မဲခေါင်၊ စက်တင်ဘာ ၃
ဘမ်ဂျိုင်းထိုင်းပါတီ – BJT သည် လွှတ်တော်တွင်း အမတ်နေရာများစွာ ပိုင်ဆိုင်ထားသည့် ပြည်သူ့ပါတီနှင့် မဟာမိတ်အဖြစ် MOU လက်မှတ်ရေးထိုးပြီးနောက် အစိုးရသစ်ဖွဲ့စည်းရန် လိုအပ်သည့် ၁၄၆ မဲရရှိကာ ဘမ်ဂျိုင်းထိုင်းပါတီခေါင်းဆောင် အနူတင်ချန်ဗီရာကယ်ကို နိုင်ငံ၏ ၃၂ ဆက်မြောက် ဝန်ကြီးချုပ်အဖြစ် တင်မြှောက်ရန် သဘောတူညီခဲ့ကြောင်း စက်တင်ဘာ ၃ ရက်တွင် အတည်ပြုထုတ်ပြန်သွားခဲ့သည်။
ပြည်သူ့ပါတီသည် ယခင် မဲအများဆုံးဖြင့်အနိုင်ရခဲ့သော Move Forward Part ဖျက်သိမ်းခံရပြီးနောက် အသစ်ပြန်လည် ထူထောင်ခဲ့သောပါတီဖြစ်ကာ လက်ရှိပါတီခေါင်းဆောင် နက်သာပေါင်က လွှတ်တော် အတွင်း ဘမ်ဂျိုင်းထိုင်းပါတီနှင့် မဟာမိတ်ဖွဲ့ရန် အချက် ၅ ချက်ပါ MOU စာချုပ် လက်မှတ်ရေးထိုး လိုက်ခြင်းဖြစ်သည်။
ပြီးခဲ့သည့်ရက်ပိုင်းက ထိုင်းဖွဲ့စည်းပုံအခြေခံဥပဒေခုံရုံးသည် ကမ္ဘောဒီးယားခေါင်းဆောင်ဟွမ်ဆန်နှင့် သီးသန့်စကားပြောဆိုမှု အသံဖိုင်ပေါက်ကြားမှုအကြောင်းပြချက်ကြောင့် ဖွေထိုင်းပါတီမှ တင်မြှောက် ထားသည့် ပေထောင်တန်ကို ဝန်ကြီးချုပ်ရာထူးမှ ဖယ်ရှားခဲ့သလို အစိုးရတစ်ဖွဲ့လုံးလည်း ဖယ်ရှားခံရ ပြီဖြစ်ခြင်းကြောင့် အစိုးရသစ်ဖွဲ့စည်းနိုင်ရေး အင်အားကြီး ပြည်သူ့ပါတီနှင့် မဟာမိတ်ဖွဲ့ရန် အပြိုင်အဆိုင်ကြိုးစားခဲ့ကြခြင်းဖြစ်သည်။
ပြည်သူ့ပါတီမှာ ယခင်ဖွေထိုင်းပါတီ ဦးဆောင်သော အစိုးရ ဖွဲ့စည်းမှုတွင် ဖယ်ကြဉ်ခံခဲ့ရသဖြင့် အနူတင်ဦးဆောင်သော ဘမ်ဂျိုင်းထိုင်းပါတီနှင့်သာ ပူးပေါင်းလိုက် ခြင်းဖြစ်ကာ ဖွဲ့စည်းပုံအခြေခံဥပဒေ အပိုဒ်ခွဲ ၂၅၆ အရ ၄ လအတွင်း လွှတ်တော်ကိုဖျက်သိမ်းပြီး ဝန်ကြီးချုပ်သစ်တင်မြှောက်ခြင်းနှင့် အစိုးရအဖွဲ့ ပြန်လည်ဖွဲ့စည်းရတော့မည်ဖြစ်သည်။
ဝန်ကြီးချုပ်သစ်ကသာ လွှတ်တော်ဖျက်သိမ်းခွင့်ရှိခြင်းကြောင့် အနူတင်ကို ဝန်ကြီးချုပ်အဖြစ် တင်မြှောက်နိုင်ရေး ပြည်သူ့ပါတီက ထောက်ခံလက်မှတ်ထိုးလိုက်သော်လည်း မိမိတို့ပါတီမှ မည်သည့် ဝန်ကြီးနေရာမှ မရယူဘဲ အတိုက်အခံပါတီအဖြစ်နှင့်သာ အစိုးရသစ်ကို စောင့်ကြည့် ထောက်ပြသွားမည်ဖြစ်ကြောင်း နက်သာပေါင်က ထုတ်ပြန်ပြောဆိုခဲ့သည်။
တစ်ပြိုင်တည်းမှာပင် လက်ရှိယာယီဝန်ကြီးချုပ်ခန့်အပ်ထားသော ဖွေထိုင်းပါတီမှ ဖမ်သမ်ဝီချာရာချိုင် က ၎င်းတို့ဖွေထိုင်းပါတီနှင့် ပြည်သူ့ပါတီမပူးပေါင်းဘဲ တစ်ချိန်က သက်ဆင် ဝန်ကြီးချုပ်ဖြစ်စဉ် လက်အောက်ငယ်သားဖြစ်ခဲ့သော အနူတင်ကို ဝန်ကြီးချုပ်တင်မြှောက်ရန် စီစဉ်လာမှုအား ကန့်ကွက် ကာ ချက်ချင်းလွှတ်တော်ဖျက်သိမ်းရန် ဘုရင်ထံသို့ တင်ပြထားကြောင်းလည်း သိရသည်။
ကိုကလင်း
Ref: Khaosod
#MeKongNews
#ထိုင်းနိုင်ငံ
#နိုင်ငံရေး
#ဝန်ကြီးချုပ်
#အောက်လွှတ်တော်
