မဲခေါင်၊ ဇွန် ၃၀
ဇွန် ၂၈ ရက်ညက ရုရှားသည် ယူကရိန်းနှင့် ၃ နှစ်တာစစ်ပွဲကာလအတွင်း အပြင်းထန်ဆုံး တိုက်ခိုက်မှု အဖြစ် ယူကရိန်းမြို့ကြီးများဆီသို့ ဒုံးကျည်နှင့် ဒရုန်းပေါင်း ၅၀၀ ကျော်ဖြင့် ပစ်ခတ်တိုက်ခိုက်ခဲ့သည်။
ခရုစ်ဒုံးကျည်များ၊ အသံထက်မြန်သော ဒုံးကျည်များ၊ အီရန် ဒီဇိုင်း Shahed တိုက်ခိုက်ရေးဒရုန်းများ ဖြင့် ပစ်ခတ်ရုံသာမက Kinzhal ဒုံးကျည် ၄ လုံး၊ Iskander-M/KN-23 ပဲ့ထိန်းဒုံး ၇ လုံးကိုလည်း ပစ်ခတ်ခဲ့ကြောင်းနှင့် ပူတင်သည် ၎င်းတိုက်ခိုက်မှုတွင် Tu-95 မဟာဗျူဟာ ဗုံးကျဲလေယာဉ်၊ MiG တိုက်လေယာဉ်များပါ အသုံးပြုပြီး အပြင်းထန်ဆုံးတိုက်ခိုက်ရန် အမိန့်ပေးခဲ့ခြင်းဖြစ်သည်။
၂၀၂၂ ခုနှစ်မှ စတင်ပြီး ရုရှား ကျူးကျော်တိုက်ခိုက်သည့် ၃ နှစ်တာကာလအတွင်း ရုရှား၏ အပြင်းထန်ဆုံးသော တိုက်ခိုက်မှုဟု ယူကရိန်းလေတပ် အကြီးအကဲ ယူရီအစ်နတ်က ထုတ်ပြန်ပြောဆိုပြီး ဒုံးကျည်နှင့် ဒရုန်းပေါင်း ၅၃၇ လုံးအနက် ၄၇၅ လုံးကို ကြားဖြတ် ပစ်ချနိုင်ခဲ့သည်ဟု ထုတ်ပြန်ခဲ့သည်။
သို့သော် ဒုံးကျည်တစ်လုံးမှာ ဇာပေါ်ရစ်ဇီဟီယာရှိ စက်ရုံတစ်ရုံကို ထိမှန်ပေါက်ကွဲသလို ယူကရိန်း အနောက်ပိုင်း မိုင်ကိုလိဗ်နှင့် ဒိုးနက်စ်ဒေသများတွင်လည်း ပျက်စီးမှုများရှိကြောင်း၊ ခါဆွန်မြို့တွင် ကလေးတစ်ဦး အပါ လူ ၆ ယောက်ဒဏ်ရာရပြီး တစ်ဦးသေဆုံးကြောင်း၊ ရေနံချက်စက်ရုံတစ်ရုံလည်း ထိမှန်ပေါက်ကွဲသည့်အတွက် ကောင်းကင်ပြင်တစ်ခုလုံး နီရဲနေခဲ့ကြောင်း သတင်းများက ဖော်ပြသည်။
ပစ်ခတ်မှုကြောင့် နေတိုးတပ်ဖွဲ့ဝင် ဖိုက်တာဂျက်လေယာဉ်များ ပျံသန်းစောင့်ကြည့်ခြင်းနှင့် နေတိုးပိုင်နယ်မြေများအတွင်း လေကြောင်းရန်ကာကွယ်ရေးစနစ်များကို အဆင့်အမြင့်ဆုံး အသင့် ပြင်ဆင်ထားရှိခြင်းများလည်း လုပ်ဆောင်ခဲ့ရသည်။
ယခုတိုက်ခိုက်မှုမတိုင်ခင် ဇွန် ၂၆၊ ၂၇ ရက်နေ့များတွင် ယူကရိန်းဘက်မှ တားဝေးပစ်ဒရုန်းများဖြင့် ရုရှားနိုင်ငံထဲ မိုင် ၂၀၀ ကျော် ပျံသန်းဝင်ရောက်ပြီး ကရင်မလင်နန်းတော်၊ ဗိုလ်ဂိုရော့ဗ် ရုရှားလေတပ် စခန်းများအား တိုက်ခိုက်ခဲ့ရာ မာရီနော့ဗ်ကာ လေတပ်စခန်းရှိ တစ်စီးပေါင် ၃၇ သန်းတန် Su-34 ဖိုက်တာဂျက်လေယာဉ် ၂ စီး ပျက်စီးခဲ့သည်ဟု ရုရှားဘက်မှ အတည်ပြု ထုတ်ပြန်ခဲ့သည်။
ကိုကလင်း
Ref:Thesun
#MeKongNews
#ယူကရိန်း
#ရုရှား
#ဒရုန်း
#ဒုံးကျည်
#အပြင်းထန်ဆုံးတိုက်ခိုက်
