မဲခေါင်၊ ဇန်နဝါရီ ၂၀
စစ်ကောင်စီနဲ့ အမျိုးသားဒီမိုကရေစီမဟာမိတ် တပ်မတော် (MNDAA)တို့ ဇန်နဝါရီ ၁၈ ရက်က ကူမင်းမှာ အပစ်အခတ်ရပ်စဲရေး သဘောတူလက်မှတ်ရေးထိုးခဲ့ကြောင်း တရုတ်နိုင်ငံခြားရေးဝန်ကြီးဌာနက ဒီနေ့(ဇန်နဝါရီ ၂၀) ကြေညာပါတယ်။
တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာအိုနင်းက ပုံမှန် သတင်းထုတ်ပြန်မှုမှာ ထည့်သွင်းပြောကြားသွားတာဖြစ်ပြီး တရုတ်-မြန်မာ နယ်စပ်ဒေသမှာ ဒီသဘောတူညီချက်ကြောင့် အပစ်အခတ် ရပ်စဲနေကြပြီလို့ ပြောဆိုသွားတာဖြစ်ပါတယ်။
ဒီနေ့မှာပဲ “ဝ” ပြည်သွေးစည်းညီညွတ်ရေးတပ်ရဲ့ ထိန်းချုပ်နယ်မြေနဲ့ နမ့်တစ်မြို့ရှိ နမ့်တစ်တံတားဂိတ်ကို တရုတ်အာဏာပိုင်တွေရဲ့ ခွင့်ပြုချက်နဲ့ ဖွင့်ပေးလိုက်ကြောင်း UWSA က တရုတ်ဘာသာစကားနဲ့ ထုတ်ပြန်ပါတယ်။
UWSA ပြောရေးဆိုခွင့်ရှိသူညီရန်းက”နယ်စပ်ဖွင့်ပေးတာမှန်ပါတယ်၊ အဲ့လိုဖွင့်ပေးခြင်းအားဖြင့် နှစ်ဖက်မှာရှိတဲ့ပြည်သူတွေအတွက်လည်း အကျိုးရှိတာပေါ့နော့” လို့ မဲခေါင်ကိုပြောပါတယ်။
အပစ်အခတ်ရပ်စဲရေး သဘောတူညီချက်နောက်ဆက်တွဲအဖြစ် သံလွင်မြစ်အရှေ့ဖက် တရုတ် -မြန်မာနယ်စပ်အနီး ကိုးကန့်ကိုယ်ပိုင်အုပ်ချုပ်ခွင့်ရဒေသနဲ့ နယ်နမိတ်ထိစပ်နေတဲ့ ချင်းရွှေဟော နယ်စပ်ဂိတ် တရုတ်နိုင်ငံကို မနေ့ကဖွင့်ပေးလိုက်ပါတယ်။
MNDAA နဲ့ပတ်သက်ပြီး ဒီနေ့မှာ တပြိုင်အတည်းထွက်ပေါ်လာတဲ့ အတည်မပြုနိုင်တဲ့ သတင်းတစ်ခုက MNDAA ဟာ လားရှိုးကနေ အခုနှစ် ၊ ဇွန်လမှာ ပြန်လည်ဆုတ်ခွာပေးရမယ်လို့ Myanmar Now က ဖေါ်ပြပါတယ်။
တရုတ်နိုင်ငံ၊ ကူမင်းမြို့မှာ နှစ်ဖက်ကိုယ်စားလှယ်တွေ တွေ့ဆုံဆွေးနွေးပြီး ငြိမ်းချမ်းရေးကို ဆောင်ကျဉ်းပေးခဲ့တဲ့ တရုတ်အစိုးရကို စစ်ကောင်စီရော MNDAA ဘက်ကပါ ကျေးဇူးတင်ကြောင်းပြောသွားတယ်လို့ မာအိုနင်းက ပြောကြားသွားပါတယ်။
စစ်ကောင်စီနဲ့ MNDAA အစောပိုင်းတွေ့ဆုံပွဲတွေမှာ MNDAA အနေနဲ့ လားရှိုးကနေပြန်လည်ဆုတ်ခွါပေးဖို့ တောင်းဆိုခဲ့ပေမယ့် MNDAA ဘက်က ငြင်းဆိုတာကြောင့် ဆွေးနွေးပွဲပျက်ခဲ့တာလို့ သိရပါတယ်။ အခုတစ်ကြိမ်မှာ အပစ်အခတ်ရပ်စဲရေး သဘောတူညီချက် ရရှိခဲ့တာ ဖြစ်ပါတယ်။
မြောက်မြန်မာနဲ့ သက်ဆိုင်ရာ ဒေသတွင်းနိုင်ငံအားလုံးဟာ ဘုံအကျိုးစီးပွားအတွက် ဒီဒေသရဲ့ တင်းမာနေမှုတွေကို လျှော့ချပေးနိုင်ဖို့ အလိုရှိခဲ့ကြောင်း၊ တရုတ်-မြန်မာနယ်စပ်ဒေသ လုံခြုံရေး၊ တည်ငြိမ်အေးချမ်းရေးနဲ့ ဖွံ့ဖြိုးတိုးတက်ရေးကို လိုလားကြောင်း၊ တရုတ်ဟာ မြောက်မြန်မာတစ်လျှောက် ငြိမ်းချမ်းရေးဖြစ်တည်လာစေဖို့ ဆွေးနွေးအဖြေရှာရေးလမ်းစဉ်မှာ လိုအပ်တဲ့ထောက်ပံ့မှုတွေကို ဆက်လက်ပေးစွမ်းသွားမယ်လို့လည်း မာအိုနင်းက ပြောပါတယ်။
၂၀၂၄ ဇန်နဝါရီလတုန်းက တရုတ်ဟာ MNDAA နဲ့ စစ်ကောင်စီတို့ အပစ်အခတ်ရပ်စဲရေး ကြားနေငြိမ်းချမ်းရေးပွဲစားအဖြစ် ရယူပေးနိုင်ခဲ့တယ်လို့ ကြေညာခဲ့ပေမယ့် ချက်ချင်းဆိုသလို ဒီသဘောတူညီမှု ပျက်စီးသွားပြီ တိုက်ခိုက်မှုတွေ ဆက်လက်ဖြစ်တည်နေခဲ့တာ ဖြစ်ပါတယ်။
MNDAA ဟာ ညီနောင်မဟာမိတ် သုံးဖွဲ့အဖြစ် TNLA ၊ AA တို့နဲ့ မဟာမိတ်ဖွဲ့ပြီး သူတို့ပိုင်နက်နယ်မြေက စစ်ကောင်စီတပ်တွေကို ၂၀၂၃ ခုနှစ်၊ အောက်တိုဘာလနှောင်းပိုင်းမှ စတင်လို့ ထိုးစစ်ဆင်ခဲ့ရာမှာ ဇူလိုင်လမှာပဲ နယ်စပ်ဒေသကို ထိန်းချုပ်နိုင်ခဲ့ပြီး မြန်မာ့အရေးလေ့လာသုံးသပ်သူတွေက မြန်မာနိုင်ငံအလယ်ပိုင်း မန္တလေးမြို့ သွားရာလမ်းတွေကိုပါ စစ်ကောင်စီအပေါ် တော်လှန်နေတဲ့တပ်တွေနဲ့ ပူးပေါင်းတိုက်ခိုက်ရင်း စစ်ရေးအသာရရှိနေတယ်လို့ သုံးသပ်နေကြကြောင်း ရိုက်တာသတင်းက မှတ်ချက် ထည့်သွင်းဖော်ပြသွားခဲ့ပါတယ်။
#MeKongNews
#MNDAA
#စစ်ကောင်စီ
#အပစ်အခတ်ရပ်စဲ
#နယ်စပ်ဂိတ်ဖွင့်
