မဲခေါင်၊ မေ ၂
ရှမ်းပြည်နယ် မြောက်ပိုင်း၊ နမ့်ဆန်မြို့နယ်၊ နမ့်လင်းကျေးရွာအုပ်စု၊ နမ့်လင်ကျေးရွာမှာ ဧပြီလ ၃၀ ရက်က မိုးသီးကြွေကျလို့ လက်ဖက်ခင်းတွေ ထိခိုက်ပျက်စီးခဲ့တယ်လို့ လက်ဖက် လုပ်ငန်းရှင် တစ်ဦးက မဲခေါင်သတင်းဌာနကို ပြောပါတယ်။
ပွင့်လင်းရာသီ ဈေးကောင်းရတဲ့ လက်ဖက်ခူးချိန်မှာ အခုလို မိုးသီးကြွေလို့ လက်ဖက်ခင်းတွေ ပျက်စီးခဲ့တာကြောင့် လက်ဖက်စိုက် တောင်သူတွေ နစ်နာရတယ်လို့ ဒေသခံ တစ်ဦးက ပြောပါတယ်။
“အခုက လက်ဖက်ထွက်ချိန်လေ။ အနုလေးတွေ ထွက်နေပြီ။ အခုလို မိုးသီးရွာတော့ လက်ဖက် အရွက်တွေမှာ အပေါက်တွေဖြစ်ပြီး အရိုးတံတွေပါ ပျက်စီးတာမျိုးရှိတယ်။ အဓိက ကတော့ အထွက်လျော့သွားတာပေါ့။ နောက်ထပ် လက်ဖက်ပြန်ခူးဖို့ကတော့ ၂ ပတ်လောက် ပြန်စောင့်ရတော့မှာပေါ့” လို့ သူကပြောပါတယ်။
အခုရက်ပိုင်း ရှမ်းပြည်နယ် နေရာအနှံ့ မကြာခဏ မိုးသီးကြွေကျတာတွေ ဖြစ်နေလို့ လက်ဖက်ခင်းတွေ ထိခိုက်ပျက်စီးရသလို လူနေအိမ် အမိုး ပျက်စီးတာတွေလည်း ရှိနေတယ်လို့ ရှမ်းမြောက် ဒေသခံ တစ်ဦးက ပြောပါတယ်။
MK-007
#MeKongNews
#နမ့်ဆန်မြို့နယ်
#လက်ဖက်
#မိုးသီး
