DSI မှဟု လိမ်လည်ကာ PhD ဘွဲ့ရ ထိုင်းလူငယ်အင်ဂျင်နီယာထံမှ ကျားဖြန့်သမားများ ဘတ် ၈ သန်း ကျော်လိမ်သွား
မဲခေါင်၊ မေ ၄
အသက် ၃၂ နှစ်သာရှိသေးသော PhD ဘွဲ့ရ ထိုင်းလူငယ်အင်ဂျင်နီယာ ဆီဝပ်ဆိုသူကို ကျားဖြန့် လူလိမ်များက ထိုင်းအထူးစုံစမ်းစစ်ဆေးရေးဦးစီးဌာန (DSI) မှဟုဆိုကာ လိမ်လည်ခြိမ်းခြောက်ပြီး ဘတ် ၈ သန်း ကျော်ရယူသွားကြောင်း သိရသည်။
ယင်းပို့စ်ကို ထိုင်းလူမှုကွန်ရက်မီဒီယာပေါ် နာမည်ကြီးတက်ကြွလှုပ်ရှားသူအဖြစ် အောင်မြင်နေသည့် ရှင်သန်ခြင်း အဖွဲ့ထူထောင်သူ Ekkapop Luangprasert က ၎င်း၏ ဖေ့စ်ဘုတ်ပေါ် မျှဝေခြင်းဖြင့် လူသိများသွားခဲ့ခြင်းဖြစ်သည်။
ပြည်ပတွင် ၉ နှစ်ကြာ အလုပ်လုပ်ကိုင်ကာ စုဆောင်းမိပြီး ထိုင်းသို့ ပြန်လာသည်မှာ တစ်နှစ်ဝန်းကျင်သာ ရှိသေးသူ ဆူဝပ်က မိမိထံ ကျားဖြန့်လူလိမ်များ၏ ဖုန်းခေါ်ဆိုမှုများ ယခင်ရှိခဲ့သော်လည်း ကြိုသိနေသဖြင့် ပြဿနာမရှိခဲ့ကြောင်း၊ သို့သော် ယခု လိမ်လည်မှုသည် မိမိအား ပူးပေါင်းဆောင်ရွက်စေလိုစိတ်၊ ကြောက်စိတ်၊ ခိုင်းစေသမျှ လိုက်နာစေရန်စိတ်မျိုးများ ပေါ်သည်အထိ အကွက်ချကာ မယုံမရှိဖြစ်ရလေရန် အပိုင်လိမ်လည်ခြင်းမျိုးဖြစ်သဖြင့် အံ့ဩရကြောင်း ဖွင့်ဟခဲ့သည်။
လိမ်လည်ပုံမှာ ဧပြီ ၅ ရက်က ကျားဖြန့်လူလိမ်တစ်ယောက် ဖုန်းခေါ်ဆိုလာပြီး သူသည် DSI မှ အရာရှိ ဖြစ်ကြောင်း၊ မကြာသေးခင်က ဖမ်းဆီးခံရသော နိုင်ငံသိ နိုင်ငံရေးသမားဟောင်းနှင့်ပတ်သက်သည့် ဘဏ်အကောင့်ကို ဆူဝပ်က ဖွင့်လှစ်ထားသဖြင့် အမှုကြီးစွာ ပတ်နေကြောင်း ခြိမ်းခြောက်လာသည်ဟု ဆိုသည်။
ထို့နောက် Line တွင် သူငယ်ချင်းအဖြစ် ထိုသူကို လက်ခံကာ ဗီဒီယိုကောပင်ပြောဆိုပြီးနောက် အမှုတွဲသံသယတရားခံဖြစ်စေသည့် စာရွက်စာတမ်းများကိုပါ အခိုင်အမာသဖွယ် ထုတ်ပြလာကြောင်း၊ ငွေကြေးလမ်းကြောင်း စစ်ဆေးရန်အတွက် ဘဏ်အတွင်းရှိ ငွေများကို စစ်ဆေးခံရန်လွှဲပေးရမည်ဖြစ်ကာ အမှုကြီးသည့်အတွက် အခန်းတစ်ခန်းထဲတွင် ကိုယ်တိုင် အပြင်ထွက်ခွင့်မရဘဲ ပိတ်လှောင်ခံ စုံစမ်းနေရခြင်းဖြစ်သည်ဟု ပြောကြောင်း၊ အခြား DSI ဌာနမှ အရာရှိများဟန်ဆောင်သူ အမျိုးသမီးသံများနှင့်ပင် အမှုကို အဟုတ်ရှိသည့်အတိုင်းဆင်ကာ ဖုန်းဆက်ခဲ့ပြီး ၇ ရက်၊ ၇ ညလုံး ငွေများ ၁၁ ကြိမ် လွှဲပြောင်းပေးအပ်စေခဲ့ရာ စုစုပေါင်း ဘတ် ၈ . ၄၆ သန်း ပါသွားခဲ့ကြောင်း၊ ထိုမျှနှင့် အားမရသေးဘဲ ဘတ် ၇ သန်းတန် ကွန်ဒိုခန်းကို ပေါင်နှံခြင်းပြုလုပ်ကာ ထိုငွေများကိုပါ လွှဲပေးရန် ခိုင်းစေမှုအား ကြောက်ရွံ့စိတ်ဖြင့် လိုက်လုပ်ခဲ့ရာ ပေါင်နှံ့မှုမအောင်မြင်သောကြောင့်သာ ကံကောင်းခဲ့ ကြောင်း ရှင်းလင်းပြောကြားခဲ့သည်။
ထိုင်းနိုင်ငံသည် လက်ရှိတွင် မြန်မာနယ်စပ်ရှိ ကျားဖြန်လုပ်ငန်းများအား စီမံကိန်းချပြီး တရုတ်အပါ အာဆီယံ နိုင်ငံများနှင့် ပူးပေါင်းနှိမ်နင်းနေသည်ဆိုသော်လည်း ထိုင်းနိုင်ငံအတွင်း ယခုလို အစိုးရ အုပ်ချုပ်ရေးအဖွဲ့အစည်းများနာမည်ပါ အသုံးချပြီး ဘတ်သန်းပေါင်းများစွာ လိမ်လည်ခံရမှုများ ပပျောက်သွားခြင်းမရှိသေးသည့်အတွက် ဝေဖန်မှုများလည်း ဆက်တိုက် ထွက်ပေါ်နေသည်။
ကိုကလင်း
Ref:Bangkokpost
#MeKongNews
#ကျားဖြန့်
#ထိုင်းနိုင်ငံ
#ဘဏ်အကောင့်
#ကွန်ဒို
