မဲခေါင်၊ ဇူလိုင် ၄
ဇူလိုင် ၁ ရက်နေ့တွင် ထိုင်းအစိုးရအဖွဲ့ အပြောင်းအလဲဖြစ်မည့်အရေး ကမ္ဘောဒီးယားခေါင်းဆောင်များက ကြိုတင်ပြောဆိုဝေဖန်ခဲ့သလို ဇူလိုင် ၂ ရက်နေ့တွင်လည်း ယခင် ထိုင်းအပိုင်နယ်မြေအဖြစ် မြေပုံပြ ထားသည့် Google Map ထဲမှ တမူးတုံ (Ta Muen Thom) ဘုရားကျောင်းနယ်မြေအား ကမ္ဘောဒီးယား ပိုင်နယ်မြေအဖြစ် ပြောင်းလဲသွားသည့်အပေါ် ထိုင်းနိုင်ငံခြားရေးဝန်ကြီးနှင့် ထိုင်းတပ်မတော် ပြောရေးဆိုခွင့် ရှိသူတို့က အာဆီယံချာတာ၊ နိုင်ငံတကာ စံနှုန်းများနှင့် စည်းမျဉ်းဥပဒေများဖြင့် မညီသော လုပ်ရပ်ဖြစ် ကြောင်း တုံ့ပြန်သတိပေးခဲ့ကြသည်။
Google Map တည်နေရာပြ ပြောင်းလဲသွားမှုအပေါ် ထိုင်းဘက်မှ ယနေထိ မိမိတို့ပိုင်နက်အဖြစ် သတ်မှတ်တာဝန်ယူထားသည့် နေရာဖြစ်ကြောင်း၊ ထိုင်းနိုင်ငံအချုပ်အခြာအာဏာအား ဝင်စွက်ဖက် နေခြင်းသည် အာဆီယံ၊ ကုလ ချာတာနှင့် နိုင်ငံတကာ ဥပဒေကို ချိုးဖောက်ခြင်းဖြစ်ကြောင်း၊ သံတမန် လုပ်ထုံးလုပ်နည်းများကိုလည်း ပြင်းထန်ဆိုးရွားစွာ ချိုးဖောက်မှုဖြစ်သည်ဟု ထိုင်းနိုင်ငံခြားရေးဝန်ကြီး ပြောရေးဆိုခွင့်ရှိသူ ဘလန်ကူရာက ထုတ်ပြန်ပြောဆိုသွားခဲ့သည်။
ထိုင်းတပ်မတော်ပြောရေးဆိုခွင့်ရှိသူ ဒုတိယဗိုလ်မှူးကြီး ဆူဝါရီကလည်း Google Map သည် ယခင် ကတည်းက တည်နေရာပြဆိုမှုနှင့် နယ်စပ်ဒေသများတွင် မည်သည့်နိုင်ငံ ပိုင်နက်ဖြစ်သည်ကို ပြသမှု များ၌ မှားယွင်းမှုများစွာ ရှိနေသော အများပြည်သူသုံး ခရီးသွားဝန်ဆောင်မှုပေးသည့် ပုဂ္ဂလိက ကဏ္ဍ အချက်အလက်ထောက်ပံ့ပေးသည့် အပလီကေးရှင်းသာဖြစ်ကြောင်းပြောသည်။
ထို့ကြောင့် ၎င်းတို့ ပြောင်းလဲ သတ်မှတ်သွားခြင်းအား မီဒီယာများ၊ လူမှုကွန်ရက်များတွင် ဖြန့်နေခြင်းမှာ မည်သို့မျှ တရားဝင်ခြင်း မရှိကြောင်း၊ ပြည်သူများအနေဖြင့် ကုမ္ပဏီထံသို့ မှားယွင်းသော သတ်မှတ်ချက်ဖြစ်သည်ကို တင်ပြ ကန့်ကွက်ကာ ယခုထိ ထိုင်းအစောင့်အရှောက် ထိန်းချုပ်မှုအောက်တွင်သာ ရှိသည့် ထိုင်းပိုင်နယ်မြေ ဖြစ်သည်ကို ပြသရမည်ဖြစ်ကာ နိုင်ငံအချုပ်အခြာ အာဏာပိုင်မှုအား ထိပါးစော်ကားခြင်းဖြင့် နှစ်နိုင်ငံ တင်းမာမှုပိုမိုမြင့်တက်စေရန် မလုပ်ဆောင်ဘဲ ငြိမ်းချမ်းစွာ ဖြေရှင်းရမည်ဟု ကမ္ဘောဒီးယားကို ရည်ညွှန်း ထုတ်ပြန်သွားခဲ့သည်။
ကိုကလင်း
Ref: Khaosod
#MeKongNews
#ထိုင်းနိုင်ငံ
#ကမ္ဘောဒီးယား
#နယ်စပ်ဒေသ
#တမူးတုံဘုရားကျောင်း
#အာဆီယံချာတာ
