မဲခေါင်၊ ဧပြီ ၂၈
တောင်တရုတ်ပင်လယ်အတွင်းရှိ အငြင်းပွားဖွယ် ကျောက်တန်းငယ်လေးတွင် ဧပြီ ၂၆ ရက်နေ့က တရုတ်ကမ်းခြေစောင့်တပ်ဖွဲ့သည် တရုတ်အလံ လွင့်ကာ ၎င်းတို့ပိုင်နက်အဖြစ် သိမ်းပိုက်ကြောင်း သက်သေပြခဲ့သည်။
တရုတ်အစိုးရက စတုယန်းမီတာ ၂၀၀ သာရှိသည့် သဘာ၀ သဲကျောက်တန်းကို Tiexian Jiao ကျောက်တန်းဟု ပြီးခဲ့သည့်လက တရုတ်နာမည်မှည့်ခေါ်ခဲ့ကာ Spratly ကျွန်းဆက် ကျောက်တန်း ဖြစ်သလို ထိုင်ဝမ်၊ ဗီယက်နမ်နှင့် ဖိလစ်ပိုင်တို့ကလည်း ၎င်းတို့ပိုင်နက်ဖြစ်သည်ဟု သတ်မှတ်ထား သဖြင့် အငြင်းပွားဖွယ်ရာများစွာ ရှိနေသော ကျောက်တန်းဖြစ်သည်။
နိုင်ငံတကာအခေါ် Sandy Cay ကျောက်တန်းနှင့် ၃ ကီလိုမီတာအကွာ၌ မနီလာတွင် ပက္ကဆာဟုခေါ်သော Thitu ကျွန်းလည်း ရှိနေ ကာ ထိုကျွန်းပေါ်တွင် ဖိလစ်ပိုင် စစ်အခြေစိုက်စခန်းနှင့် စစ်သုံးလေယာဉ်ပြေးလမ်းလည်းရှိပြီး နေထိုင်သူ ၂၅၀ ရှိသည့်အတွက် ပိုင်နက်အငြင်းပွားဖွယ်ရာ ပြဿနာများ ပိုမို ဖြစ်ပွားလာတော့မည် ဖြစ်သည်။
တရုတ်သည် နှစ်စဉ်ဒေါ်လာ ထရီလီယံပေါင်းများစွာ တန်ကြေးရှိသော ရေကြောင်းကုန်သွယ်မှုရှိ သည့် တောင်တရုတ်ပင်လယ်တစ်ခုလုံးနီးပါး ၎င်းတို့ ပိုင်နက်အဖြစ် ကြွေးကျော်ကာ ၂၀၁၃ မှ ၂၀၁၆ အကြား ပိုင်နက်သိမ်းစုခြင်းလုပ်ငန်းများ လုပ်ဆောင်ကာ ကျွန်းတုများတွင် စစ်အခြေစိုက်စခန်းများ တည်ဆောက်ပြီး ရေပိုင်နက်စိုးမိုးရေး အတင်းအကျပ်လုပ်ဆောင်ခဲ့သည်။
၂၀၂၁ ကမ်းခြေစောင့်တပ် ဥပဒေသစ်ပြဌာန်းမှုတွင်လည်း ၎င်းတို့ ပိုင်နက်ဟုသတ်မှတ်သည့်နေရာများအတွင်း ဝင်ရောက်သူများကို လက်နက်အသုံးပြုတိုက်ခိုက်ခွင့်ပြုကာ ဖိလစ်ပိုင် သင်္ဘောများကို အကြမ်းဖက်မောင်းထုတ်ခြင်းများ ဆက်တိုက်လုပ်ဆောင်သဖြင့် ဆက်ဆံရေးတင်းမာမှုများ မြင့်တက်ချိန် ယခု ကျောက်တန်းငယ်ကို ပါ သိမ်းပိုက်လိုက်ခြင်းဖြစ်သည်။
ယင်း Sandy Cay ကျွန်းအနီးရှိ Subi ကျောက်တန်းတွင်လည်း တရုတ်သည် ဒုံးကျည်အခြေစိုက် စခန်းတည်ဆောက်ကာ ပြေးလမ်းမီတာ ၃၀၀၀ ရှိသော လေယာဉ်ကွင်း၊ ရေနက်ဆိပ်ကမ်း တည် ဆောက်ထားပြီးဖြစ်ရာ ဖိလစ်ပိုင်နှင့် မဟာမိတ် အမေရိကန်နှင့်လည်း ထိပ်တိုက်ရင်ဆိုင်လာခြင်း ဖြစ်သည်ဟု သုတေသီများက သုံးသပ်နေကြသည်။
ကိုကလင်း
Ref: japantimes
#MeKongNews
#ဖိလစ်ပိုင်
#တရုတ်
#မနီလာ
#တောင်တရုတ်ပင်လယ်
