မဲခေါင်၊ ဇူလိုင် ၁၆
ထိုင်းနိုင်ငံတွင် ထင်ရှားသည့် ဘုန်းတော်ကြီးများစွာဖြင့် လိင်ပိုင်းဆိုင်ရာ ပတ်သက်မှုရှိခဲ့ရုံသာမက ငွေကြေးအရှုပ်အရှင်းများဖြစ်ကာ လိင်ဗီဒီယို မှတ်တမ်းနှင့် ဓာတ်ပုံပေါင်း ၈၀၀၀၀ ကို ရိုက်ကူးထားသည့် မစ္စဂေါ့ဖ် ဆိုသည့်အမျိုးသမီးသည် မိမိ နှင့်ပတ်သက်ခဲ့သည်သာမက ရင်းနှီးမြှုပ်နှံမှုလုပ်ငန်းအတွက် ဘတ် ၁၃ သန်း ချေးငှားပြီး ပြန်မပေးခဲ့သည့်အကြောင်းပါ အယုဒ္ဓယရှိ ကျောင်းထိုင်ဘုန်းကြီးမှ ဝန်ခံထွက်ဆိုသဖြင့် မစ္စဂေါ့ဖ်ကို ဇူလိုင် ၁၄ ရက်တွင် ဖမ်း၀ရမ်းထုတ်ကာ ဇူလိုင် ၁၅ရက်တွင် ဖမ်းဆီးခဲ့သည်။
မစ္စဂေါ့ဖ်ဆိုသည့် အမျိုးသမီးကြောင့် ထိုင်းနိုင်ငံ အနှံ့အပြားမှ ဘုန်းကြီးများ လိင်ပိုင်းဆိုင်ရာ အရှုပ် တော်ပုံကြီး ပေါ်ပေါက်ခဲ့ကာ ဇူလိုင် ၉ ရက်တွင် စီနီယာဘုန်းကြီး ၆ ပါး လူဝတ်လဲခဲ့ရသဖြင့် ယင်းနေ့ကို ဆရာတော်ကြီးများလူဝတ်လဲသောနေ့ (Big Monk Disrobing Day) ဟုပင် လှောင်ပြောင်ခေါ်ဆို လာကြပြီး ဇူလိုင် ၁၄ ရက်၌ နောက်ဆုံးလူဝတ်လဲခဲ့ရသည့် ဆရာတော် ၂ ပါးမှာ ဘန်ကောက်ရှိ ကလျာနမစ်ကျောင်းတိုက်မှ ဒုကျောင်းထိုင် ပရိယတ္တိသဒ္ဓါနှင့် အယုဒ္ဓယရှိ ချူဂျစ်သမ္မာယမ ကျောင်းထိုင်ဆရာတော် သက်ဖက်ချာရာပွန်တို့ဖြစ်သည်။
သက်ဖက်ချာရာပွန်သည် ယခုအမှုတွဲတွင် မစ္စဂေါ့ဖ်အား ငွေကြေးအများဆုံး ပေးခဲ့ရသည့် ကိုယ်တော် ဖြစ်လာကာ ဘတ် ၁၂ . ၈ သန်း (ဒေါ်လာ ၃၉၅၀၀၀) ကနဦးပေးခဲ့သလို ဘုန်းကြီးကျောင်းတိုက် အလှူငွေအကောင့်မှ နောက်ထပ် ဘတ် ၃၈၀၀၀၀ ကို ၂၀၂၄ မတ်လနှင့် ဇူလိုင်လကြား ပေးခဲ့ကြောင်း၊ မစ္စဂေါ့ဖ်မှ အကြွေးဆပ်ငွေအဖြစ် ဘတ် ၁၀၀၀၀၀ (ဒေါ်လာ ၃၀၈၀) သာ ပြန်ပေးခဲ့သည်ဟု သက်ဖက်ချာရာပွန်က ထွက်ဆိုခဲ့သည်။
လက်ရှိတွင် ထိုင်းဘုန်းတော်ကြီး ၉ ပါးအထိ လူဝတ်လဲခဲ့ရပြီး နောက်ထပ် အမှုတွဲတွင်ပတ်သက်နေသည့် ရုပ်သံ မှတ်တမ်းများတွင်ပါရှိသော ဘုန်းကြီးများ ကျန်ရှိနေကာ တချို့ ထွက်ပြေးတိမ်းရှောင် ပျောက်ကွယ်သွားကြောင်း သိရသဖြင့် ပျက်ဆီးနေသော ထိုင်းဘုန်းတော်ကြီးကျောင်းများမှ အပုပ်နံ့ ထွက်လာရမှု၌ မစ္စဂေါ့ဖ်လို လူမျိုး လိုအပ်သည်ဟုပင် ပြောဆိုမှုများရှိနေသည်။
ထိုင်းဘုန်းကြီးကျောင်း ဘဏ္ဍာရေးစနစ်များသည် ၁၉၆၂ ဥပဒေအရ ဘုန်းကြီးများ လိင်မှုကိစ္စပတ်သက်ပါက ရာဇဝတ်မှုမြောက်သည်ဟု ဆိုထားသော်လည်း လက်ရှိအထိ တရားဝင် တားမြစ်မှုများ မလုပ်ဆောင်သေးခြင်းနှင့် ဘုန်းကြီးကျောင်း ဘဏ္ဍာငွေချုပ်ကိုင်မှုစနစ်များကိုလည်း ဥပဒေပြန်လည် ရေးဆွဲ ပြင်ဆင်ရန် ဖြစ်လာသည်။
အစိုးရက ၂၀၂၅ အောက်တိုဘာ ၁ ရက်မှ စတင်ပြီး ဘုန်းတော်ကြီးကျောင်း အားလုံးမှ ငွေကြေးများသည် တရားဝင် ကျောင်းအကောင့်မှသာ စီးဆင်းရမည်၊ ဘုန်းတော်ကြီးများ ငွေသားဘတ် ၁၀၀၀၀၀ ထက်ပိုမကိုင်ဆောင်ရ၊ လစဉ်ဘဏ္ဍာရေးစာရင်းအနှစ်ချုပ် တင်ပြရမည်၊ ဘဏ် အကောင့်အားလုံး ဒေသတွင်းဘဏ်အကောင့်များတွင်သာ အပ်နှံထားရမည်ဟု အားချင်း သတိပေး ထုတ်ပြန်လိုက်သည်။
ကိုကလင်း
Ref: Khaosod
#MeKongNews
#ထိုင်းနိုင်ငံ
#ဘုန်းကြီးကျောင်း
#အယုဒ္ဓယ
#ဖမ်းဆီး
