မဲခေါင်၊ မတ်၂ ၁
ရှမ်းပြည်တောင်ပိုင်း၊ အောင်ပန်းမြို့၌ ပြည်ပသို့ နွားမှောင်ခိုတင်ပို့မှု များပြားပြီး နွားရှားပါးနေသဖြင့် အသားပေါ်ရာတွင် နွားအစား ကျွဲများပေါ်ရောင်းနေသလို အသားစျေးများလည်း မြင့်မားလာနေကြောင်း ဒေသခံများထံက သိရသည်။
အောင်ပန်းဒေသမှ နွားများ အပါအဝင် အသားလိုအပ်ချက်အတွက် အကြောင်းပြကာ ပြည်မဘက်မှ တင်သွင်းလာသည့် နွားများထဲမှ အားလုံးနီးပါးမှာ တရုတ်နှင့် ထိုင်းနိုင်ငံထံသို့ မှောင်ခိုပို့ဆောင်နေသည့်အတွက် နွားရှားပါးလာခြင်းဖြစ်ကြောင်း အောင်ပန်းဒေသခံတစ်ဦးက ပြောသည်။
“ကန်ထရိုက်က ရောင်းရဖို့ထက် မှောင်ခိုသယ်ခွင့်က အရေးကြီးတာ၊ လမ်းဘယ်လောက်ပိတ်ပိတ် သူတို့လမ်းနဲ့သူတို့ သွားနေတာ။ စည်ပင်နဲ့လက်ဝါးချင်းရိုက်ထားသလို တိမွေးကုကလည်း သားသတ်လက်မှတ်ကို ငွေယူပြီး လက်မှတ်ထုတ်ပေးနေတော့ ခေါင်းနဲ့သားရေပြရောင်းရမယ်ဆိုပေမယ့် အဲဒါတွေ မရှိဘဲ ကျွဲတွေ ပေါ်ရောင်းနေတာ” ဟု ၎င်းက ပြောသည်။
အောင်ပန်း၌ လွန်ခဲ့သည့် ၆ လခန့်က အမဲသား တစ်ပိဿာကျပ် ၁၆၀၀၀ မှ ယခု ၃၂၀၀၀၊ အရိုးကပ်အသား ယခင် ၂၀၀၀ ကျပ်မှ ယခု ၈၀၀၀၊ ဝမ်းတွင်းသားအူစုံ ယခင် ကျပ် ၁၀၀၀၀ မှ ယခု ၁၆၀၀၀ စျေးရှိနေသဖြင့် စားသုံးသူပြည်သူများ ဝယ်ယူစားသုံးနိုင်မှု နည်းပါးလာနေရသည်ဟု သိရသည်။
အသားအကြောင်းပြကာ ပြည်မဘက်မှသယ်လာသည့် နွားကား အနည်းဆုံး ၃ စီးမှ ၆ စီးခန့် တစ်ပတ်လျင် တစ်ခေါက် အောင်ပန်းမှ ဗထူး၊ ရပ်စောက်၊ အင်တောဘက်ထွက်နေသည်ဟု ဒေသခံများကဆိုသည်။
နွားစျေးများကို အောင်ပန်း၊ တောင်နီ၊ ဟဲဟိုးများ၌ တစ်တပတ်တစ်ရက်ပြုလုပ်နေပြီး တရုတ်မှ နွားထီးများသာဝယ်ယူသည့်အတွက် နွားထီးဈေးမှာ နွားမဈေးထက် ၂ ဆပိုများကြောင်း၊ နွားထီးစျေးမှာ ကောင်းရင် ကောင်းသလို တစ်ကောင်လျင် ကျပ် သိန်း ၆၀ မှ ၁၀၀ ကျော်အထိ ရှိနေပြီး နွားမစျေးမှာ တစ်ကောင်လျင် ကျပ် သိန်း ၂၀ နှင့် ၃၀ အကြားရှိကြောင်း သိရသည်။
အောင်ပန်းဒေသ၌ ဆိတ်သားမှာလည်း တစ်ပိဿာလျင်ယခင်ကျပ် ၂၆၀၀၀ မှ ယခု ၄၄၀၀၀ ကျပ် ၊ အရိုးအသား ၂၄၀၀၀ ကျပ်၊ ဝက်သား ယခင်ကျပ် ၂၄၀၀၀ မှ ယခု ၃၂၀၀၀ အထိ ၆ လကျော်ကာလအတွင်း တစ်လလျင် ကျပ် ၂၀၀၀ နှုန်းခန့်ဖြင့် မြင့်တက်လာနေကြောင်း သိရသည်။
မဟာ
#MeKongNews
#အောင်ပန်း
#နွားမှောင်ခို
#အမဲသား
#ကန်ထရိုက်
#ဈေးတက်
