မဲခေါင်၊ မတ် ၁၀
ထိုင်းတောင်ပိုင်း ပတာနီခရိုင် ဆိုင်ဘူရီနှင့် နာရာသီဝပ်ခရိုင် ဆန်ဂိုင်းကိုလက် နှစ်နေရာ မတ် ၉ ရက်တွင် အကြမ်းဖက်တိုက်ခိုက်ခံရမှုကြောင့် အရပ်ဘက် လုံခြုံရေးဝန်ထမ်း ၅ ဦး သေဆုံး ၁၃ ယောက် ဒဏ်ရာရမှုကို အမှတ်(၄)တပ်မတော် တိုင်းစစ်ဌာနချုပ် တိုင်းမှူး ဒုတိယဗိုလ်ချုပ်ကြီး ပိုင်ဆန်နူဆန် သွားရောက် စစ်ဆေးခဲ့ပြီး လုံခြုံရေးတိုးမြှင့်ရန် မှာကြားခဲ့သည်။
ကားအတွင်း ၁၀၀ ကီလိုဂရမ်ဂတ်စ်အိုးနှင့် ပေါက်ကွဲစေမည့် ယမ်းများ၊ အဝေးထိန်းရေဒီယိုအချက်ပြစနစ် အသုံးပြုထားသော ကားနှင့် တိုက်ခိုက်ဖောက်ခွဲခဲ့ရာ မီတာ ၁၀၀ အချင်းအထိ ပြင်းထန်စွာ ပေါက်ကွဲခဲ့ပြီး အစိုးရ အဆောက်အအုံရုံးများ ပျက်ဆီးမှုဖြစ်ခဲ့သလို ဒေသခံ လုံခြုံရေး ၅ ယောက် သေဆုံးကာ ၁၃ ယောက် ဒဏ်ရာရခဲ့ခြင်း ဖြစ်သည်။
မလေးရှားနယ်စပ် အငြင်းပွားဖွယ်ရာ နယ်မြေပိုင်ဆိုင်မှုပြဿနာရှိနေခြင်းကြောင့် မကြာခဏ အကြမ်းဖက် တိုက်ခိုက်မှုများရှိနေသော အဆိုပါဒေသတွင် ယခင် ရာမာဒန်ဥပုသ်လ နှောင်းပိုင်းများ၌ အကြမ်းဖက် တိုက်ခိုက်လေ့ရှိသော်လည်း ယခုနှစ်တွင် ရာမာဒန်ဥပုသ်လ အစမှာပင် အကြမ်းဖက်တိုက်ခိုက်လာသဖြင့် လုံခြုံရေးအင်အားတိုးမြှင့်ထားရှိပြီး အစိုးရ အဆောက်အအုံနှင့် ရုံးများအတွင်း ပြင်ပယာဉ်များ ဝင်ခွင့်မပြုတော့ဘဲ အနီးအနားသွားလာသော ကားများအားလုံးကိုပါ ၂၄ နာရီ လုံခြုံရေးချထားပြီး စောင့်ကြည့်ရန်နှင့် မသင်္ကာဖွယ်ရာ တွေ့မြင်လျှင် ပြည်သူများ အကြောင်းကြားရန် ပိုင်ဆန်နူဆန်က မှာကြားခဲ့သည်။
မတ် ၉ ရက်တွင် ဂျာမနီမှ ဘန်ကောက်လေဆိပ်သို့ ပြန်ရောက်လာသော ထိုင်းဝန်ကြီးချုပ် ပေထောင်တန် ကလည်း ထိုအဖြစ်ဆိုးအတွက် လေဆိပ်ရောက်သည်နှင့် မိသားစုဝင်များနှင့်အတူ ဝမ်းနည်း စိတ်မကောင်းဖြစ်ရကြောင်း ထုတ်ပြန်သလို လုံခြုံရေးတိုးမြှင့်ထားရှိရန် ထုတ်ပြန်မှာကြားခဲ့သည်။
Ref:Khaosod
ကိုကလင်း
#MeKongNews
#ထိုင်းတောင်ပိုင်း
#တိုက်ခိုက်
#အကြမ်းဖက်
#လုံခြုံရေး
#တိုးမြှင့်
