မဲခေါင်၊ ဇွန် ၁၉
အာရှဖွံဖြိုးတိုးတက်ရေးဘဏ်(ADB) သည် မြန်မာနိုင်ငံတွင် ငလျင်ဒဏ်ခံစားရသူများကို လူသားချင်းစာနာထောက်ထားမှု အကူအညီများပေးရန် အမေရိကန်ဒေါ်လာ သန်း ၁၀၀ ကို ပေးအပ်မည် ဖြစ်ကြောင်း ဇွန်လ ၁၇ ရက် ရက်စွဲဖြင့် သတင်းထုတ်ပြန်ထားသည်။
၂၀၂၅ ခုနှစ် မတ် ၂၈ ရက်နေ့က ကြုံတွေ့ခဲ့ရသည့် ၇ ဒသမ ၇ စကေးရှိ ငလျှင်ကြောင့် မြန်မာပြည်သူများ ရေရှည်နေထိုင်ရန် နှင့် လူသားချင်းစာနာထောက်ထားမှု အကူအညီများ ပေးရန်အတွက် အာရှဖွံဖြိုးတိုးတက်ရေးဘဏ်အနေနှင့် ယခုကဲ့သို့ အကူအညီပေးအပ်ခြင်း ဖြစ်ကြောင်း ဖော်ပြထားသည်။
ADB Bank က ပေးအပ်သည့် အကြီးမားဆုံး အခမဲ့အကူအညီ ဖြစ်ပြီး စားသောက်ရန် အစားအစာ၊ ရေ၊ အိမ်ခန်းနှင့် ဆေးကုသမှုတို့ကို အရေးပေါ်လိုအပ်သည့် မိသားစုများထံ ပေးအပ်သွားပါမယ် ဟု ADB bank အကြီးအကဲဖြစ်သူ မာဆာတို ကန်ဒါက ပြောကြားသည်။
၂၀၂၅ ခုနှစ် ငလျင်ကပ်ဘေး မတိုင်ခင်က မြန်မာနိုင်ငံတွင် လူသားချင်းစာနာမှု အကူအညီနှင့် လူမှုရေး အကူအညီအနေနှင့် လူဦးရေ ၄ ဒသမ ၃ သန်းခန့် က အရေးပေါ် အကူအညီ လိုအပ်နေခဲ့ပြီး ငလျင် ဖြစ်ပွားပြီးနောက် အရည်အတွက်မှာ ၆ ဒသမ ၃ သန်းအထိ တိုးလာခဲ့သည် ဟု ထုတ်ပြန်ချက်များအရ သိရသည်။
အာရှဖွံဖြိုးတိုးတက်ရေးဘဏ် (ADB) အနေနှင့် မြန်မာနိုင်ငံကို ပေးအပ်သည့် အမေရိကန်ဒေါ်လာသန်း ၁၀၀ အကူအညီသည် အရေးပေါ်နေထိုင်ရန် နေအိမ်များ၊ သန့်ရှင်းရေး ၏နှင့် ရေသုံးဝန်ဆောင်မှုများ၊ အစားအစာ၊ အမျိုးသမီးများအတွက် အရေးကြီးသော ကျန်းမာရေးထောက်ပံပစ္စည်းများနှင့် စိတ်ဒါဏ်ရာ ကုသမှုအတွက် အကြံဉာဏ်ပေးခြင်းတို့ကို ထောက်ပံပေးသွားမည်ဟု ဖော်ပြထားသည်။
အမေရိကန်ဒေါ်လာသန်း ၁၀၀ အကူအညီကို ကုလသမဂ္ဂ ဖွံဖြိုးရေးအစီအစဉ် (UNDP)၊ ကုလသမဂ္ဂ အပြည်ပြည်ဆိုင်ရာ ကလေးများ ရံပုံငွေအဖွဲ့ (UNICEF) နှင့် ကမ္ဘာ့ စားနှပ်ရိက္ခာ အစီအစဉ် (WFP) တို့နှင့် ပူးပေါင်းကာ ပံပိုးကူညီမည် ဖြစ်ကာ မြန်မာနိုင်ငံအတွင်းရှိ ADB ရုံးကလည်း ပါဝင်ဆောင်ရွက်မည် ဟု ဖော်ပြထားသည်။
ADB Bank သည် ယင်းငွေကြေးအထောက်အပံကို မြန်မာပြည်သူများထံ ဖြန့်ဝေကူညီရာတွင် စစ်ကောင်စီနှင့် ပူးပေါင်းမည်ဟု မပြောထားသော်လည်း ငလျင်ကြောင့် ထိခိုက်စာနာမှုလုပ်ငန်းစဉ် အများစုသည် စစ်ကောင်စီ၏ ခွင့်ပြုချက် လိုအပ်နေသည်။
မြန်မာနိုင်ငံသည် ငလျင်ကြောင့် နိုင်ငံစီးပွားရေးသည် ၂၀၂၅-၂၆ ဘဏ္ဍာရေးနှစ်တွင် ၂ ဒသမ ၅ ရာခိုင်နှုန်းအထိ ကျဆင်းသွားမည် ဖြစ်ပြီး အခြေခံအဆောက်အဦ ပျက်စီးဆုံးရှုံးမှုသည် အမေရိကန်ဒေါ်လာ ၁၁ ဘီလီယံအထိ ရှိနေသည်ဟု ကမ္ဘာ့ဘဏ်က ထုတ်ပြန်ထားသည်။
၂၀၂၅ ခုနှစ် မတ် ၂၈ ရက်နေ့တွင် လှုပ်ခဲ့သော ငလျင်ကြောင့် ပျက်စီးဆုံးရှုံးခဲ့ရမှု တန်ဖိုးမှာ ငွေကျပ် ၃၆၂၉ ဘီလီယံကျော် ရှိကြောင်း စစ်ကောင်စီက မေလ ၂၀ ရက်နေ့က ထုတ်ပြန်ထားသည်။
Photo – MFP
ဖေသန်း
#MeKongNews
#စစ်ကိုင်းငလျင်
#အာရှဖွံ့ဖြိုးတိုးတက်ရေးဘဏ်
#အကူအညီ
#ကုလသမဂ္ဂ
#ငွေကြေးအထောက်အပံ့
