မဲခေါင်၊ မေ ၈
ပါကစ္စတန်ဘက်သို့ နယ်စပ်ဖြတ်ကျော် တိုက်ခိုက်မှုများပြုလုပ်အပြီး နာရီပိုင်းအကြာမှာပင် အိန္ဒိယ အစိုးရသည် နိုင်ငံအနောက်ပိုင်းမှသည် အရှေ့ဖျားအထိ အရေးပါသော ပြည်နယ်များစွာတွင် ပါကစ္စတန် ၏ တုံ့ပြန်တိုက်ခိုက်လာနိုင်မှုအတွက် ကာကွယ်ပြင်ဆင်ထားနိုင်ရေး လှုံဆော်သတိပေးထားသည်။
မေ ၇ ရက်နေ့ မနက်ပိုင်းမှာပင် ဂျမူး၊ ကက်ရှ်မီးယား၊ လာဒက်ရှ် မြို့တော်ဝန်များ၊ အက်တာပရာဒက်ရှ်၊ အက်တာရာခန်း၊ ပန်ဂျပ်၊ ရာဂျက်စ်သန်၊ ဂူဂျာရတ်၊ အနောက်ဘန်ဂေါနှင့်ဆစ်ခင်ပြည်နယ်များမှ အစိုးရ တာဝန်ရှိသူများသည် ဗီဒီယိုကွန်းဖရန့်အစည်းအဝေးလုပ်ပြီးနောက် လုံခြုံရေးအခြေအနေများကို ပြန် လည်သုံးသပ်ရန်၊ ကိုယ့်ပြည်နယ်နှင့်ကိုယ် လမ်းညွှန်ချက်များနှင့်အညီ ပါကစ္စတန်ဘက်မှ တုံ့ပြန်တိုက် ခိုက်လာနိုင်မှုအတွက် ကာကွယ်ရေးအစီအစဉ်များ လုပ်ဆောင်ထားကြရန်၊ မရှိမဖြစ် ဝန်ဆောင်မှု လုပ် ငန်းများဖြစ်သော ဆေးရုံများ၊ မီးသတ်ဌာနများ၊ မရှိမဖြစ် ကုန်စည်နှင့်စားသောက်ကုန်များ မပြတ် တောက်စေရေး သေချာစွာ စီစဉ်ထားကြရန် ပြည်ထဲရေးဝန်ကြီး ရှားက လမ်းညွှန်မှာကြားခဲ့ခြင်းဖြစ်သည်။
လူမှုကွန်ရက်မီဒီယာများတွင် မလိုလားအပ်သော အမျိုးသားဆန့်ကျင်ရေးဝါဒများ မပြန့်ပွားရေး တင်းတင်းကြပ်ကြပ် ကြပ်မတ်ဆောင်ရွက်ရန်၊ ပြည်နယ်အစိုးရများနှင့်သက်ဆိုင်ရာ ဗဟိုအေဂျင်စီများ စဉ်ဆက်မပြတ်ဆက်သွယ်မှုပြုလုပ်ရန်၊ လုံခြုံမှုအားနည်းသော နေရာများတွင် ပိုမိုလုံခြုံစေရေး စီစဉ် ဆောင်ရွက်ကြရန်၊ ကပ်ဘေးကာကွယ်မှုဆိုင်ရာ တုံ့ပြန်မှုများ၊ ပြည်သူ့ကာကွယ်ရေးစနစ်၊ အိမ်စောင့်တပ်နှင့် ပြည်သူအားလုံး ပူးပေါင်းဆောင်ရွက်ခြင်းဖြင့် ပြည်သူ့လုံခြုံရေးကို အထူးဂရုပြုကြစေရန် ဝန်ကြီးရှားက လမ်းညွှန်းခဲ့ခြင်းဖြစ်သည်။
ဧပြီ ၂၂ ရက်နေ့က ပါကစ္စတန်ဘက်မှ အစ္စလာမ် စစ်သွေးကြွများသည် ကက်ရှ်မီးယားဒေသ အိန္ဒိယ ထန်းချုပ်နယ်မြေ ပဟယ်လ်ဂမ်တွင် ခရီးသွား အိန္ဒိယအရပ်သား အမျိုးသား ၂၅ ယောက်နှင့် နီပေါသား ၁ ဦးကို ဟိန္ဒူဘာသာဝင်လားဟု မေးပြီး အနီးကပ်ပစ်သတ်ခဲ့မှုကြောင့် မေ ၆ ရက်ည သန်းခေါင်းကျော် တွင် အိန္ဒိယဘက်မှ နယ်စပ်ဒေသ ပါကစ္စတန်ပိုင်နက်အတွင်း စစ်သွေးကြွများ အခြေစိုက်သည်ဆိုသော ပစ်မှတ် ၉ ခုကို ဒုံးကျည်များ လေကြောင်းတိုက်ခိုက်မှုများ ပြုလုပ်ခဲ့ရာ ၃၁ ယောက် သေဆုံးခဲ့ရသည်။
နျူကလီးယားပိုင်ဆိုင်ထားသော နှစ်နိုင်ငံ ယခုလိုဆက်လက်တင်းမာနေလျှင် နျူကလီးယားစစ်ပွဲ စတင် ဖြစ်ပွားမည်ကို ကမ္ဘာ့နိုင်ငံကြီးအသီးသီးမှလည်း စိုးရိမ်နေပြီး ပါကစ္စတန် ကာကွယ်ရေးဝန်ကြီးကိုယ် တိုင်က အိန္ဒိယဘက်မှ ဆက်တင်းမာနေလျှင် တူညီသော တုံ့ပြန်မှု ပြုလုပ်မည်ဖြစ်ကာ နျူကလီးယား စစ်ပွဲဖြစ်သွားနိုင်ကြောင်းပါ ပြောဆိုထားသောကြောင့်လည်း အိန္ဒိယဘက်မှ ပြည်နယ်များစွာတွင် တိုက်ခိုက်ခံရနိုင်မှုများအတွက် လုံခြုံရေးစီမံဆောင်ရွက်ရေး တိုက်တွန်းနှိုးဆော်နေခြင်းဖြစ်သည်။
ကိုကလင်း
Ref: dawn
#MeKongNews
#အိန္ဒိယ
#ပါကစ္စတန်
#ကက်ရှ်မီးယား
#နျူကလီးယား
