မဲခေါင်၊ ဇန်နဝါရီ ၃၁
ကရင်နီပြည် နေရာအနှံ့အပြားမှာ ၂၀၂၄ ခုနှစ် တစ်နှစ်အတွင်း စစ်ကောင်စီ ကျူးလွန်တဲ့ အမှုတွေထဲမှာ လူ့အခွင့်အရေး ချိုးဖောက်မှုကအများဆုံးအဖြစ် ၁၀၈ မှုကျူးလွန်ခဲ့တယ်လို့ ကရင်နီပြည်ကြားကာလစီမံအုပ်ချုပ်ရေးကောင်စီ IEC က ဒီနေ(ဇန်နဝါရီလ ၃၁ ) ထုတ်ပြန်ထားပါတယ်။
၂၀၂၄ ခုနှစ်အတွင်း လေကြောင်းကနေ ဗုံးကြဲတိုက်ခိုက်မှု ၂၅ ခု၊ လက်နက်ကြီးနဲ့ ပစ်ခတ်တိုက်ခိုက်မှု ၄၆ ခု၊ ဒရုန်း နဲ့ ဗုံးသီးချတိုက်ခိုက်မှု ၁၁ ခု၊ ပြည်သူတွေကိုဖမ်းဆီးသတ်ဖြတ်တာနဲ့ မြေမြှုပ်မိုင်းကြောင့် သေဆုံးရမှု ၂၆ ခု၊ လူအခွင့်အရေးချိုးဖောက်မှုပေါင်း ၁၀၈ ခုကို စစ်ကောင်စီတပ်က ကျူးလွန်ခဲ့တာပါ။
“လူ့အခွင့်အရေးချိုးဖောက်မှုတွေကို လျစ်လျူမရှူဘူး၊ ချိုးဖောက်မှုတွေကို တာဝန်ခံရမယ်၊ စစ်ကောင်စီကို မေ့ပျောက်မှာမဟုတ်ဘူး၊ အပြစ်ပေးအရေးယူမှုတွေကိုလည်း ပြည်နယ် အတိုင်းအတာအဆင့်ဖြစ်စေ၊ ပြည်ထောင်စုအဆင့်ဖြစ်စေ၊ နိုင်ငံတကာ အဆင့်ဖြစ်စေ ဆက်တိုက်သွားနေတယ်ဆိုတာကိုလည်း သိစေလိုပါတယ် “လို့ IEC အတွင်းရေးမှူး (၂) ဦးဗညားကပြောပါတယ်။
လေကြောင်းကနေ ဗုံးကြဲတိုက်ခိုက်တာ၊ လက်နက်ကြီးနဲ့ပစ်ခတ်တာ၊ ဒရုန်းဗုံးသီးချတိုက်ခိုက်တာကြောင့် တစ်နှစ်အတွင်း အမျိုးသား ၇၅ ဦး၊ အမျိုးသမီး ၄၈ ဦး၊ အသက်မပြည့်သေးတဲ့ကလေးငယ် ကျား ၁၈ ဦး၊ မ ၂၁ ဦး၊ အမည်မသိ ၃ ဦး၊ စုစုပေါင်း ၁၀၆ ဦးသေဆုံးခဲ့ရကာ ထိခိုက်ဒဏ်ရာရရှိခဲ့တဲ့ အရပ်သားပြည်သူ ၄၅၀ ထိရှိတယ်လို့ ထုတ်ပြန်ထားပါတယ်။
၂၀၂၄ ခုနှစ်၊ ဖေဖော်ဝါရီလထဲမှာ ဒေါဆီးအီနဲ့ လွိုင်နန်းဖက စာသင်ကျောင်းကို ဗုံးကြဲလို့ ကျောင်းသား လေး ဦးသေဆုံးပြီး ဆရာ၊ဆရာမ နဲ့ ကျောင်းသား ၂၈ ဦး ဒဏ်ရာရကာ စာသင်ဆောင်၊ ဆရာ၊ ဆရာမ နေအိမ်၊ ဘုရားကျောင်းနဲ့ ဒေသခံနေအိမ်တို့ပျက်စီးခဲ့ရတဲ့အပြင် စက်တင်ဘာလမှာ ဘန်ကောက်စစ်ရှောင်စခန်းကို ဗုံးကြဲလို့ အသက်၁၈ နှစ်အောက်ကလေး ခြောက်ဦး အပါအဝင် ကိုးဦး သေဆုံးပြီး ၁၀ ဦးဒဏ်ရာရရှိခဲ့ပါတယ်။
ဒါ့အပြင် ၂၀၂၄ ခုနှစ်၊ ဖေဖော်ဝါရီလထဲမှာ ရှားတော ဆိုမို၊ ဖေစိုးလေးကျေးရွာက ပြည်သူ ခုနှစ်ဦးကို လမ်းပြအနေနဲ့ခေါ်ဆောင်သွားခဲ့ပြီး ကိုယ်ဝန်ဆောင်အမျိုးသမီးပါမချန် သတ်ဖြတ်တာတွေကိုလည်း စစ်ကောင်စီတပ်က ကျူးလွန်ခဲ့ပါတယ်။
စစ်ကောင်စီရဲ့ လူ့အခွင့်အရေးချိုးဖောက်မှုတွေ၊ ပြစ်မှုကျူးလွန်တာတွေကို ရပ်တန့်စေဖို့အတွက် စစ်ကောင်စီကို လေယာဉ်ဆီ ရောင်းချတာ ရပ်တန့်ဖို့၊ ပြည်သူပိုင် အိုးအိမ်နဲ့ ဘာသာရေးအဆောက်အအုံ၊ စာသင်ကျောင်းတွေကို ပစ်မှတ်ထားတိုက်ခိုက်တာ ရပ်တန့်စေဖို့၊ စစ်ကောင်စီအတွက် နည်းပညာနဲ့ လက်နက်ခဲယမ်းထောက်ပံ့တာ ရပ်တန့်ဖို့၊ စစ်ကောင်စီ ကိုယ်စားလှယ်တွေကို နိုင်ငံတကာအစည်းအဝေးတွေမှာ ဖိတ်ကြားမှုမပြုဖို့၊ စစ်ကောင်စီပြုလုပ်တဲ့ ရွေးကောက်ပွဲကို အသိအမှတ်မပြုဖို့ နိုင်ငံတကာကို တောင်းဆိုတယ်လို့ထုတ်ပြန်ချက်မှာ ဖေါ်ပြထားပါတယ်။
စစ်ကောင်စီနဲ့ပတ်သတ်ဆက်နွယ်နေတဲ့ မူးယစ်ဆေးဝါးရောင်းဝယ်မှုတွေ၊ လူကုန်ကူးမှုတွေ၊ ကျားဖြန့်ငွေလိမ်လည်မှုတွေကို တားဆီးတိုက်ဖျက်ဖို့နဲ့ လူသားချင်းစာနာထောက်ထားရေးအကူအညီတွေ၊ ပြန်လည်ထူထောင်ရေးအစီအမံတွေမှာ ပိုမိုအားကောင်းလာစေဖို့ ကူညီပေးဖို့ကိုလည်း နိုင်ငံတကာကို အကြံပြုထားပါတယ်။
CJ-004
#MeKongNews
#IEC
#၂၀၂၄ခုနှစ်
#စစ်ကောင်စီကျူးလွန်
#လူ့အခွင့်အရေး
