မဲခေါင်၊ ဇွန် ၈
UWSA ထိန်းချုပ်နယ်မြေအတွင်း တရုတ်ပိုင် ရွှေနှင့်မြေရှား သတ္တုမိုင်းတွင်းများကြောင့် နမ့်ခုတ်မြစ်နှင့် မယ်ဆိုင်မြစ်များအတွင်း အာဆင်းနစ် ဓာတ်များနှင့်အခြားသော အန္တရာယ်ရှိသတ္တုများ ပျော်ဝင်ညစ်ညမ်းနေမှုအတွက် ချင်းရိုင်ဒေသခံများ ဇွန် ၅ ရက်၊ ပတ်ဝန်းကျင်ထိန်းသိမ်းရေးနေ့တွင် စုရုံးဆန္ဒပြခဲ့ကြသည်။
မယ့်ဖလောင် ပြည်သူ့ပန်းခြံတွင် ချင်းရိုင်ပြည်သူများစုဝေးပြီး ထိုင်းဝန်ကြီးချုပ်ထံ ရည်ညွှန်းသော တောင်းဆိုစာတန်းများကိုင်ဆောင်ခြင်း၊ သီချင်းများသီဆိုခြင်း၊ ရိုးရာဓလေ့ပုံရိပ်များ ပုံဖော်ခြင်းနှင့်အတူ ထိုင်း၊ မြန်မာ၊ ၀ (UWSA) နှင့် တရုတ်အစိုးရတို့မှ အဆိုပါ ရွှေနှင့် မြေရှား မိုင်းတွင်းများကို ပိတ် သိမ်းပေးရန် ဒေသခံများက ဆန္ဒပြတောင်းဆိုခဲ့ခြင်းဖြစ်သည်။
ထိုင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန အမြဲတမ်းအတွင်းဝန် ဘူရက်စ်ပက်က ချင်းရိုင်နှင့်ချင်းမိုင်ရှိ နမ့်ခုတ်မြစ်နှင့်မယ်ဆိုင်မြစ်များတွင် သဘာ၀ပတ်ဝန်းကျင် စောင့်ကြည့်ရေး စင်တာ ၄ ခု ထားရှိပြီး မြစ်အားမှီခိုသူဒေသခံများ ဘေးကင်းမကင်း ပွင့်လင်းမြင်သာ အချက်အလက်များသိရှိစေရန် လုပ်ဆောင်ပေးသွားမည်ဖြစ်ကြောင်း၊ ကာလတိုနှင့် ကာလရှည် မြစ်များအား တည်တံသန့်ရှင်းရေး “၀” တပ်မတော်နှင့်အတူ တာဝန်ရှိသူများ စုပေါင်းအဖြေရှာသွားရမည်ဟုပါ အာမခံပြောကြားသွားခဲ့သည်။
ဇွန် ၇ ရက်တွင် ထိုင်းအစိုးရက ချင်းရိုင်ရှိ နမ့်ခုတ်နှင့်မယ်ဆိုင်မြစ်အတွင်း ပတ်ဝန်းကျင် စောင့်ကြည့်ရေးစင်တာ ၄ ခု ဖွင့်လှစ်သလို အနည်ဖမ်းစနစ်များကို အန္တရာယ်အရှိဆုံးနေရာများတွင် တပ်ဆင်ကာ ပြည်သူကို ရေထုညစ်ညမ်းခြင်းအဆင့်အား အတိအကျ သတိပေးနေခြင်းနှင့် ပြည်သူတစ်ရပ်လုံးပါဝင်သည့် ပူးပေါင်းဆောင်ရွက်ရေး လမ်းစဉ် ချမှတ်လုပ်ဆောင်နေပြီဟု ထိုင်းပြည်ထဲရေး ဒုဝန်ကြီး သီရာရတ်က ထပ်မံရှင်းလင်းပြောဆိုသွားခဲ့သည်။
ထိုအစီအစဉ်တွင် ရေထုညစ်ညမ်းမှု တိုင်းတာစောင့်ကြည့်စနစ် ၄ ခုအား ချင်းရိုင်ခရိုင် မယ့်အိုင်ခရိုင်ခွဲရှိ သာတွန်းတံတား၊ ချင်းရိုင်ခရိုင်ခန်းမနောက်ဘက် နမ့်ခုတ်မြစ်ပြည်သူ့ပန်းခြံ၊ မယ်ဆိုင် နယ်စပ်ဂိတ်၊ ချင်းဆန်းရှိရွှေတြိဂံဇုန် ၄ နေရာတွင် ထားရှိကာ မြစ်ရေ ညစ်ညမ်းမှုအတိုင်းအတာကို ဒေသခံများနှင့် ပူး ပေါင်းပြီး အချိန်နှင့်အမျှ ထုတ်ပြန်ပေးခြင်းဖြင့် ပြည်သူများ စိုးရိမ်မှုကို လျောကျစေပြီး ယုံကြည်မှုမြင့် တက်လာစေမည်ဟု သီရာရတ်က ရှင်းလင်းပြောကြားခဲ့သည်။
ကိုကလင်း
Ref: Bangkokpost
#MeKongNews
#ရှမ်းအရှေ့
#သတ္တုတူးဖော်မှု
#UWSA
#နမ့်ခုတ်မြစ်
#မယ်ဆိုင်မြစ်
