မဲခေါင်၊ ဇွန် ၈
ကုန်စိမ်းများပို့ဆောင်ရာတွင် အဓိကအားထားအသုံးပြုနေရသည့် လိုင်စင်မဲ့ယာဥ်များ ဖမ်းဆီးမှုကြောင့် ရှမ်းပြည်တောင်ပိုင်းထွက်ကုန်စည်များ အထူးသဖြင့် ကုန်စိမ်းပို့ဆောင်မှု အခက်ကြုံရပြီး စိုက်တောင်သူများ ထိခိုက်ကြရကြောင်း သိရသည်။
လိုင်စင်မဲ့ကားများ ပြေးဆွဲနိုင်ခြင်းမရှိသည့်အတွက် ရာသီပေါ်သီးနှံများကို တင်ပို့ရောင်းချနိုင်ခြင်း မရှိတော့သည့်အတွက် စိုက်တောင်သူများ အခက်အခဲကြုံရကြောင်း၊ ထို့ပြင် ကုန်များ အချိန်မီရောင်းချနိုင်မှု မရှိနိုင်ခြင်း၊ ဝယ်သူနည်းပါးသွားခြင်း၊ သယ်ယူရောင်းချသူ လျော့နည်းသွားခြင်းတို့ကြောင့် စျေးကွက်အတွင်း၌လည်း ကုန်စည် ၃ပုံ ၂ပုံခန့် လျော့နည်းသွားသည်ဟု အောင်ပန်းကုန်စည်စျေးကွက်မှ သိရသည်။
“အရင်က စျေးနေ့မှမဟုတ်ဘူး ကုန်လာရောင်းသူတွေနဲ့စည်နေတာ၊ အခုက ရှင်းလင်းနေတာပဲ။ ကုန်မဝင်တော့သလို လာဝယ်သူလည်း မရှိသလောက်ကို ဖြစ်နေတာ။ ဝစ်သောက် (လိုင်စင်မဲ့ကား) ဖမ်းတော့ အများက ဒါပဲအသုံးပြုတာလေ။ စိုက်ခင်းတွေဆို ဒါတွေပဲအသုံးပြုတာ”ဟု အောင်ပန်းကုန်စည်ဒိုင်တစ်ခုက မဲခေါင်သို့ ပြောသည်။
လိုင်စင်မဲ့ကားများ အပြင်မထွက်နိုင်သည့်အတွက် ပင်လောင်း၊ နောင်တရား၊ တီကျစ်ဘက်မှလည်း ကုန်စည်များလည် လာရောက်ရောင်းချနိုင်ခြင်း မရှိကြောင်း၊ ရှမ်းပြည်တောင်ပိုင်းတွင် လိုင်စင်မဲ့ကားများကိုဖမ်းဆီးမှု တင်းကြပ်နေသလို ဖမ်းဆီးခံရပါကလည်း ကျပ်ငွေ ၁၇သိန်းမှ သိန်း၃၀အထိ ပေးရွေးရကြောင်း နောင်တရား စိုက်တောင်သူတစ်ဦးက ပြောသည်။
“အဖွဲ့စုံဗျ။ ငွေမပေးရင် သိမ်းမယ်ဆိုတော့ ကားက ရာကျော်ပေးဝယ်ထားရတာ၊ ပေးတာတောင် ရှေ့ဆက်သွားခွင့်မရဘူး” ဟု ၎င်းက ပြောသည်။
ကလောဘက်တွင်လည်း ကုန်တင်လာသည့် Hijet ကား ၃စီးကို ကုန်ချပြီး ဖမ်းဆီးခံခဲ့ရသည်ဟု ဒေသခံတစ်ဦးကပြောသည်။
လက်ရှိ ရှမ်းပြည်တောင်ပိုင်းမြို့များတွင် လိုင်စင်မဲ့ယာဥ်များ အထူးသဖြင့် လုပ်ငန်းသုံးကားနှင့်ဆိုင်ကယ်များ ဖမ်းဆီးခံရသဖြင့် အလုပ်အကိုင်များ ခက်ခဲမှုများစွာ ဖြစ်ပေါ်နေကြရကြောင်း သိရသည်။
Photo – Aungban Trading
မဟာ
#MeKongNews
#လိုင်စင်မဲ့ယာဉ်
#ရှမ်းတောင်
#ကုန်စည်စီးဆင်းမှု
#စိုက်တောင်သူ
#ကုန်စိမ်း
#ထိခိုက်
