည်။
စက်တင်ဘာ ၆ ရက်ကလည်း ကိဗ်မြို့ပေါ်သို့ ဒရုန်း ၈၁၀ ကျော်၊ ဒုံးကျည် ၁၃ လုံးဖြင့် ရုရှားတိုက်ခိုက်ကာ ကလေးတစ်ဦး အပါ ၄ ဦး သေဆုံးခဲ့ရသည်။
နေ့စဉ်ရက်ဆက် ယူကရိန်းပြည်သူများစွာအသက်ကို နုတ်ယူနေသော ပူတင်ကြောင့် စစ်ပွဲကိုတားဆီးနိုင်ရေး အမေရိကန်သမ္မတ ဒေါ်နယ်ထရမ့်က ဥရောပ နိုင်ငံခေါင်းဆောင်များအား လာမည့်သီတင်းပတ်ကုန်၌ အိမ်ဖြူတော်သို့ ဖိတ်ခေါ်ထားပြီး ရုရှားကို မိမိဘက်မှ ငြိမ်းချမ်းရေးဆွေးနွေးမှုမလုပ်သဖြင့် ဒုတိယအဆင့် ပိတ်ဆို့အရေးယူမှု လုပ်သွားမည်ဟု ကြေညာခဲ့သည်။
ယူကရိန်းသမ္မတ ဇီလန်းစကီးကလည်း ကမ္ဘာ့ခေါင်းဆောင်များသည် ရုရှား၏ အကြမ်းဖက်လူသတ်နေမှုများအား သိရှိပါလျှက် ပိတ်ဆို့အရေးယူခြင်းပင် မလုပ်ဘဲ ထိရောက်သည့် တုံ့ပြန်မှုကို ကမ္ဘာက မလုပ်ပါက ရပ်တန့်နိုင်တော့မည်မဟုတ်ဟု ဝေဖန်ပြစ်တင်သွားခဲ့သည်။
ကိုကလင်း
Ref:Thesun
#MeKongNews
#ယူကရိန်း
#ပင်စင်စား
#ရုရှား
#ဗုံးကြဲ
