မဲခေါင်၊ ဇွန် ၁၃
ဇွန် ၁၃ ရက်မနက်မိုးမသောက်မီ အစ္စရေးသည် အီရန်နိုင်ငံ တီဟီရန်မြို့အပါ နေရာများကို ဒါဇင်နှင့်ချီသော ဒုံးကျည်များဖြင့် ပစ်ခတ်တိုက်ခိုက်ရာ အီရန်တော်လှန်ရေးအစောင့်တပ်အကြီးအကဲ ဟော့ဆိန်း ဆလာမီအပါ စစ်တပ်အကြီးအကဲများ၊ နျူကလီးယားဆိုက်မှ သိပ္ပံပညာရှင်များအပါ သေဆုံးမှုများစွာ ရှိခဲ့ကြောင်း သတင်းများက ဖော်ပြနေသည်။
အီရန်သည် အစ္စရေးနိုင်ငံဖြစ်တည်မှုကို ခြိမ်းခြောက်ဆုံးသောနိုင်ငံဖြစ်နေသည့်အတွက် နျူကလီးယား ဆိုက်များကို ပစ်မှတ်ထားကာ Rising Lion စစ်ဆင်ရေး တစ်စိတ်တစ်ပိုင်းအဖြစ် တိုက်ခိုက်ရခြင်းဖြစ် ကြောင်း အစ္စရေးဝန်ကြီးချုပ် နက်တန်ယာဟုက ထုတ်ပြန်ပြောဆိုခဲ့ရာ အီရန်ခေါင်းဆောင် အယာတိုလာအလီခါမီနီက အစ္စရေးသည် ခါးသီးသောကြမ္မာဆိုးကို ပြန်လည် ရင်ဆိုင်ရရန် အလွန်သေချာသွားခဲ့ပြီဟု ထုတ်ပြန်ကာ လက်တုံ့ပြန်တော့မည်ဟုလည်း ဆိုသည်။
ဒုံးကျည်များစွာ၊ ဗုံးများစွာသည် တီဟီရန်မြို့ လူနေတိုက်တာအဆောင်အအုံများကို ထိမှန်ပေါက်ကွဲပြီး ၁၉၈၀ ပြည့်လွန်နှစ်များက အီရန်-အီရတ်စစ်ပွဲနောက်ပိုင်း စစ်အနိဌာရုံများကို မမြင်တွေ့ရတော့သည့် တီဟီရန်ပြည်သူများ လမ်းပေါ်ပြေးထွက်ခြင်း၊ အကာအကွယ်များရှိရာနေရာများသို့ ပြေးလွှားခြင်းဖြင့် ၀ရုန်းသုန်းကာ ဖြစ်နေရသည်ဟု ဒေသတွင်း မီဒီယာများက ဖော်ပြခဲ့ကြသည်။
အီရန်အစိုးရပြောရေးဆိုခွင့်ရှိသူ ရှီကာချီက ယခုတိုက်ခိုက်မှုတွင် အဓိက တရားခံ အစ္စရေးနှင့်အမေရိ ကန်တို့ ကြီးမားစွာ ပြန်လည်ပေးဆပ်ရမည်ဟု ထုတ်ပြန်ခဲ့ရာ အမေရိကန် နိုင်ငံခြားရေးဝန်ကြီး မာကိုရူဘီယိုက ယခုတိုက်ခိုက်မှုတွင် အမေရိကန်နှင့် လုံး၀မသက်ဆိုင်သလို မည်သည့်ထောက်ပံ့မှုမှလည်း မလုပ်ခဲ့ဟု ငြင်းဆိုသွားခဲ့သည်။
ကမ္ဘာတစ်ဝန်း နိုင်ငံရေးလေ့လာသူများက အရှေ့အလယ်ပိုင်းဒေသတွင်း ကျယ်ပြန့်သည့် အလုံးစုံစစ်ပွဲ ဖြစ်ပွားရန် အတင်းမာဆုံးသော အခြေအနေသို့ ရောက်ရှိစေသည့်တိုက်ခိုက်မှုဖြစ်ကြောင်း သုံးသပ်ကြသလို ကုလသမဂ္ဂ အတွင်းရေးမှူးချုပ် ဂူတာရက်စ်ကလည်း အစ္စရေးတိုက်ခိုက်မှုအပေါ် ရှုတ်ချပြီး အမြင့်မားဆုံးသော စိတ်ရှည်သီးခံမှုဖြင့် ပြဿနာကို ဖြေရှင်းကြရန် ထုတ်ပြန်သွားခဲ့သည်။
ပြီးခဲ့သည့် ဧပြီလက အီရန်သည် အစ္စရေးကို ဒုံးကျည် ၃၀၀ နှင့်ဒရုန်းများစွာ အသုံးပြု တိုက်ခိုက်ခဲ့ရာ အစ္စရေးဘက်မှ ဒေသတွင်းရှိ အီရန် proxy အုပ်စုမှ ခေါင်းဆောင်များစွာကို လုပ်ကြံရှင်းလင်းခဲ့ရာ ဟားမက်စ်နှင့် ဟစ်ဇ်ဘိုလာအကြီးအကဲများ သေဆုံးခဲ့ရသည်။
အီရန်သည် အောက်တိုဘာလကတည်း ပဲ့ထိန်းဒုံးကျည် အလုံး ၁၈၀ အသုံးပြုပြီး အစ္စရေးကို တိုက်ခိုက်ခဲ့သေးပြန်ရာ အစ္စရေး၏ လေကြောင်း ရန်ကာကွယ်ရေးစနစ်ကြောင့် ဆိုးရွားလွန်းသော ထိခိုက်ပျက်စီးမှုများ မရှိခဲ့ပေ။
ကိုကလင်း
Ref: BBC
#MeKongNews
#အီရန်
#အစ္စရေး
#နျူကလီးယားပညာရှင်
#တီဟီရန်
