မဲခေါင်၊ ဩဂုတ် ၄
ထိုင်းနိုင်ငံ ရတ်ချာဘူရီခရိုင်ရှိ မြန်မာဇနီးမောင်နှံအား မျက်နှာဖုံးစွပ်များဝတ်ထားပြီး ရက်စက်ကြမ်းကြုတ်စွာ ရိုက်နှက်ခဲ့သူ ၄ ဦးကို စုံစမ်းဖော်ထုတ်သွားမည်ဟု ဖိုတာရမ် ရဲစခန်းမှ ထုတ်ပြန်သွားခဲ့သည်။
ဒါဝင်း (Da Win) ဆိုသည့် ၃၁ နှစ်အရွယ် မြန်မာအမျိုးသမီးနှင့် ခင်ပွန်းဖြစ်သူတို့သည် ဇူလိုင် ၂၉ ရက် ညက ညဆိုင်းအလုပ်ဆင်းရန် နေထိုင်ရာလိုင်းခန်းလမ်းသွယ်မှ မထွက်မီ ဦးထုပ်များဆောင်ထားပြီး မျက်နှာဖုံးစွပ်ထားသူ ၄ ဦးက ဆိုင်ကယ်ပေါ်မှ ဒရွတ်တိုက်ဆွဲချကာ ဒါဝင်းကို ထိုးကြိတ်ရိုက်နှက်သလို ခင်ပွန်းဖြစ်သူကိုလည်း သစ်သားတုတ်၊ သံလက်သီးများဖြင့် ပြင်းထန်စွာ ဒဏ်ရာရစေသည်အထိ ရက်စက်စွာထိုးကြိတ်ခဲ့ကြောင်း၊ ဒါဝင်းသည် ဦးခေါင်းရှေ့ပိုင်း ဒဏ်ရာများရသလို ပါးရိုးကျိုးခြင်း၊ ခန္ဓာကိုယ်အနှံ့ ပွန်းပဲ့ယောင်ရမ်းခြင်း၊ နံရိုးများနာကျင်ခြင်းနှင့် ခေါင်းကိုက်ခြင်းများကြောင့် ဆေးရုံတင်ခဲ့ရသလို ခင်ပွန်းသည်လည်း ခြေ၊ လက်၊ ခန္ဓာကိုယ်များတွင် ဒဏ်ရာများ ပြင်းထန်စွာရရှိခဲ့သည်။
ဘန်ခေါင်းခရိုင်ခွဲ ဖိုတာရမ်ရဲစခန်းသို့ ဒါဝင်းက အမှုဖွင့်ခဲ့ကာ ရွာသူကြီးဦးဆောင်မှုနှင့် ကရင်စကားပြန်မှ ကြားဝင်မေးမြန်းမှုအရ ဒါဝင်းတို့ ဇနီးမောင်နှံသည် ယင်းနေရပ်တွင် ၆ နှစ်ကြာ နေထိုင်ခဲ့ကာ မည်သူနှင့်မျှ ပြဿနာမရှိခဲ့ကြောင်း၊ မည်သည့်စကားမှ မပြောဘဲ ရိုက်နှက်နှိပ်စက်စဉ် ထိုင်းရိုးရာ အစဉ်အလာလက်ဟန်အမူအယာဖြင့် တောင်းပန်နေသည့်ကြားမှ ရက်စက်စွာ ရိုက်နှက်နှိပ်စက်မှု၌ မည်သည့်အကြောင်းကြောင့် ဆိုသည်ကို သိချင်ကြောင်း၊ တိုက်ခိုက်လာသူများသည်လည်း မြန်မာများ ဖြစ်နိုင်သည်ဟု ယူဆမိကြောင်း ထွက်ဆိုခဲ့သည်ဟု ဆိုသည်။
ဒါဝင်းက ၆ နှစ်အတွင်း ပြဿနာမရှိခဲ့သော်လည်း ပြီးခဲ့သည့် လအနည်းငယ်က အိမ်နီးနားချင်းတစ်ဦးနှင့် ကားပါကင်ကိစ္စ စကားများကာ ကိုယ်ထိလက်ရောက် ကျူးလွန်ခံမှုတစ်ခု ရှိခဲ့ဖူးသည်ဟု ဆိုခဲ့ရာ ထိုနေအိမ်ရှိ အမျိုးသားအား စစ်ဆေးရာတွင် အခင်းမဖြစ်မီ ၅ မိနစ်နှင့် ၁၀ မိနစ် ဝန်းကျင်ကတည်းက အလုပ်သွားနှင့်ပြီးနေသည်ဟု ထွက်ဆိုခဲ့ကြောင်း၊ ထိုမျှ ထိုင်းထုံးတမ်းအစဉ်အလာအရ တိုးလျှိုးတောင်းပန်နေသည့် လင်မယားအား ယခုလို မပြောမဆို ရက်စက်စွာ တိုက်ခိုက်ကြသူများသည် နောင်တွင်လည်း မည်သူ့ကိုမဆို ရန်ပြုနိုင်သည့် အန္တရာယ်ရှိသောကြောင့် မဖြစ်မနေ စုံစမ်းဖော်ထုတ်သွားရမည်ဟု ဖိုတာရမ် ရဲစခန်းမှူးက မီဒီယာများအား ရှင်းလင်းထုတ်ပြန် ကတိပေးသွားခဲ့သည်။
ကိုကလင်း
Ref: Khaosod
#MeKongNews
#ထိုင်းနိုင်ငံ
#မြန်မာလုပ်သား
#ရိုက်နှက်
#ရတ်ချာဘူရီခရိုင်
