မဲခေါင်၊ ဧပြီ ၁၁
ရှမ်းပြည်တောင်ပိုင်း၊ ၊ ညောင်ရွှေမြို့နယ်၊ အင်းလေးဒေသ၊ အင်းလေးရေလည်ခန်းမမှာ ကျင်းပမယ့် အင်းလေးရေပေါ်သင်္ကြန်ကို ပအိုဝ်းပြည်သူ့စစ် (PNA)က လုံခြုံရေး ယူပေးမယ်လို့ ဒေသတွင်း သတင်းအရင်းအမြစ်တွေက ပြောပါတယ်။
ဧပြီလ ၁၃ ရက်ကနေ ၁၆ ရက်နေ့အထိ ၄ ရက်တာ ကျင်းပမယ့် ရေပေါ်သင်္ကြန်ပွဲတော်အတွက် လုံခြုံရေး ယူပေးဖို့ ဧပြီ ၈ ရက်နေ့ ကတည်းက ကြိုရောက်နေပြီလို့ ဆိုပါတယ်။
ဖြတ်သွားဖြတ်လာ တွေ့ရှိသူ တစ်ဦးက “အင်းလယ်ဖိုတဲ(ရေလည်ခန်းမ) အပြည့် သေနတ်တွေနဲ့ စောင့်နေတာ။ ဒေသခံ မဟုတ်တာ သိတယ်။ အင်းသား တစ်ခွန်းမှ မပြောဘူး။ ပအိုဝ်းလိုတွေနဲ့ ပြောတာ။ ဖိုတဲနားတောင် အကပ်မခံဘူး” လို့ ပြောပါတယ်။
လတ်တလောမှာ အင်းလေးရေလည်ခန်းမ ပတ်ပတ်လည်နဲ့ ညောင်ရွှေမြို့ လှေဆိပ်ကို PNA က လုံခြုံရေး ယူထားပေးထားကာ ပွဲတော် ကျင်းပမယ့်ရက်ကစပြီး မိုင်းသောက် လမ်းဆုံကနေ တံတားအထိ၊ ဟိုတယ်ဇုန်ကနေ နန်းပန်မြို့အထိ၊ ညောင်ရွှေမြို့ကနေ အင်းတိန်ကုန်းကျေးရွာအထိ စတဲ့လမ်းပိုင်းတွေကို လက်နက်ကိုင် စောင့်ကြပ်သွားမယ်လို့ အုပ်ချုပ်ရေးမှူးနဲ့ နီးစပ်သူတွေဆီက သိရပါတယ်။
PNA တပ်တွေဟာ အင်းလေးရေပေါ် သင်္ကြန်အတွက် မိုင်းသောက်ကျေးရွာက စက်လှေအစီး ၄၀ ကျော်ကိုလည်း ချောဆွဲထားတဲ့အပြင် မလိုက်နိုင်တဲ့ စက်လှေဆရာတွေကို စက်လှေသိမ်းမယ်ဆိုပြီး ခြိမ်းခြောက်ထားတယ်လို့ ဆိုပါတယ်။
လက်ရှိ လုံခြုံရေးယူထားတဲ့အထဲမှာ PNA တင်မကပဲ ဒေသတွင်း ပျူစောထီးတွေလည်း ပါတယ်လို့ ပွဲစီစဉ်သူတွေနဲ့ နီးစပ်သူတစ်ဦးက ပြောပါတယ်။
“အင်းပေါခုံရွာ ပျူစောထီးခေါင်းဆောင် ဖိုးသာထူး တပည့်တွေပါတယ်။ သလဲဦးရွာ မျိုးဝင်းစိန်ရဲ့သား ချစ်ကိုလည်း ပါတယ်။ ပျူ ၁၀ ယောက်ကျော်တယ်”
အင်းလေးရေပေါ်သင်္ကြန် လုံခြုံရေးတာဝန်ချထားရမှာ PNA တပ်တွေကို ဦးဆောင်ဖို့အတွက် ညောင်ရွှေမြို့ နယ်မြေရဲစခန်းက နယ်ထိန်း ဦးဆန်းမင်းကို တာဝန်ပေးထားတယ်လို့ ချောဆွဲခံရတဲ့ စက်လှေဆရာနဲ့ နီးစပ်သူတွေဆီက သိရပါတယ်။
MK-014
