မဲခေါင်၊ဖေဖော်ဝါရီ ၁၀

ရှမ်းပြည်အရှေ့ပိုင်း၊ တာချီလိတ်မြို့၌ ယမန်နေ့(ဖေဖော်ဝါရီလ ၉) တစ်ရက်အတွင်း ကျပ်သိန်းပေါင်း ၁၀၀၀ နီးပါးခန့်တန်ကြေးရှိ စိတ်ကြွရူးသွပ်ဆေးပြားများအား စစ်ကောင်စီလက်အောက်ခံ မူးယစ်းဆေးဝါးတားဆီးနှိမ်နင်းရေးအဖွဲ့က ဖမ်းမိကြောင်းထုတ်ပြန်သည်။

ယမန်နေ့၊ နေ့လယ် ၃ နာရီခန့်တွင် တာချီလိတ်မြို့နယ်၊ ဆေခမ်းရပ်ကွက်၊ မြို့ရှောင်လမ်းပေါ်၌ ဇော်ထိုက်(ခ)ကပြားဆိုသူထံမှ ကျပ် ၂၈ သိန်းတန်ဖိုးရှိ စိတ်ကြွဆေးပြား ၄,၀၀၀ ပြားဖမ်းမိသည်။

၎င်းထွက်ဆိုချက်အရ နေ့လယ် ၃ နာရီ ခွဲခန့်တွင် ဇော်ထိုက်နေထိုင်ရာ ဆေခမ်းရပ်ကွက်နေအိမ်၌ ကျပ် ၄၂ သိန်းတန်းဖိုးရှိ စိတ်ကြွဆေးပြား ၆,၀၀၀ ပြားထပ်မံဖမ်းမိသည်။

အလားတူ တာချီလိတ်မြို့၊ရန်အောင်မြေရပ်ကွက်၊ မယ်ဆိုင်ရေချောင်းဘေး၌ မျိုးအောင်(ခ)သားငယ်(ခ)ရှမ်းကုလားဆိုသူ၏ နေအိမ်အား ဝင်ရောက်ရှာဖွေရာ ကျပ်သိန်း ၉၂၀ တန်ဖိုးရှိ စိတ်ကြွဆေးပြား ၂၃၀,၀၀၀ ပြားဖမ်းမိသည်။

ပြီးခဲ့သည့် ဇန်နဝါရီလ ၁၆ ရက်နှင့် ၁၇ ရက်တွင်လည်း ရှမ်းပြည်နယ်အရှေ့ပိုင်း၌ နှစ်ရက်အတွင်း ကျပ်သိန်းပေါင်း ၄,၀၀၀ ကျော်တန်ကြေးရှိ မူးယစ်ဆေးဝါးများဖမ်းဆီးရမိခဲ့သည်။

စစ်ကောင်စီနှင့် ၎င်း၏လက်အောက်ခံမူးယစ်းဆေးဝါးတားဆီးနှိမ်နင်းရေးအဖွဲ့သည် မူးယစ်ဆေးသယ်ယူပို့ဆောင်သူနှင့် ရောင်းချသူများကိုသာ ဖမ်းဆီးနိုင်ပြီး မူးယစ်ဆေးထုတ်လုပ်သူများကို ဖမ်းဆီးနှိမ်နင်းနိုင်ခြင်းမရှိသေးချေ။

ဂနိုက်
#MeKongNews
#တာချီလိတ်
#မူးယစ်ဆေး
#ထုတ်လုပ်သူ
#မဖမ်းနိုင်သေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)