မဲခေါင်၊ ဩဂုတ် ၂၅
နယ်စပ် ကုန်သွယ်ရေး အတွက် အရေးပါတဲ့ ကရင်ပြည်နယ်၊ မြဝတီ-ကော့ကရိတ် အာရှလမ်းသစ် ပြန်ဖွင့်ထားပြီး ယာဉ်ကြီးနဲ့ ယာဉ်ငယ်တွေ ဖြတ်သန်းသွားလာနိုင်ပြီလို့ ဒေသခံ တစ်ဦးက မဲခေါင်သတင်းဌာနကို ပြောပါတယ်။
ပြီးခဲ့တဲ့ သီတင်းပတ်က မြေပြိုမှုကြောင့် လမ်းပျက်စီးလို့ ပိတ်ထားခဲ့ရာက ဒီကနေ့ ဩဂုတ် ၂၅ ရက်မှာ အာရှလမ်းသစ် ပြန်အသုံးပြုနိုင်မှာ ဖြစ်ပြီး ခုမနက်ပိုင်းမှာ တံတား အတက်အဆင်း နေရာတွေ ပြုပြင်နေတဲ့ အတွက် ခေတ္တ လမ်းပိတ်ထားတယ်လို့ ယာဥ်မောင်း တစ်ဦးက ပြောပါတယ်။
“ မနက်ပိုင်းတုန်း ကတော့ ခဏပေးဖြတ်လိုက်တာ ရှိတယ်။ ကျွန်တော် ၉ နာရီခွဲကျော်လောက်က ရောက်တာ့ ခဏ လမ်းပိတ်ထားတယ်။ မိုးကလည်း ရွာထားတော့ တံတား အတက်အဆင်းမှာ အဆင်ပြေအောင် လမ်းတွေ ခင်းနေတယ်။ နေ့လယ်လောက် ဆိုရင်တော့ အရင်လို ပြန်ဖြတ်လို့ရပြီ” လို့ သူကပြောပါတယ်။
ပြီးခဲ့တဲ့ ဩဂုတ် ၇ ရက်က မြဝတီ-ကော့ကရိတ် အာရှလမ်းပိုင်း၊ တောနော်ရေတံခွန်အနီး မြေပြိုကျပြီး လမ်းပြိုကျ ပျက်စီးခဲ့ရာ လက်ရှိ ဘေလီတံတားထိုးပြီးဖြစ်လို့ ဒီကနေ့မှ စတင်ကာ ယာဉ်ကြီး ယာဉ်ငယ်တွေ ဖြတ်သန်းသွားလာနိုင်မှာ ဖြစ်ပါတယ်။
လက်ရှိ တည်ဆောက်ထားတဲ့ ဘေလီတံတား ခံနိုင်ဝန်ဟာ ၅၅ တန်ရှိလို့ တွဲကားများ ဖြတ်သန်း သွားလာနိုင်တယ်လို့ ဒေသခံတွေက ပြောပါတယ်။
MK-005
#MeKongNews
#မြဝတီ_ကော့ကရိတ်
#အာရှလမ်း
#ဘေလီတံတား
