မဲခေါင်၊ ဩဂုတ် ၁၂
ဘန်ကောက်ရှိ အနုပညာနှင့်ယဉ်ကျေးမှုစင်တာ (BACC) ၌ ပြသထားသော အနုပညာကားချပ်များကို တရုတ်သံရုံးမှ ဖိအားပေးပြီး လာရောက်ဆင်ဆာဖြတ်ခြင်း၊ ဖယ်ရှားခြင်းများပြုလုပ်သည့်အတွက် ထိုင်းနာမည်ကြီးဂျာနယ်လစ် ပရာဗစ်ရိုဂျန်နာဖရက်ခ်က ထိုင်းနိုင်ငံ၏ အနုပညာလွတ်လပ်မှုကို ပြည်ပ အစိုးရက လာရောက်စွက်ဖက်ခြင်းဖြစ်သလို ထိုင်းကို တရုတ်မောင်းနှင်သည့် ယာဉ်အဖြစ် မမြင်ချင်ကြောင်း ဝေဖန်ရေးသားသွားခဲ့သည်။
နိုင်ငံရေးကြောင့် ထွက်ပြေးခိုလှုံကြသော နိုင်ငံအသီးသီးမှ အနုပညာသမား အများစု ပါဝင်တင်ဆက်သော အနုပညာကားချပ်များကို BACC တွင် ပုံမှန် ပြပွဲကျင်းပပေးနေရာ မြန်မာ၊ အီရန်၊ ရုရှား၊ ဆီးရီးယားတို့မှ တိမ်းရှောင်ရသူအနုပညာရှင်များ ပုံမှန်အားဖြင့် ၎င်းတို့နိုင်ငံ သံတမန်ရေး၊ စီပွားရေး၊ စစ်ရေးနှိမ့်ကွပ်မှုများအပေါ် အမြင်များ ဖလှယ်ကာ အနုပညာရပ်များအဖြစ် ဖန်တီးကာ ပွဲသွင်းပြသကြခြင်းဖြစ်သည်။
လက်ရှိပြပွဲကို စတင်ဖွင့်လှစ်ပြီး ၂ ရက်အကြာ ၂၀၂၅ ဇူလိုင် ၂၆ ရက်တွင် ၈ လွှာရှိ ပြပွဲခန်းမသို့ တရုတ်သံရုံးမှလူများနှင့် ဘန်ကောက်မြို့ပြအုပ်ချုပ်ရေးအဖွဲ့ဝင်များ ဝင်ရောက်လာပြီး ဝီဂါ၊ ဟောင်ကောင်၊ တိဗက်၊ မြန်မာ အရေးများ၌ တရုတ်၏ ကြီးစိုးခြယ်လှယ်နေပုံ ဖော်ကျူးသော အနုပညာ ကားချပ်များအား တိတ်အမည်းဖြင့် စာလုံးများ၊ ပုံများ၊ ရှီကျင်းဖျင်ပုံများကို လိုက်ပိတ်ခြင်း၊ တချို့သော ပန်းချီကားများကို လုံး၀ ဖြုတ်ချခြင်းများ ပြုလုပ်ခဲ့သည်။
ထိုအထဲ မြန်မာပြည်သူများကို သတ်ဖြတ်နေသော စစ်ကောင်စီအား ရှီကျင်းဖျင်က လက်နက်များရောင်းချပေးနေခြင်း၊ ဂါဇာတွင် စစ်တိုက်နေသော အစ္စရေးအား လက်နက်များရောင်းချနေခြင်းဖော်ပြသည့် အနုပညာကားချပ်လည်း ပါဝင်ခဲ့သည်။
ပြပွဲအား ပူးတွဲထူထောင်သူ မြန်မာမှ ရှောင်ပြေးလာသူ အနုပညာရှင် ကိုစိုင်း ဆိုသူအား ထိုင်းဂျာနယ်လစ် ပရာဗစ်က ဆက်သွယ်မေးမြန်းရာတွင် ကိုစိုင်းသည် ထိုင်းရဲများ ရှာဖွေမှုခံနေရသဖြင့် ထိုင်းတွင်ပင် မနေထိုင်တော့ဘဲ တရုတ်၏ ကမ္ဘာချီ အနိုင်ကျင့်နေမှုဖြစ်သည်ဟု ပြောဆိုကြောင်း၊ တရုတ်၏ လုပ်ရပ်ကို BACC တာဝန်ရှိသူများ မကျေနပ်သော်လည်း ထိုင်းအစိုးရနှင့် သံတမန်နည်းလမ်းအရ ဖိအားပေးပြီး မြို့တော်အာဏာပိုင်များကိုပါ ဖိအားပေးစေခိုင်းသည့်အတွက် မလွန်ဆန်နိုင်ခဲ့ကြောင်း ပြောဆိုထားသည်။
BACC အနေဖြင့် ထိုင်းနိုင်ငံအတွင်း လွတ်လပ်စွာ အနုပညာဖော်ထုတ်ပြသမှုများ လုပ်ဆောင်သည်ကို တရုတ်မှ ဆင်ဆာဖြတ်၊ ဖြုတ်ပယ်ခြင်းများပြုနေမှုအား လူသိရှင်ကြား ကန့်ကွက်ကြောင်း စာထုတ်သင့်ကြောင်း၊ ထိုင်းသည် တရုတ်မောင်းနှင်နေသော ယာဉ်မဖြစ်စေချင်ကြောင်း၊ ဘန်ကောက်သည် လွတ်လပ်စွာဖော်ထုတ်ခွင့်အတွက် စံပြနေရာဖြစ်ခြင်းကို လာရောက် ပိတ်ပင်နေမှုက ထိုင်းသည် တရုတ်ဩဇာခံနေရသည့်အသွင်ရောက်ကြောင်း Khaosod မီဒီယာတွင် ဆောင်းပါးရေးသား ဝေဖန်သွားခဲ့သည်။
ပရာဗစ်က ကိုစိုင်းနှင့် အင်တာဗျူးစဉ် တရုတ်၏ ထိုင်းနှင့် မြန်မာနိုင်ငံအပေါ် ရှုပ်ထွေးစေသည့် ဆက်ဆံမှု အနေအထားအား မေးမြန်စဉ် ကိုစိုင်းက “ဒီကနေ့ မြန်မာနိုင်ငံဟာ တိဗက်မှာ ဆယ်စုနှစ်ချီ ဖြစ်နေတဲ့ အနေအထားအတိုင်းဖြစ်နေပါပြီ။ တရုတ်ကွန်မြူနစ်ပါတီရဲ့ နက်နက်နဲနဲ ချုပ်ကိုင်မှုကို ခံနေရတယ်။ တပါးတိုင်းပြည်အတွင်းရေးကို သူတို့က ကြီးမားစွာ ထိန်းချုပ်နေတယ်။ ၂၀၂၅ ခုနှစ်အတွင်း လားရှိုးဖြစ်စဉ်ကိုကြည့်ရင်ပဲ မြင်သာပါတယ်” ဟု ဖြေကြားခဲ့သည်။
ကိုကလင်း
Ref:Khaosod
#MeKongNews
#တရုတ်နိုင်ငံ
#ဩဇာလွှမ်းမိုး
#ထိုင်းနိုင်ငံ
#အနုပညာ
