မဲခေါင်၊ ဇန်နဝါရီ ၂၅
ပအိုဝ်းဒေသတိုက်ပွဲတွေမှာ စစ်ကောင်စီအသုံးပြုတဲ့ ကျည်အ(ပေါက်ကွဲခြင်းမရှိတဲ့ဗုံးသီး) ဓာတုအဆိပ်ဗုံးကို ပအိုဝ်းအမျိုးသားလွတ်မြောက်ရေးတပ်မတော် (PNLA) က ဇန်နဝါရီ ၂၄ ရက်မှာ တူးဖေါ်ရရှိခဲ့ပါတယ်။
စစ်ကောင်စီဟာ တိုက်ပွဲအတွင်းမှာ ဓာတုအဆိပ်ဗုံးအသုံးပြုခဲ့တာကြောင့် အဆိပ်ငွေ့ ရှုမိတဲ့ PNLA ရဲဘော်တွေဟာ ပြင်းထန်စွာ ဖျားနာတာနဲ့ အရေပြားယားယံတာတွေ ဖြစ်နေတယ်လို့ PNLA ပြောရေးဆိုခွင့်ရှိသူ ခွန်ရိနိးယံက မဲခေါင်ကို ပြောပါတယ်။
“သူတို့(စစ်ကောင်စီ) အဆိပ်သုံးတိုက်ခိုက်တာကတော့ အလုံးပေါင်းများစွာ ရှိပါတယ်၊ ဒါကတော့ မကွဲလို့ တူးဖော်ရရှိတဲ့ တစ်လုံးပါ” လို့ ပြောပါတယ်။
စစ်ကောင်စီက အခုလိုမျိုး ပြောင်းပြောင်တင်းတင်းနဲ့ အဆိပ်ဗုံးအသုံးပြုပြီး တိုက်ခိုက်လာတာဟာ လူသားမျိုးနွယ်အပေါ် ရာဇဝတ်မှုကျူးလွန်နေတာဖြစ်တယ်လို့ PNLA ပြောရေးဆိုခွင့်ရှိသူ ပြောပါတယ်။
“ဒါတွေက စစ်ကောင်စီနဲ့ စစ်ကောင်စီလက်ပါးစေ PNO ပြည်သူ့စစ်က ပအိုဝ်းလူမျိုးတွေကို အဆိပ်နဲ့ သတ်ဖို့ကြိုးစားနေတဲ့ လူမျိုးတုံးသတ်ဖြတ်မှုဖြစ်ပါတယ်” လို့ ပြောပါတယ်။
ဒါ့အပြင် စစ်ကောင်စီနဲ့ စစ်ကောင်စီရဲ့ လက်ပါးစေ PNO ပြည်သူ့စစ်က လူသားတွေအပေါ် ရာဇဝတ်မှုများစွာ ကျူးလွန်နေတဲ့အပေါ် မျက်စိပိတ်နားပိတ်နေနေတဲ့ နိုင်ငံတကာအဖွဲ့အစည်းတွေနဲ့ ကမ္ဘာ့ကုလသမဂ္ဂကို အံ့ဩတယ်လို့ သူကပြောပါတယ်။
စစ်ကောင်စီဟာ ပအိုဝ်းဒေသတိုက်ပွဲတွေမှာ အဆိပ်ဗုံးကို တောက်လျှောက်အသုံးပြုလာတာဖြစ်ပြီး အခုလိုပေါက်ကွဲအားမရှိတဲ့ ကျည်အကို အခုမှတွေ့ရှိခဲ့တာဖြစ်ပါတယ်။ ရှမ်းပြည်မြောက်ပိုင်း တိုက်ပွဲတွေမှာလည်း လေယာဉ်နဲ့ ဓါတုအဆိပ်ဗုံးကြဲချတိုက်ခိုက်တာတွေရှိခဲ့ပေမယ့် စစ်ကောင်စီရဲ့ ပြန်ကြားရေးဝန်ကြီးအဆင့်ရှိတဲ့ ဇော်မင်းထွန်းကတော့ ဓာတုအဆိပ်ဗုံးအသုံးမပြုဘူးလို့ မီဒီယာကိုငြင်းဆိုထားပါတယ်။
တူးဖေါ်ရရှိတဲ့ အဆိပ်ဗုံးမှာ အဆိပ်လို့ရေးသားထားတဲ့စာသားပါဝင်ပြီး ဗုံးသီးရဲ့နောက်ဘက်ပိုင်းမှာ အဆိပ်ထွက်ပေါက်လို့ယူဆရတဲ့ နှာပေါက်တွေပါရှိပါတယ်။
လက်ရှိမှာ စစ်ကောင်စီနဲ့ PNO ပြည်သူ့စစ်က PNLA ထိန်းချုပ်လှုပ်ရှားနေတဲ့ ဆီဆိုင်မြို့အရှေ့ဘက်ခြမ်းက ကျေးရွာတွေကို ပြန်လည်စိုးမိုးနိုင်ရေးအတွက် အင်အား ၇၀၀ ကျော်နဲ့ မြေပြင်ထိုးစစ်ဆင်နေသလို ဒရုန်းနဲ့ လေယာဉ်တွေကို အသုံးပြုပြီး ဗုံးကြဲတိုက်ခိုက်နေတဲ့အတွက် တိုက်ပွဲတွေဆက်ဖြစ်နေတယ်လို့ သိရပါတယ်။
ပြီးခဲ့တဲ့ ဇန်နဝါရီလ ၁၇ ရက်နေ့မှာလည်း ဆီဆိုင်မြို့အရှေ့ခြမ်းကို လူသားဒိုင်းအသုံးပြုပြီး အင်အားအလုံးအရင်းနဲ့ စစ်ကြောင်းထိုးလာတဲ့ စစ်ကောင်စီနဲ့ PNO ပြည်သူ့စစ်ပူးပေါင်းအဖွဲ့နဲ့ PNLA တိုက်ပွဲပြင်းထန်ခဲ့ပြီး စစ်ကောင်စီပူးပေါင်းအဖွဲ့က အင်အား(၁၃၀) ကျော် သေဆုံးခဲ့ပါတယ်။
MK-017
#MeKongNews
#PNLA
#စစ်ကောင်စီ
#ဓာတုအဆိပ်ဗုံး
#အသုံးပြုတိုက်ခိုက်
