မဲခေါင်၊ ဇွန် ၅
ရုရှားနိုင်ငံ အတွင်းပိုင်းထဲအထိ ကွန်တိန်နာများဖြင့် လျှို့ဝှက သွင်းယူခဲ့သော ယူကရိန်း ဒရုန်း ၁၁၇ စင်းက ဇွန် ၁ ရက်နေ့၌ ရုရှားလေဆိပ် ၄ ခုတွင် ပုလဲဆိပ်ကမ်းဗုံးကြဲသည့်အလား လေယာဉ် ၄၀ ကျော် ပျက်စီးသည်အထိ အနီးကပ်အလစ်အငိုက် တိုက်ခိုက်မှုကို ခံလိုက်ရသော်လည်း ပူတင်သည် ယူကရိန်းနှင့် ငြိမ်းချမ်းရေးဆွေးနွေးမှုတွင် အလွန်ကြီးမားသည့် တောင်းဆိုမှုစာရင်းများကို ထုတ်ပြန် အသိပေးနေဆဲဖြစ်သည်။
၁၈ လကြာ လျှို့ဝှက်ပြင်ဆင်ခဲ့သည့် ယူကရိန်း ဒရုန်းတိုက်ခိုက်မှုကြောင့် ဒေါ်လာ ၁ . ၅ ဘီလီယံ ဖိုး ရုရှား ပျက်စီးဆုံးရှုံးခဲ့ရာ ရုရှားမီဒီယာများကိုယ်တိုင်က ပုလဲဆိပ်ကမ်းဗုံးကြဲခံရခြင်းမျိုးဟု ခိုင်းနှိုင်း ဖော်ပြခဲ့ကြသည်။
ထိုအခြေအနေတွင် အမေရိကန်သမ္မတ ဒေါ်နယ်ထရမ့် ကြားဝင်ပြီး ရုရှား – ယူကရိန်း ငြိမ်းချမ်းရေးစာချုပ်ရန် အဆိုပြုထားမှုကို လက်ခံရန်အရေး ပူတင်ဘက်က လောဘကြီးလွန်းသော တောင်းဆိုမှုစာရင်းများကို ပေးပို့ထားကြောင်းနှင့် ထိုအချက်များ လက်မခံလျှင် ဆွေးနွေး ရန်မရှိဟု ဆိုထားကြောင်း သိရသည်။
မေ ၂ ရက် အစ္စတန်ဘူလ်တွင် နှစ်နိုင်ငံကိုယ်စားလှယ်များ ဒုတိယအဆင့် ငြိမ်းချမ်းရေးဆွေးနွေးရာတွင် ပူတင် အရှက်မဲ့စွာတောင်းဆိုမှုများသည် ဆိုးရွားလွန်းခဲ့ကြောင်း၊ ရုရှား အစိတ်အပိုင်းအနည်းငယ်မျှသာ သိမ်းပိုက်ထားနိုင်သေးသော ယူကရိန်းအရှေ့ပိုင်းဒေသ ၄ ခုမှ ယူကရိန်းတပ်များ အားလုံးဆုတ်ခွာပေးရန်၊ ၂၀၁၄ တွင် ယူကရိန်းထံမှ မတရား သိမ်းယူခဲ့သော ခရိုင်းမီးယားဒေသကို နိုင်ငံ တကာမှ ရုရှားအချုပ်အခြာအာဏာပိုင်နယ်မြေအဖြစ် သတ်မှတ်ပေးရမည်ဖြစ်ကြောင်း ပူတင်က တောင်းဆိုထားသည်။
ထို့အပြင် ယူကရိန်းသည် စစ်တပ်အင်အားကို သတ်မှတ်ပေးသည့် အရေအတွက်တွင်သာ ချုံ့ပြီး ဖွဲ့စည်းရမည်၊ ယူကရိန်းသည် မည်သည့် ပြည်ပစစ်သားများကိုမဆို တိုင်းပြည်အတွင်း မည်သည့်အကြောင်းပြချက်နှင့်မျှ လာရောက်ခွင့်မပြုသော ထာ၀ရ ကြားနေနိုင်ငံအဖြစ် နေပေးရမည်၊ နာဇီဝါဒ မြှင့်တင်ခြင်းလုပ်ရပ်မျိုး လုံး၀ မလုပ်ရ၊ ရုရှားမှ သဘာ၀ဓာတ်ငွေများ ယူကရိန်းနိုင်ငံကို ဖြတ်ကျော် ရောင်းချခွင့်ကိုလည်း ခွင့်ပြုသည့်အပြင် အကာအကွယ်ပေးရမည်၊ နိုင်ငံအရှေ့ပိုင်း ၄ နေရာတွင် စစ်တပ်များ မရုပ်ပေးနိုင်ဆိုလျှင်ပင် ယူကရိန်းဘက်က စစ်အုပ်ချုပ်ရေးဥပဒေပြဌာန်းခြင်းကို ရုပ်သိမ်းပြီး ရွေးကောက်ပွဲ ကျင်းပရမည်ဆိုသည့် တောင်းဆိုမှုများ ပါဝင်သည်ဟု သိရသည်။
ကိုကလင်း
Ref:Thesun
#MeKongNews
#ရုရှား
#ယူကရိန်း
#ပူတင်
#ငြိမ်းချမ်းရေးစာချုပ်
