မဲခေါင်၊ မေ ၂၆
ထိုင်းလူမျိုးများအတွက် အရေးပါသော နမ့်ခုတ်၊ မယ်ဆိုင်နှင့် မဲခေါင်မြစ်များအတွင်း မြန်မာဘက် သတ္တုမိုင်းတွင်းများမှ ရေဆိုးများ ပျော်ဝင်ညစ်ညမ်းနေရာ ထိုမိုင်းတွင်းများကို ပိတ်သိမ်းရန် ထိုင်း၊ မြန်မာ၊ တရုတ်အစိုးရနှင့် “၀” တပ် UWSA တို့ကို ထိုင်းအရပ်ဘက်အဖွဲ့အစည်းတစ်ခုက ဦးဆောင် ဆန္ဒပြခဲ့ကြသည်။
မေ ၂၄ ရက်တွင် ထိုင်းအရပ်ဘက်လူ့အဖွဲ့အစည်းဖြစ်သော သဘာ၀ပတ်ဝန်းကျင် ထိန်းသိမ်းရေး ကွန်ရက် Rak Chiang Khong မှ ချင်းရိုင်ခရိုင် တန်းနှင့်ခွန်ဥယျာဉ်ရှေ့မျက်နှာစာ၌ အဆိုပါ မြစ်များ၏ ဂုဏ်ဒြပ်နှင့် ပိုင်ရာဆိုင်ရာများကို ပူဇော်ပသသည့် ရိုးရာ ပူဇော်ပွဲများကျင်းပကာ မြန်မာဘက် မြစ်ညှာ ပိုင်းမှ မိုင်းတွင်းများ ပိတ်သိမ်းပေးရန် ဆန္ဒပြတောင်းဆိုခဲ့ခြင်းဖြစ်သည်။
Rak Chiang Khong အဖွဲ့ ဥက္ကဌ Niwat Roykaew က GISTDA ဂြိုဟ်တုဓာတ်ပုံမှတ်တမ်းများအရ မြန်မာဘက်ခြမ်း “၀” တပ်ဖွဲ့ UWSA ထိန်းချုပ်နယ်မြေအတွင်း ၂ နှစ်အတွင်းမှာပင် တရုတ်အများစုပိုင်သော ရွှေမိုင်း၊ မြေရှားသတ္တုမိုင်းလုပ်ကွက်များ တိုးပွားလာကြောင်း၊ လုပ်ကွက်များသည် နိုင်ငံတကာ သတ္တုတူးဖော်မှု စံနှုန်းများကိုလည်း မလိုက်နာဘဲ ၂၀၂၄ ခုနှစ် မိုးရာ သီအတွင်း သက်ဆိုင်ရာမြစ်များအတွင်း ပျော်ဝင်အဆိပ်သင့်စေသည့် ရွှေမိုင်းစွန့်ပစ် ဓာတုပစ္စည်း ပမာဏ မည်မျှ များပြားကွဲပြားနေသည်ကိုပင် မသိနိုင်လောက်အောင် ဖြစ်ခဲ့ရကြောင်း ပြောသည်။
ရေစီးကြောင်းများတွင် အာဆင်းနစ်အက်ဆစ်ဓာတ်များနှင့် အခြားသော အကြီးစားသတ္တုဓာတ်များ ပျော်ဝင်မှုပမာဏ များပြားလာသည့်အတွက် မြစ်အောင်ပိုင်းနေ ထိုင်းပြည်သူများ အကျိုးစီးပွားသာမက အသက် အန္တရာယ်ပင်ရှိလာစေကြောင်း၊ ငါးများတွင် အနားများပေါက်သဖြင့် ထိုမြစ်များထဲမှ ဖမ်းယူသည့် ငါးများကို မဝယ်တော့ခြင်း၊ စားသောက်ဆိုင်လုပ်ငန်းများတွင်လည်း မသုံးတော့ကြောင်း၊ ဟိုတယ်လုပ်ငန်းများတွင်လည်း အဆိပ်မသင့်စေသော ဘေးကင်းရေဖြစ်စေရေး စစ်ဆေးမှုများ အလွန်လုပ် နေရသဖြင့် စီးပွားနစ်နာမှုများစွာဖြစ်နေကြောင်း၊ ထို့ကြောင့် အမြန်ဆုံး စည်းကမ်းမဲ့ မြန်မာဘက် ခြမ်းမှ ရွှေမိုင်းလုပ်ကွက်များ ပိတ်သိမ်းရန် သက်ဆိုင်ရာ မြန်မာ၊ ထိုင်းနှင့်တရုတ်အစိုးရ၊ နယ်မြေ ထိန်းချုပ်ထားသည့် ၀ တပ်တို့ မိုင်းတွင်းများကို ပိတ်သိမ်းပေးရန် ဆန္ဒပြတောင်းဆိုခဲ့ကြခြင်းဖြစ်သည်ဟု ၎င်းက ဟောပြောသွားခဲ့သည်။
လာမည့် ဇွန် ၅ ရက် ဒေသစံတော်ချိန် နံနက် ၉ နာရီတွင်လည်း အရပ်ဘက် လူ့ဘက်အဖွဲ့အစည်း များစွာ မြန်မာဘက်မှ မိုင်းတွင်းများ ပိတ်သိမ်းရေး ထောက်ခံလက်မှတ်ကောက်ခံပွဲနှင့်အတူ ကျောင်းသားပြည် သူများပါ ပါဝင်ကာ နမ့်ခုတ်မြစ်တံတားအထိ လမ်းလျှောက် ဆန္ဒပြရန် စီစဉ်ကြောင်းပါ ထည့်သွင်းကြေညာသွားခဲ့သည်။
ကိုကလင်း
Ref:The Nation
#MeKongNews
#ရွှေမိုင်း
#ထိုင်းနိုင်ငံ
#အဆိပ်သင့်
#မဲဲခေါင်မြစ်
