မဲခေါင်၊ ဇူလိုင် ၂၂
အမေရိကန်သမ္မတ ဒေါ်နယ်ထရမ့်သည် ယူကရိန်းသမ္မတ ဇီလန်းစကီးအား ပက်ထရိယော့ဒုံးကျည်များပေးအပ်စဉ် ရုရှားတို့ စစ်ပွဲ၏ နာကျင်မှုကို ခံစားချိန်တန်ပြီဟု ပြောဆိုခဲ့ပြီး ယင်းနောက် ယူကရိန်းသည် ရုရှားမြို့တော် မော်စကိုအပါအဝင် မြို့များကို ၄ ရက်ဆက်တိုက် ဒရုန်းများစွာဖြင့် တိုက်ခိုက်ခဲ့သည်။
ဇူလိုင် ၂၀ ရက်တွင် မော်စကိုမြို့ ကရင်မလင်နန်းတော်နှင့် ၂၃ မိုင်အကွာရှိ ဇီလီနိုဂရက်အရပ်သို့ ယူကရိန်းဒရုန်းများ ဆက်တိုက်ကျရောက်ပြီး ရုရှားလေကြောင်းရန်ကာကွယ်ရေးစနစ်မှ ဖျက်ချသော်လည်း ဒရုန်းအပျက်အစီးများ မီးလောင်ကျရောက်သဖြင့် အဆောက်အအုံများပျက်ဆီးခြင်း၊ ကားများမီးလောင်းခြင်းများ ဖြစ်ပွားခဲ့ကြောင်း ဒေသတွင်း ရုပ်သံမှတ်တမ်းများအရ သိရှိရသည်။
ယူကရိန်းသမ္မတ ဇီလန်းစကီးက နှစ်နိုင်ငံ အပစ်အခတ်ရပ်စဲရေးအတွက် လုပ်သင့်သည်အားလုံးကို လုပ်ဆောင်သွားမည်ဖြစ်ကာ ဂျီနီဗာကွန်ဗန်းရှင်းစည်းမျဉ်းကိုမူ မဖောက်ဖျက်ဘဲ စစ်ရေးပစ်မှတ်များကိုသာ ဦးတည်ပစ်ခတ်သည်ဟု ထုတ်ပြန်ခဲ့သော်လည်း ယူကရိန်းဒရုန်းများသည် မြို့တော် အရပ်သား ပစ်မှတ်များဆီသို့ ကျရောက်သလို မော်စကိုရှိ Sheremetyevo၊ Domodedovo၊ Vnukovo နှင့် Zhukovsky လေဆိပ်များအနီး ပျံသန်းကရောက်သဖြင့် လေယာဉ်ကွင်း ၄ ခုကို နှစ်ကြိမ်တိုင် လေကြောင်း ပိတ်ပင်မှု လုပ်ခဲ့ရသဖြင့် အားလပ်ရက် ခရီးသွားပြည်သူများစွာ လေယာဉ်ကွင်း ကြမ်းပြင် များပေါ်တွင် အိပ်ကာ စောင့်ဆိုင်းနေခြင်းဖြင့် ရုရှား၏ လေကြောင်း ခရီးသွားလုပ်ငန်း များစွာ အနှောင့် အယှက်ဖြစ်ခဲ့ရသည်။
စုစုပေါင်း လေယာဉ် ၁၃၄ စီးသည် လမ်းကြောင်းပြောင်းကာ မော်စကိုလေဆိပ်များသို့ ဆိုက်ကပ်ရန် အခက်ကြုံခဲ့ကြောင်းလည်း သိရသည်။
ရုရှားကာကွယ်ရေးဝန်ကြီးဌာနက ယူကရိန်းဘက်မှ ဇူလိုင် ၂၀ ရက်၌ ဒေသ ၉ ခုသို့ ဒရုန်းများစွာဖြင့် ပစ်ခတ်ခဲ့ရာတွင် ၉၃ လုံးကို ပစ်ချနိုင်ပြီး မော်စကို တစ်မြို့တည်းပေါ်သို့ ကျရောက်လာသည့် ဒရုန်း ၁၉ စင်းကို ဖျက်ချခဲ့သည်ဟု ထုတ်ပြန်ခဲ့သည်။
ယူကရိန်းဘက်မှ မော်စကိုအထိ တိုက်ခိုက်မှုများ ပြုလုပ်နေ ချိန် ရုရှားတွင် ပူတင်ဆန့်ကျင်ရေး လက်နက်ကိုင်အဖွဲ့ Atesh ကလည်း ရုရှားတပ်အတွက် လက်နက်များ ထောက်ပို့ရာတွင် အရေးအပါဆုံး တူလာဒေသရှိ ရထားလမ်းများကို ဖောက်ခွဲဖျက်ဆီးမှုများလည်း လုပ်ဆောင်ခဲ့သည်။
ကိုကလင်း
Ref: Thesun
#MeKongNews
#ရုရှား
#ယူကရိန်း
#ဒေါ်နယ်ထရမ့်
#ပူတင်
