မဲခေါင်၊ ဇန်နဝါရီ ၁၇
မနေ့က(ဇန်နဝါရီ ၁၆) တစ်ရက်အတွင်း ကျောက်ဂူဒေသကို စစ်ကောင်စီက ဗုံး ၅၆ လုံးကြဲချခဲ့ရာ အရပ်သား သုံးဦးသေဆုံးကာ ၁၃ ဦးဒဏ်ရာရရှိခဲ့ပါတယ်။
စစ်ကောင်စီက Y12 လေယာဉ်နဲ့ နေ့လယ်၁၂ နာရီ ၃၇ မိနစ်မှ နေ့လယ် ၁ နာရီ ၂၁ မိနစ်အထိ ဗုံးသီး ၃၁ လုံး၊ ညနေ ၄ နဦရီမှာ ဗုံးသီး ၂၅ လုံး ကြဲချခဲ့တာကြောင့်အမျိုးသမီးနှစ်ဦး၊အမျိုးသားတစ်ဦး အသက်ဆုံးရှုံးခဲ့ရပြီး ကလေးတစ်ဦးအပါအဝင် ၁၃ ဦး ထိခိုက်ဒဏ်ရာရှိခဲ့တယ်လို့ ဓနုပြည်သူ့လွတ်မြောက်ရေးတပ်တော်(DPLA) ဒီနေ့ညနေထုတ်ပြန်ပါတယ်။
ထိခိုက်ဒဏ်ရာရရှိသူများကို ဓနုပြည်သူ့လွတ်မြောက်ရေးတပ်တော်(DPLA)မှ ဆေးကုသပေးလျက်ရှိတယ်လို့ထုတ်ပြန်ချက်မှာဖေါ်ပြထားပါတယ်။
ကျောက်ဂူဒေသ အရပ်သား နေထိုင်ရာ ကျေးရွာများကို စစ်ကောင်စီက လက်နက်ကြီးသာမက လေကြောင်းနဲ့ပါ ဗုံးကြဲတိုက်ခိုက်နေလျက်ရှိနေကြောင်းလည်းဖေါ်ပြပါတယ်။
ဇန်နဝါရီ ၁၄ ရက်၊ နံနက်ပိုင်းကလည်း ရပ်စောက်မြို့ဘက်မှ ကျောက်ဂူဒေသဘက်သို့ စစ်အင်အားဖြည့် တင်းဖို့ စစ်ကြောင်းထိုးလာတဲ့ စစ်ကောင်စီကို DPLA က တိုက်ခိုက်ခဲ့ရာတိုက်ပွဲ ၂ နာရီခန့်ကြာမြင့်ခဲ့ပြီး စစ်ကောင်စီက လက်နက်ကြီးနဲ့ပစ်ခတ်လို့ ဘာသာရေး အဆောက်အအုံ နှစ်လုံး၊ အရပ်သားနေအိမ် ၁၅ လုံး ဝန်းကျင် ပျက်စီးခဲ့ပါတယ်။
ဇန်နဝါရီ ၁၅ ရက်က စစ်ကောင်စီပစ်ခတ်တဲ့လက်နက်ကြီးကြောင့် အရပ်သား တစ်ဦး ထိခိုက်ဒဏ်ရာရရှိခဲ့တယ်လို့ DPLA ကထုတ်ပြန်ပါတယ်။
“တောင်ခမ်းဘက်ကိုအင်အားဖြည့်တဲ့လမ်းပိုင်းဖြစ်နေလို့ စစ်ကောင်စီက ကျောက်ဂူကိုအင်အားဖြည့်နေတာ”လို့ DPLA ပြန်ကြားရေးတာဝန်ရှိသူ ကိုအမောင်က မဲခေါင်ကိုပြောပါတယ်။
အခုနှစ် ၊ဇန်နဝါရီ ပထမအပတ်ကတည်းက ကျောက်ဂူဒေသမှာ တိုက်ပွဲတွေဆက်တိုက်ဖြစ်ပွါးနေကာ အခုဆိုရင် ရက်သတ္တပတ် နှစ်ပတ်ကျော်ကြာမြင့်နေပြီဖြစ်ပါတယ်။
ရပ်စောက်-အင်တော-ကျောက်ဂူ လမ်းပိုင်းဟာ နောင်ချိုမြို့ရဲ့တောင်ဘက် တောင်ခမ်းဒေသကို စစ်ကောင်စီ စစ်ကူပေးနေတဲ့လမ်းကြောင်းဖြစ်တာကြောင့် ကျောက်ဂူဒေသဟာစစ်ရေးအရ အရေးပါနေတာကြောင့် လေကြောင်းတိုက်ခိုက်မှုတွေ အပါအဝင် စစ်ကြောင်းထိုးတာ၊ အင်အားဖြည့်တင်းတာတွေပြုလုပ်နေတာပါ။
နောင်ချိုမြို့နယ်၊ တောင်ခမ်းကို အင်အားဖြည်တင်းမယ့် စစ်ကောင်စီ စစ်ကြောင်းကို DPLA ကဖြတ်တောက်တိုက်ခိုက်နေတာပါ။
ကျောက်ဂူဒေသမှာ စစ်ကောင်စီနဲ့တိုက်ပွဲဆက်တိုက်ဖြစ်ပွါးနေတဲ့ ဓနုပြည်သူ့လွတ်မြောက်ရေးတပ် DPLA ကို ၂၀၂၃ ဇူလိုင်လ ၂၉ ရက်မှာဖွဲ့စည်းခဲ့တာဖြစ်ပြီး ၁၀၂၇ စစ်ဆင်ရေးစတင်ကတည်း TNLA နဲ့တိုက်ပွဲဖော်ဆောင်မှုတွေမှာပါဝင်နေတာဖြစ်ပါတယ်။
ပြင်ဦးလွင်နဲ့ ၅၅ မိုင်သာကွာဝေးတဲ့ နောင်ချိုမြို့၊ တောင်ခမ်းရွာ အနီးမှာ အမြှောက်တပ် (၉၀၂)နဲ့ (၃၅၄)တည်ရှိနေပါတယ်။ တောင်ခမ်းဟာ ပြင်ဦးလွင်အတွက် အပြင်စည်းလုံခြုံရေးဖြစ်နေရုံမျှမက ရှည်းပြည်တောင်ပိုင်း နဲ့ မြောက်ပိုင်းကို ချိတ်ဆက်ပေးနိုင်လို့ စစ်ရေးအရ အရေးပါတဲ့ဒေသဖြစ်ပါတယ်။
တောင်ခမ်းကနေ လက်နက်ကြီးနဲ့ ပစ်ခတ်ရင် စစ်ကောင်စီရဲ့တပ်မြို့ဖြစ်တဲ့ စစ်တက္ကသိုလ်ရှိရာ ပြင်ဦးလွင်မြို့ကိုကျရောက်နိုင်ကြောင်း စစ်လက်နက်လေ့လာသူတွေကပြောပါတယ်။
ဒါကြောင့် စစ်ကောင်စီဟာ တောင်ခမ်းကို တော်လှန်ရေးလက်ထဲမကျရောက်စေဖို့ ရပ်စောက်၊ ကျောက်ဂူ၊ နောင်ချို လမ်းအတိုင်း အင်အားဖြည့်တင်းနေတာဖြစ်ပါတယ်။
စစ်ကောင်စီထောက်ခံသူတွေရဲ့ဖော်ပြချက်အရ ဇန်နဝါရီလ ၁၅ ရက်မနက်အစောပိုင်းကတည်းက ကျောက်ဂူဒေသတဝိုက်တိုက်ပွဲတွေဆက်တိုက်ဖြစ်ပွါးနေတာဖြစ်ပြီး ရပ်စောက်-အင်တော-ကျောက်ဂူလမ်းပိုင်းကို ရှမ်းပြည်တပ်မတော် SSPP/SSA က လုံခြုံရေးပေးထားတယ်လို့ စစ်ကောင်စီထောက်ခံသူတွေအကြားမှာပြောဆိုရေးသားဖေါ်ပြနေကြတာကြောင့် အတည်ပြုချက်ရနိုင်ဖို့ မဲခေါင်က SSPP ပြောခွင့်ရ ဗိုလ်မှူးစိုင်းဆုကို ဆက်သွယ်နေပေမဲ့ ဖုန်းကိုင်ဖြေကြားခြင်းမရှိပါဘူး။
#MeKongNews
#ကျောက်ဂူ
#ဗုံးကြဲ
#DPLA
#တောင်ခမ်း
