မဲခေါင်၊ ဇူလိုင် ၁၈
ထိုင်းနိုင်ငံရောက် မြန်မာနိုင်ငံသားများ၏ လစာ ၂၅ ရာခိုင်နှုန်းကို ကောက်ခံရန် စစ်ကောင်စီက ခွင့်ပြုပေးခဲ့သည့် 2C2P plus (Myanmar) သည် လူမွဲစာရင်းခံယူကာ အပြီးသတ်ဖျက်သိမ်းတော့မည်ဖြစ်ကြောင်း ထုတ်ပြန်ချက်များအရ သိရသည်။
စစ်ကောင်စီသည် ပြီးခဲ့သည့် ၂၀၂၄ ခုနှစ် ဒီဇင်ဘာလက ပြည်ပရောက် မြန်မာအလုပ်သမားများထံမှ ပြည်တွင်းပြန်လွှဲငွေ ၂၅ ရာခိုင်နှုန်းကို ကောက်ခံရန် ငွေလွဲလုပ်ငန်း ၁၆ ခုကို လိုင်စင် ချပေးခဲ့သည်။
2C2P plus (Myanmar)သည်လည်း ထိုင်းနိုင်ငံအတွင်းရှိ မြန်မာအလုပ်သမားများထံမှ တရားဝင် ငွေလွှဲမှုများကို လုပ်ဆောင်ရန် လိုင်စင်ရရှိပြီး အဆိုပါကုမ္ပဏီသည် ၂၀၂၀ ခုနှစ် နိုဝင်ဘာလကတည်းက ပြည်ပငွေလွှဲလုပ်ငန်း လိုင်စင်ကို ရရှိထားခဲ့သည်။
၂၀၂၅ ခုနှစ် ဇူလိုင်လ ၁၇ ရက်နေ့ ထုတ်ပြန်ချက်အရ 2C2P plus (Myanmar) ကုမ္ပဏီ (ဖျက်သိမ်းဆဲ)၏ လူမွဲခံယူခြင်းဆိုင်ရာ ဥပဒေပုဒ်မ ၁၄၇ နှင့် နည်းဥပဒေ ၉ နှင့် ၁၅ (ခ)အရ စာရင်းရှင်းလင်းဖျက်သိမ်းရေးဆိုင်ရာ အပြီးသတ် အထွေထွေအစည်းအဝေးကို လာမည့် ဇူလိုင် ၃၀ ရက်နေ့တွင် ပြုလုပ်မည်ဟု ဖော်ပြထားသည်။
ထိုင်းနိုင်ငံရှိ မြန်မာနိုင်ငံသားလုပ်သားများအနေနှင့် ဝင်ငွေ ၂၅ ရာခိုင်နှုန်းကို လွှဲပြောင်းပေးရမည့် 2C2P Plus (Myanmar) အပါအဝင် True Money Myanmar၊ Saythawon Engineering၊ Supermyan Remittance နှင့် Mahar Bawga Remittance တို့ကို Boycott ပြုလုပ်သင့်ကြောင်း ထောက်ပြပြောဆိုမှုတို့ ရှိခဲ့သည်။
ယင်းနောက် 2C2P Plus (Myanmar) ကုမ္ပဏီသည် လိုင်စင်ရရှိပြီး ၈ လအကြာတွင် လူမွဲခံယူလိုက်ရသည့် ကုမ္ပဏီ ဖြစ်လာပြီး ယခုအခါ အပြီးသတ် စာရင်းဖျက်သိမ်းရန် ပြင်ဆင်နေသည်။
ဖေသန်း
#MeKongNews
#မြန်မာလုပ်သား
#လူမွဲစာရင်း
#2C2PPlus
#ကုမ္ပဏီဖျက်သိမ်း
