မဲခေါင်၊ ဒီဇင်ဘာ ၈ ရက်
ရှမ်းပြည်အရှေ့ပိုင်း၊ တာချီလိတ်မြို့နယ်၊ လွယ်စတုံကျေးရွာအနီးရှိ လားဟူငါးကန်ဝန်းမှာ တရုတ်နဲ့ ထိုင်းနိုင်ငံသားတွေပါဝင်တဲ့ ကျားဖြန့်ငွေလိမ်လုပ်ငန်း၊ လောင်ကစားဝိုင်းတွေအပြင် မူးယစ်ဆေးရောင်းဝယ်လုပ်ငန်းတွေကို နာတလိ ပြည်သူ့စစ်အကာအကွယ်နဲ့ ဖွင့်ထားတယ်လို့ မဲခေါင်က စုံစမ်းသိရပါတယ်။
ဒေသခံတွေနဲ့ ထိုင်းနိုင်ငံသားတွေလာရောက် လောင်းကစားလုပ်နိုင်ဖို့ ကားအကြိုအပို့ပါ ပြုလုပ်ပေးပြီး နာတလိပြည်သူ့စစ်က လုံခြုံရေးယူပေးထားတယ်လို့ သိရပါတယ်။ ဖေါ်ပြပါလုပ်ငန်းတွေ တစ်စုတစည်းတည်းလုပ်ကိုင်နေတဲ့ လားဟူငါးကန်ခြံဝန်းကြီးကို နာတလိပြည်သူ့စစ်ခေါင်းဆောင် ဦးမင်ခါပိုင်ဆိုင်တာဖြစ်ပြီး သူ့ရဲ့ ပြည်သူစစ်အဖွဲ့လုံခြုံရေးနဲ့ လုပ်ငန်းလည်ပတ်နေတာဖြစ်တယ်လို့ ဒေသခံဆီက သိရပါတယ်။
“ငါးကန်ဝန်းထဲမှာ အစုံရှိတယ်၊ KTV လည်းရှိတယ်၊ လောင်းကားဝိုင်းတွေဆိုရင် ဂုံးကင်းခုံအပါအဝင် ဖဲဝိုင်းတွေ၊ ကာစီနိုလည်းရှိတယ်၊ တရုတ်တွေလည်း တွေ့တယ်၊ ခြံက အကျယ်ကြီးပဲ ” လို့ လောင်းကစားသွားရောက်ကစားခဲ့တဲ့ ဒေသခံတစ်ဦးက ပြောပါတယ်။
ခြံဝင်းအတွင်း ဖွင့်လှစ်ထားတဲ့ လောင်းကစားဝိုင်းတွေအနေနဲ့ လောင်းကစားခုံတစ်ခုံကို လစဉ်ကြေး ဘတ်သောင်းနဲ့ချီပေးထားရပြီး လောင်းကစားဝိုင်းမျိုးစုံနဲ့ ခြံဝန်းအတွင်း မူးယစ်ဆေးဝါးပါ အလွယ်တကူရရှိနေတဲ့အပြင် ထိုင်းနိုင်ငံသားတွေကို ပစ်မှတ်ထားပြီး လိမ်လည်တဲ့ ကျားဖြန့်ငွေလိမ်တဲ့အဖွဲ့တွေ ပါဝင်တယ်လို့ စုံစမ်းသိရှိရပါတယ်။
ငါးကန်အပါအဝင် ခြံဝန်းကိုအကာအကွယ်ပေးထားတဲ့ နာတာလိ ပြည်သူ့စစ်တပ်ဖွဲ့ဟာ လွယ်တော်ခမ်းကျေးရွာအုပ်စုအတွင်း အခြေချထားတာဖြစ်ပေမယ့် ဌာနဆိုင်ရာနဲ့ ညှိနှိုင်းကာ သက်ဆိုင်ရာကို လစဉ်ကြေး ဘတ်သိန်းချီပေးပြီး လောင်းကစားရုံနဲ့ ငွေလိမ်ဂိုဏ်းကို အကာအကွယ်ပေးထားတာ ဖြစ်ပါတယ်။
ရှမ်းပြည်နယ်အရှေ့ပိုင်းမှာရှိတဲ့ တာချီလိတ်ခရိုင်ဟာ ကမ္ဘာမှာ ဒုတိယမြောက် ဘိန်းထုတ်လုပ်မှု အများဆုံးဒေသ ဖြစ်ပါတယ်။ မြန်မာ၊ ထိုင်းနဲ့ လာအို သုံးနိုင်ငံရဲ့နယ်နမိတ်ခြား မဲခေါင်မြစ်ဆုံမှာ တြိဂံပုံထိစပ်နေလို့ ရွှေတြိဂံလို့လည်းခေါ်ပြပါတယ်။ နယ်နမိတ်ခြားဖြစ်သလို မယ်ဆိုင်ချောင်းပေါ်မှာ ထိုင်း-မြန်မာချစ်ကြည်ရေးတံတားလည်းရှိနေတာဖြစ်လို့ ကူးသန်းရောင်းဝယ်ရေးအတွက် ထိုင်းနိုင်ငံသားတွေ အလွယ်တကူ ဝင်ထွက်သွားလာနိုင်တာဖြစ်ပါတယ်။
တာချီလိတ်မြို့၊ ပါဆပ်ရပ်ကွက်က နေအိမ်တစ်လုံးမှာ ဇူလိုင်လက ကျားဖြန့်(ငွေလိမ်ဂိုဏ်း)လုပ်ကိုင်နေသူ ၃၀၀ နီးပါး ဖမ်းဆီးရမိခဲ့ပြီး နိုဝင်ဘာအတွင်းကလည်း တရုတ်နိုင်ငံသားတွေပါဝင်တဲ့ ငွေလိမ်ဂိုဏ်းက လူဦးရေ ၃၀ နီးပါး ထပ်မံဖမ်းဆီးရမိခဲ့ပါတယ်။ တစ်နိုင်ငံလုံးအနှံ့ ငွေလိမ်ဂိုဏ်းသားပေါင်း ၄၉၀၀၀ ကျော် ဖမ်းဆီးရမိခဲ့ပြီးဖြစ်တယ်လို့ စစ်ကောင်စီက ထုတ်ပြန်ဖူးပါတယ်။
MK-002
#MeKongNews
#လောင်းကစားဝိုင်း
#ပြည်သူ့စစ်
#တာချီလိတ်
#ကျားဖြန့်
