မဲခေါင်၊ ဩဂုတ် ၁၂
ဩဂုတ် ၁၅ ရက်တွင် အလက်စကားပြည်နယ်၌ နှစ်ဦးသားတွေ့ဆုံရန် သဘောတူညီမှုရထားပြီးရာ ပူတင်နှင့် ၂ မိနစ်သာစကားပြောပြီးသည်နှင့် ယူကရိန်းငြိမ်းချမ်းရေးကို ပူတင်လိုချင်၊ မလိုချင် သိရမည်ဟု အိမ်ဖြူတော်၌ သတင်းသမားများနှင့်တွေ့ဆုံမှုတွင် ဒေါ်နယ်ထရမ့်က ထုတ်ပြန်ပြောဆိုခဲ့သည်။
တွေ့ဆုံမှုတွင် ယူကရိန်းသမ္မတ ဇီလန်းစကီးမပါဝင်ဘဲ အမေရိကန်က ကြားခံလူအဖြစ် ပူတင် အား ရုရှား-ယူကရိန်း ငြိမ်းချမ်းရေးရရေး အဆိုများကို တင်သွင်းပြီး မိမိဘက်မှ ပူတင်အား စစ်မီး စမွှေးသူက ရှိနေပြီး စစ်ပွဲကို ရပ်တန့်ရမည်ဟု အမိန့်ပေးပြောဆိုမည်ဖြစ်ကြောင်း မီဒီယာများအား ပြောသွားခဲ့သည်။
ယခုတွေ့ဆုံမှုမှာ ၂၀၁၉ ဇွန်လနောက်ပိုင်း ပူတင်နှင့် ဒေါ်နယ်ထရမ့်တို့ ပထမဆုံး တွေ့ဆုံမှုဖြစ်သော် လည်း ကာယကံရှင် ယူကရိန်းသမ္မတ ဇီလန်းစကီးက မိမိတို့မပါဘဲ ပူတင်နှင့်ထရမ့်တို့ ငြိမ်းချမ်းရေး သဘောတူညီမှုလုပ်ခဲ့လျှင်လည်း ငြိမ်းချမ်းရေးကို ဆန့်ကျင်ရာသာရောက်မည်ဖြစ်ကြောင်းနှင့် မည်သည့်ရလဒ်မျှ ရစရာအကြောင်းမရှိဟု ရဲရဲတောက် စိန်ခေါ်ပြောဆိုသွားခဲ့သည်။
သို့သော် ဒေါ်နယ်ထရမ့်က ဩဂုတ် ၁၅ တွေ့ဆုံမှုတွင် ဇီလန်းစကီးပါဝင်ကောင်း ပါဝင်လာနိုင်သည်ကို မငြင်းဆိုဘဲ ညှိနှိုင်းနေဆဲဖြစ်သည်ဟု အိမ်ဖြူတော်အတွင်းသတင်းများက ဆိုသည်။
သို့သော် ထရမ့်က ဇီလန်းစကီးသည် ၃ နှစ်ခွဲအတွင်း အစည်းအဝေးပေါင်းများစွာလုပ်နေခဲ့ရသော်လည်း ဘာမှ ဖြစ်မလာစေနိုင်ခဲ့ဟုဆိုကာ ပူတင်နှင့် မျက်နှာချင်းဆိုင်တွေ့ဆုံမှုသည် မလွဲမသွေရှိလာမည်ဖြစ်သော် လည်း အချိန်ကို မသိနိုင်သေးဟု ပြောသွားခဲ့သည်။
ပူတင်နှင့်ကာလရှည်မဟာမိတ်လုပ်ခဲ့သော ဒီမီထရီကိုဇက်ကမူ ပူတင်သည် လက်ရှိအချိန်တွင် ယူကရိန်းနှင့်ငြိမ်းချမ်းရေးယူချင်နေပြီဖြစ်သည်ဟု နယူးယောက်တိုင်းမ်သို့ ပြောသွားခဲ့သည်။
ဒေါ်နယ်ထရမ့်ကမူ “ ကျွန်တော် ပူတင်နဲ့ လာမယ့်တွေ့ဆုံမှုမှာ ၂ မိနစ်ပဲ စကားပြောပြီးတာနဲ့ သူ ငြိမ်းချမ်းရေးတကယ်လိုချင်တာ ဟုတ်မဟုတ် သိရမှာပါ။ သူနဲ့ကျွန်တော် ဖုန်းတွေအများကြီး ပြောပြီးတိုင်း ယူကရိန်းထဲ ဒုံးကျည်တွေ ပစ်ခတ်တိုက်ခိုက်မှုပိုလုပ်တာကို ကျွန်တော်လည်း တော်တော် စိတ်မကောင်းဖြစ်ရတယ်” ဟု ပြောသွားခဲ့သည်။
ကိုကလင်း
Ref:Thesun
#MeKongNews
#ပူတင်
#ဒေါ်နယ်ထရမ့်
#ရုရှား
#ယူကရိန်း
#ငြိမ်းချမ်းရေး
