မဲခေါင်၊ ဖေဖော်ဝါရီ ၉
ထိုင်းအတိုက်အခံ ပြည်သူ့ပါတီ (ယခင် MFP) မှ နာမည်ကြီး လွှတ်တော်အမတ် ရန်ဆီမန်ရုမ်းက ၎င်း၏ ဖေ့စ်ဘုတ်စာမျက်နှာတွင် ကရင်နယ်ခြားစောင့်တပ် (BGF) ခေါင်းဆောင် စောချစ်သူကို ဖမ်း၀ရမ်းထုတ်သည့် စာသားနှင့်ပုံတင်ပြီး ထိုင်းအစိုးရအနေဖြင့် ကျားဖြန့်နှိမ်နင်းနေရာမှာ ယခုလောက်နှင့် မရဘဲ အဓိကခေါင်းဆောင် စောချစ်သူကို ဖမ်းဆီးသင့်ကြောင်း တိုက်တွန်းရေးသားသည်။
မင်းအောင်လှိုင်နှင့်နီးစပ်သည့် ထွန်းမင်းလတ်ကိုလည်း မူးယစ်ဆေးမှ ရသည့်ငွေနှင့် တာချီလိတ်တွင် ထိုင်းထံမှ လျှပ်စစ်မီးဝယ်ယူသည်ဆိုသော စွဲချက်ကို အထောက်အထားများနှင့် တင်ပြကာ ဖမ်းဆီးစေနိုင်ခဲ့သူ (သို့သော် ထိုင်းတရားရုံးမှ လွှတ်ပေး) ရန်ဆီမန်ရုမ်းက ဖေဖော်ဝါရီ ၉ ရက်၌ ဖေ့စ်ဘုတ်တင် ရေးတင်ခဲ့ရာမှာ စောချစ်သူ သည်ကျားဖြန်လုပ်ငန်းများ၏ အဓိက ဂိုဏ်းခေါင်းဆောင်ဖြစ်ကြောင်း၊ တရုတ်ကျားဖြန်သမားများကို စောချစ်သူ ကိုယ်တိုင်ခေါ်ယူကာ ရွှေကုက္ကိုလ်မြို့သစ်စီမံကိန်းဟန်ပြပြီး ထိုင်းသာမက တစ်ကမ္ဘာလုံးကို ဒုက္ခပေးနေသည့် ဒုစရိုက်လုပ်ငန်း၌ ရင်းနှီးမြှုပ်နှံခဲ့သူဖြစ်ကြောင်း၊ ငွေသာလိမ်သည်မဟုတ်ဘဲ လူများကို ကျွန်များသဖွယ် ရက်စက်စွာ ဖမ်းဆီးနှိပ်စက်ခိုင်းစေသူဖြစ်ကြောင်း၊ မီးဖြတ်၊ ဆီဖြတ်ယုံဖြင့် ကျားဖြန့်နှိမ်နင်းမှုများနှင့် အဆိုပါ ဒုစရိုက် ဂိုဏ်းများကိစ္စ အဆုံးသတ်သွားမည်မဟုတ်ကြောင်း၊ ထိုင်းအစိုးရက စောချစ်သူကို ဖမ်းဆီးနိုင်မှသာ ဖြစ်မည်ဟု ရန်ဆီမန်ရုမ်းက ရေးသားထားသည်။
ထိုင်းနိုင်ငံအစိုးရအဖွဲ့အတွင်းမှ အကြီးတန်းအရာရှိများစွာ၊ အထူးသဖြင့် ရဲတပ်ဖွဲ့အကြီးတန်းအရာရှိများစွာသည်လည်း စောချစ်သူ၏ ကျားဖြန်လုပ်ငန်းများနှင့် ပတ်သက်ကာ စီးပွားဖြစ်နေသည်ကို ငွေကြေး စီးဆင်းမှုများအရ သိထားရပြီး စောချစ်သူထံတွင် ထိုင်းမှ မည်သည့် အကြီးအကဲများ ဒုစရိုက်ကွန်ရက်ထဲ ပါဝင်နေသည်ဆိုသော အထောက်အထား အချက်အလက်များစွာလည်း ကိုင်ထားသဖြင့် စောချစ်သူကို မိလျှင် ခဲတစ်လုံးနှင့် ငှက် တစ်ကောင်သာမက၊ ၁၀ ကောင်သာမက အကောင် ၁၀၀ အထိ ထိမှန်စေရန် ပစ်ခတ်ခြင်းဖြစ်မည်ဟု ရန်ဆီမန်ရုမ်းက တိုက်တွန်းရေးသားသွားခဲ့သည်။
BGF ခေါင်းဆောင်တစ်ဦးဖြစ်သည့် နိုင်မောင်ဇော်ကလည်း ထိုင်းမီဒီယာတွင် မိမိတို့ BGF သည် ဒေသတွင်း ဖွံ့ဖြိုးရေး၊ အလုပ်အကိုင်အခွင့်အလမ်းများ ပွင့်လာမှသာလျှင် ပြည်သူများ အလုပ်အကိုင်ရရှိစေရေး၊ ကရင်ပြည်နယ် တွင် အခြေခံ အဆောက်အအုံအလုပ်အကိုင်များ၊ လမ်းများ ကောင်းမွန်လာရေးကို ရည်ရွယ်ကာ တရုတ်သူဌေး နှင့် ရွှေကုက္ကိုလ်မြို့သစ်စီမံကိန်းကို ကာစီနိုနှင့်ဖျော်ဖြေရေးလုပ်ငန်းအဖြစ် ငှားရမ်းခဲ့ခြင်းသာဖြစ်ပြီး နောက်မှ ကျားဖြန့်လုပ်နေမှန်း သိလာရကြောင်း၊ ထိုစီမံကိန်းမှ ရရှိသော ငွေကြေးနှင့် ဒေသတွင်း အခြေခံအဆောက်အအုံ များ တိုးတက်ထွန်းကာလာခြင်းကြောင့် ကျားဖြန်လုပ်ငန်းများမှာ လက်ရှိတွင် မိမိတို့ ထိန်းချုပ်နယ်မြေ တစ်ခု တည်း၌သာမဟုတ်တော့ဘဲ များစွာ ပွားများလာသောကြောင့် တစ်ဖွဲ့တည်း မတိုက်ဖျက်နိုင်ဖြစ်နေရသည်ဟု ဖွင့်ဟသွားခဲ့သည်။
ကိုကလင်း
Ref: Amarin News
#MeKongNews
#ကျားဖြန့်
#စောချစ်သူ
#BGF
#နှိမ်နင်းရေး
#ရန်ဆီမန်ရုမ်း
