မဲခေါင်၊ ဇန်နဝါရီ ၂၈
စစ်ကောင်စီရဲ့လေကြောင်းတိုက်ခိုက်မှု ကာကွယ်တဲ့အနေနဲ့ TNLA ထိန်းချုပ်နယ်မြေဖြစ်တဲ့ ရှမ်းပြည်မြောက်ပိုင်း၊ ကျောက်မဲမြို့အတွင်း ဖုန်း၊ အင်တာနက် အသုံးပြုမှုကို ကျောက်မဲမြို့အုပ်ချုပ်ရေးအဖွဲ့က ယာယီကန့်သတ်ပိတ်ပင်လိုက်ပါတယ်။
ကျောက်မဲခရိုင်အတွင်းနေထိုင်ကြတဲ့ ဒေသခံပြည်သူတွေလုံခြုံရေးအတွက် အင်တာနက်ဆက်သွယ်ရေး Star Link နဲ့ CDMA ဖုန်း အသုံးပြုခွင့်ကို ယာယီကန့်သတ်ပိတ်ပင်တာဖြစ်ပြီး ထူထုအနေနဲ့ ပူးပေါင်းဆောင်ရွက်ပေးကြဖို့နဲ့ နောက်ဆက်တွဲ ထုတ်ပြန်ချက်တစ်စုံတစ်ခု မရှိမချင်း စည်းကမ်းချက်တွေကို လိုက်နာကြဖို့ ပလောင်ပြည်နယ်လွတ်မြောက်ရေးတပ်ဦး PSLF/TNLA ကျောက်မဲမြို့နယ် အထွေထွေအုပ်ချုပ်ရေးဦးစီးဌာနက ဒီကနေ့ (ဇန်နဝါရီ ၂၈)က ထုတ်ပြန်ပါတယ်။
“အခုလက်ရှိက အဆက်အသွယ်ပျက်တောက်တော့ ဆက်သွယ်လို့မရတဲ့အခြေအနေပေါ့၊ မြို့မှာကျန်ခဲ့တဲ့ မိသားစုကိုတောင် အခုဆက်သွယ်မရဖြစ်နေတယ်၊ ဖုန်းလိုင်း ဝိုင်ဖိုင်လိုင်းတွေက ပိတ်လိုက်ပြီ”လို့ ဒေသခံအမျိုးသားတစ်ဦးက မဲခေါင်ကိုပြောပါတယ်။
ပြည်သူ့လုံခြုံရေးအတွက် ချမှတ်ထားတဲ့စည်းကမ်းချက်တွေကို လိုက်နာဆောင်ရွက်မှုမရှိရင် ထိထိရောက်ရောက်အရေးယူ သွားမယ်လို့လည်း ထုတ်ပြန်ချက်မှာဖော်ပြထားပါတယ်။
“ကျောက်မဲမြို့က လမ်းပေါ်မှာ လူတောင်မရှိတော့ဘူးလို့ ကြားရတယ်၊ ပြည်သူတွေပဲ နစ်နာတယ်၊ မြို့မှာကျန်ခဲ့တဲ့ မိဘတွေကို ဘယ်လိုဆက်သွယ်ရမလဲ” လို့ အဝေးရောက် ဒေသခံအမျိုးသမီးတစ်ဦးက ပြောပါတယ်။
မနေ့က (ဇန်နဝါရီ ၂၇) နေ့လယ် ၂ နာရီကျော်က ကျောက်မဲမြို့၊ ခရိုင် အုပ်ချုပ်ရေးမှူးရုံးနဲ့ ညဈေးတန်းနေရာတွေကို စစ်ကောင်စီတပ်က ဗုံးသီးနှစ်လုံးကြဲချတိုက်ခိုက်ခဲ့မှုမှာ အရပ်သားတစ်ဦး သေဆုံးပြီး သုံးဦးဒဏ်ရာရရှိခဲ့တယ်လို့ TNLA က ထုတ်ပြန်ခဲ့ပါတယ်။
ဇန်နဝါရီလ ၂၅ ရက်ကလည်း ကျောက်မဲမြို့ဆေးရုံကို ဗုံးကြဲခဲ့တာကြောင့် CDM သူနာပြုဆရာမ နှစ်ဦးနဲ့ ဆေးကုသနေသူ တစ်ဦး သေဆုံးခဲ့ပြီး လူနှစ်ဆယ်ကျော်ဒဏ်ရာရခဲ့သလို လက်ရှိမှာ စစ်ကောင်စီက TNLA ထိန်းချုပ်ထားတဲ့ နောင်ချို၊ ကျောက်မဲ၊ မိုးကုတ်မြို့တွေကို နေ့စဉ်လိုလို ဗုံးကြဲတိုက်ခိုက်နေတာဖြစ်တယ်လို့ ဒေသခံတွေက ပြောပါတယ်။
စစ်ကောင်စီနဲ့ ကိုးကန့်တပ်မတော်(MNDAA) တို့ ဇန်နဝါရီလ ၁၈ ရက်မှာ အပစ်အခတ်ရပ်စဲပြီးနောက်ပိုင်း TNLA ထိန်းချုပ်ထားရာဒေသတွေကို စစ်ကောင်စီက နေ့စဉ်နီးပါး လေကြောင်းကနေ ဗုံးကြဲတိုက်ခိုက်နေတာပါ။
CJ-017
#MeKongNews
#ကျောက်မဲမြို့
#ဖုန်းအင်တာနက်
#အသုံးပြုခွင့်ပိတ်
#အုပ်ချုပ်ရေးအဖွဲ့
