မဲခေါင်၊ ဇန်နဝါရီ ၂၃
တရုတ်၊ ထိုင်း၊ မြန်မာ သုံးနိုင်ငံပူးပေါင်းပြီး တရားမဝင်အွန်လိုင်းလောင်းကစား၊ လူမှောင်ခို၊ မူးယစ်မှောင်ခို၊ ကျားဖြန်ငွေလိမ်လုပ်ငန်းတွေကို တိုက်ဖျက်လို့ ခေါင်းဆောင်တွေကို ဖမ်းဆီးဖို့အရေး ကူမင်းမှာ အစည်းအဝေး ပြုလုပ်သဘောတူညီခဲ့ပြီးနောက် စစ်ကောင်စီသတင်းစာမှာ ဒီလို နယ်စပ်ဖြတ်ကျော် ရာဇဝတ်မှုတွေလုပ်နေတာ အိမ်နီးချင်းနိုင်ငံတွေကနေ လာလုပ်နေတာလို့ စွပ်စွဲမှုဟာ ထိုင်းကို ရည်ညွှန်းသလိုဖြစ်နေတဲ့အတွက် ထိုင်းကာကွယ်ရေးဝန်ကြီးဌာနက ဇန်နဝါရီ ၂၃ ရက်နေ့မှာ ငြင်းချက်ထုတ်ပြန်သွားပါတယ်။
ထိုင်းတော်ဝင်စစ်တပ်အကြီးအကဲတွေနဲ့ စစ်ကောင်စီ ဒုချုပ် စိုးဝင်းအပါ မြန်မာစစ်တပ်အကြီးအကဲတွေဟာ ဇန်နဝါရီ ၂၁ ရက်နေ့က နေပြည်တော်မှာ ဒီအရေး နှစ်နိုင်ငံ ပူးပေါင်းဖြေရှင်းရေး ဆွေးနွေးခဲ့ပြီးနောက် ဇန်နဝါရီ ၂၂ ရက် မြန်မာ့အလင်းသတင်းစာမှာ ဒီလို နယ်စပ်ဖြတ်ကျော် ရာဇဝတ်မှုတွေ မြန်မာဘက်ခြမ်းမှာ ဖြစ်ပွားနေမှုဟာ အိမ်နီးချင်းနိုင်ငံတွေဘက်က ထောက်ပံ့နေမှု၊ ပါဝင်ပတ်သက်နေမှုတွေကြောင့် ဖြစ်တယ်လို့ အာဘော်အနေနဲ့ ထည်သွင်းဖော်ပြသွားမှုကို ထိုင်း ကာကွယ်ရေးဝန်ကြီးဌာန ပြောရေးဆိုခွင့်ရှိသူ ဒုတိယဗိုလ်ချုပ်ကြီး သာနာသစ် ဆာ၀န်ဆာအန်းက ငြင်းချက် ထုတ်ပြန်သွားတာဖြစ်ပါတယ်။
ဇန်နဝါရီ ၂၁ ရက်နေ့ နှစ်ဘက် စစ်တပ်အကြီးအကဲတွေ တွေ့ဆုံမှုဟာ နှစ်နိုင်ငံစလုံးရဲ့ လုံခြုံရေးကိုပါ အန္တရာယ် ပြုလာတဲ့ တရားမဝင်လောင်းကစား၊ အွန်လိုင်းလိမ်လည်မှု (ကျားဖြန်)၊ လူမှောင်ခို၊ တရားမဝင် ငါးဖမ်းမှုတွေကို အတူတကွ အနီးကပ်ပူးပေါင်း ဖြေရှင်းသွားဖို့ ဖြစ်ကြောင်း၊ ထိုင်းနိုင်ငံရဲ့ မူဝါဒဟာ မြန်မာ့အလင်းသတင်းစာမှာ ဖော်ပြသလို ဒီလို တရားမဝင် ရာဇဝတ်မှုတွေအပေါ် တစ်ဦးချင်းဖြစ်စေ၊ အဖွဲ့အစည်းလိုက်ဖြစ်စေ ထောက်ပံ့ ပေးနေမှု၊ မသိကျိုးကျွံမျက်ကွယ်ပြုထားမှု လုံး၀မရှိဘူးလို့ ဆိုပါတယ်။
တကယ်လို့ ထိုင်းဘက်က လူတွေ ကျူးလွန်နေတာ ဖော်ထုတ်နိုင်ခဲ့ရင်လည်း ထိုင်းအစိုးရဟာ မြန်မာနဲ့ ပူးပေါင်းပြီး စုံစမ်းဖော်ထုတ်လို့ ဥပဒေနဲ့အညီ ပြင်းပြင်းထန်ထန် အရေးယူသွားမှာ ဖြစ်ကြောင်း၊ အိမ်နီးချင်းနိုင်ငံတိုင်းနဲ့ ပိုမိုပူးပေါင်းပြီး ဒေသတွင်းက ပြည်သူ တွေ လုံခြုံရေးအတွက် ဖန်တီးပေးရာမှာ အကြံပေးမှုတွေကိုလည်း နားထောင်သွားမှာဖြစ်တယ်လို့ ထုတ်ပြန် ပြောဆိုသွားပါတယ်။
Ref: matichon
MKF-001
#MeKongNews
#ကျားဖြန့်
#စစ်ကောင်စီ
#သတင်းစာ
#မီဒီယာ
#ထိုင်း
#နယ်စပ်
