မဲခေါင်၊ ဒီဇင်ဘာ ၉
ဆီးရီးယားမြိုးတော် ဒမက်စကက်ကို ဒီဇင်ဘာ ၇ ရက်မှာ တော်လှန်မဟာမိတ်တပ်တွေ သိမ်းပိုက်ပြီးနောက် နိုင်ငံကို အာဏာရှင်အဖြစ် ၂၄ နှစ်ကြာ အုပ်စိုးခဲ့တဲ့ သမ္မတ အာရှာအယ်လ်အာဆတ်ဟာ မိသားစုနဲ့အတူ ဂျက်လေယာဉ်နဲ့ ထွက်ပြေးတိမ်းရှောင်သွားခဲ့ပြီး လေယာဉ်ဟာ ရေဒါမှာ ပျောက်သွားခဲ့တာကြောင့် ပစ်ချခံလိုက်ရပြီလို့ ကောလာဟလ သတင်းတွေ ထွက်ပေါ်နေခဲ့ပါတယ်။
ဒါပေမဲ့ ရုရှား နိုင်ငံခြားရေးဝန်ကြီးဌာနက အာဆတ်ဟာ မိသားစုနဲ့အတူ မော်စကိုကို ရောက်ရှိနေပြီး လူသားချင်းစာနာမှုနဲ့ သံတမန်ဆက်ဆံရေးမူဝါဒအရ ခိုလှုံခွင့်တောင်းလို့ ပေးလိုက်ပြီဖြစ်ကြောင်းနဲ့ ဆီးရီးယားအာဏာလွှဲပြောင်းမှုမှာ ငြိမ်းချမ်းစွာ လွှဲပြောင်းမှုဖြစ်စေလိုကြောင်း ပန်ကြားခဲ့တယ်လို့ ထုတ်ပြန် အတည်ပြုသွားခဲ့ပါတယ်။
ဒမက်စကက်မြို့ကို တော်လှန်ရေးတပ်တွေ သိမ်းပိုက်ပြီးနောက် ပြည်သူတွေနဲ့ ၂၄ နာရီလုံး မနားတမ်း အောင်ပွဲခံနေချိန် ဒီဇင်ဘာ ၇ ရက်နေ့က အာဆတ်နဲ့မိသားစု စီးနင်းလိုက်ပါတဲ့ လေယာဉ်ဟာ ဒမက်စကက်လေဆိပ်ကနေ ဆီးရီးယားနိုင်ငံကမ်းခြေဒေသ လွတ်မြောက်နယ်မြေဆီ ပျံသန်းနေရာက ဟွမ်းစ်မြို့ပေါ်အရောက် ဂငယ်ကွေ့ ကွေ့ပြီး ဆန့်ကျင်ဘက်အရပ်ဆီ ပျံသန်းကာ မကြာခင် ရေဒါမှာ ပျောက်သွားခဲ့တာဖြစ်လို့ ပစ်ချခံလိုက်ရကြောင်း ကောလာဟလသတင်းတွေ ထွက်ပေါ်ခဲ့တာ ဖြစ်ပါတယ်။
ဒါဟာ ရေဒီယိုအချက်ပေးစနစ်နဲ့ ရေဒါမမိအောင် ပိတ်လိုက်တာသာဖြစ်ပြီး အာဆတ်ဟာ သူ့အပေါ် အာဏာရှင်ချင်း မဟာမိတ်အဖြစ် ထောက်ခံအားပေးခဲ့သူ ပူတင် ရှိရာ မော်စကိုကိုသာ လေယာဉ်ခရီးနှင်ပြီး ရောက်ရှိခဲ့တာဖြစ်ပါတယ်။
ယူကရိန်းထောက်လှမ်းရေး အဖွဲ့က အာဆတ် လေယာဉ်နဲ့ထွက်ပြေးမှုမှာ လေယာဉ်ပျက်ကျကြောင်း သတင်းမှားတွေကို ရုရှားဘက်က လိမ်လည် ထုတ်ပြန်ပေးနေခဲ့ပြီး လေယာဉ်ပျံသန်းပြီး မိနစ် ၄၀ အကြာ ဒေသစံတော်ချိန် နံနက် ၅ နာရီ ၂၉ မိနစ်မှာပဲ ရေဒါ စနစ်ကို ဖြုတ်ချပြီးမော်စကိုကို ပျံသန်းရောက်ရှိသွားတာဖြစ်တယ်လို့ ထုတ်ပြန်သွားပါတယ်။
ယူကရိန်းထောက်လှမ်းရေးအဆိုအရ ပူတင်ဟာ ဆီးရီးယားမှာ အာဆတ်ကို ထောက်ခံကူညီဖို့ ထားရှိတဲ့ သူ့စစ်စခန်းနှစ်ခုကိုတော့ တော်လှန်ခေါင်းဆောင်ကို အာဏာပြန်သိမ်းမှုမှာ နောက်ကွယ်က ထောက်ခံမှု ပြန်ပေးခဲ့ခြင်းအတွက် ဆက်လက်အခြေစိုက်ခွင့် ရထားပြီး Tartus ရေတပ်အခြေစိုက်စခန်းက စစ်သင်္ဘောတွေကိုတော့ လက်နက်တွေ သယ်ဆောင်ပြီး ရုပ်သိမ်းပေးနေပြီဖြစ်ကြောင်းလည်း သိရှိရပါတယ်။
Ref:Thesun
MKF-001
#MeKongNews
#အာဆတ်
#ရုရှား
#ခိုလှုံခွင့်
#ထွက်ပြေး
#ဆီးရီးယား
#တော်လှန်ရေး
#ရေဒါ
