မဲခေါင်၊ အောက်တိုဘာ ၂၇
ရှမ်းပြည်နယ်၊ တောင်ကြီးမြို့ တန်ဆောင်တိုင်ပွဲတော်ကို စစ်ကောင်စီက သိန်း ၁၀,၀၀၀ အကုန်ကျခံ ကျင်းပမှာဖြစ်ပြီး လတ်တလောမှာ အကြီးစားပြင်ဆင်မှုတွေ ပြုလုပ်နေတယ်လို့ နီးစပ်တဲ့ ဌာနဆိုင်ရာ ဝန်ထမ်းတွေက ပြောပါတယ်။
ပွဲတော်ကို ခမ်းခမ်းနားနား ကျင်းပနိုင်ဖို့အတွက် ဩဂုတ်လ နောက်ဆုံးအပတ်ကတည်းက ပွဲကြည့်စင် အသစ်တွေ တိုးချဲ့ဆောက်လုပ်နေပြီး ဒီတစ်ပတ်ထဲမှာတော့ အဝေရာမီးပုံးပျံကွင်း တစ်ကွင်းလုံးကို အစအဆုံး ပြင်ဆင်လာတာလို့ ဆိုပါတယ်။
ယမ်းဆရာ တစ်ဦးက “ကျနော်တို့ကို လာခေါ်တယ်။ ကျနော်တို့ကလည်း ဒီနှစ် ဘတ်ဂျက် မရှိဘူးပြောတော့ သူတို့(စစ်ကောင်စီ)က ထုတ်ပေးမယ်ပေါ့။ စိန်နားပန်ဆိုရင် သိန်း ၄၀ ရမယ်။ ညမီးကြီးဆိုရင် သိန်း ၈၀ ကနေ ၁၀၀ အထိ ပေးမယ်ပေါ့။ လိုတာတော့ အိတ်စိုက်သဘော။ မပါလို့လည်း မရဘူး။ မပါရင် နောက်ပွဲတော်တွေလည်း မပါရတော့ဘူး။ သူတို့က ရာသက်ပန် ဘန်းလိုက်မှာ” လို့ ပြောပါတယ်။
ဒါ့အပြင် တောင်ကြီးမြို့ ရပ်ကွက်တစ်ခုကို မီးပုံးပျံတစ်လုံး လုပ်ကြဖို့အတွက် ငွေကျပ် ၁၈ သိန်း ချပေးထားပြီး လိုအပ်လာတဲ့ ငွေကြေးတွေကိုတော့ ရပ်ကွက်ဘက်က စိုက်ထုတ်ရမယ်လို့ သူက ဆက်ပြောပြပါတယ်။
၂၀၂၀ ခုနှစ်ကစပြီး COVID-19 ကပ်ရောဂါဘေးနဲ့ စစ်အာဏာသိမ်းမှု ဖြစ်စဉ်တွေကြောင့် ရပ်ဆိုင်းခဲ့ရတဲ့ တန်ဆောင်တိုင်ပွဲတော်ကို စစ်ကောင်စီက လာမယ့် နိုဝင်ဘာလ ၂၁ ရက်ကနေ ၂၇ ရက်နေ့အထိ တစ်ပတ်ကြာကျင်းပသွားမှာ ဖြစ်ပြီး ပွဲတော်အတွင်း ယတြာချေဖို့ မီးပုံးပျံ ၆၃ လုံးတိတိ အပိုအလိုမရှိ လွှတ်တင်သွားမယ်လို့ သိရပါတယ်။
ဒါ့အပြင် အရင် ၂၀၁၉ ခုနှစ်ကလိုမျိုး မသိုးသင်္ကန်း ကပ်လှူပူဇော်ပွဲနဲ့ မြို့လုံးကျွတ် ဘုံကထိန် လှည့်လည်ပွဲတွေကိုလည်း ထည့်သွင်းသွားမယ်လို့ ဆိုပါတယ်။
မီးပုံးပျံအဖွဲ့နဲ့ နီးစပ်သူ တစ်ဦးက “ယမ်းဆရာတွေကလည်း မပါချင်ပါဘူး။ ယမ်းဝယ်ဖို့ သူတို့ ခွင့်ပြုချက်ယူရမယ်၊ သူတို့ ချပေးသလောက်ပဲ ဝယ်ရမယ်ဆိုတော့ အဆင်မပြေဘူးလေ။ လွတ်လွတ်လပ်လပ်လည်း မရှိဘူး။ ဒါပေမယ့် သူတို့ကို ဖိအားပေးတာတွေ ရှိတယ်။ ပွဲကတော့ လူပြည့်မှာပါ။ မလုပ်ရတာ ကြာပြီဆိုတော့လေ။ အင်းလေးပွဲဆိုလည်း လူပြည့်တာပဲ။ ဒါပေမယ့် စစ်ကောင်စီဦးဆောင်တဲ့ ပွဲကို မသွားကြဖို့ ပြောချင်တယ်” လို့ ပြောပါတယ်။
စစ်ကောင်စီဘက်က ပွဲကျင်းပဖို့အတွက် အလောတကြီး စီစဉ်နေပေမယ့် အောက်တိုဘာလ တတိယအပတ်အတွင်း အဝေရာမီးပုံးပျံကွင်း တစ်နေရာမှာ ချိန်ကိုက်ဗုံး တစ်လုံး တွေ့ရှိခဲ့တာကြောင့် လုံခြုံရေးအတွက် စိုးရိမ်ပြီး တချို့မြို့ခံတွေက ပါဝင်မှာ မဟုတ်ဘူးလို့ ပြောပါတယ်။
မနှစ် နိုဝင်လာလ ၇ ရက်နေ့ (တန်ဆောင်မုန်းလပြည့်)ကလည်း စစ်ကောင်စီက စူဠာမုနိဘုရားရင်ပြင်မှာ စိန်နားပန်မီးပုံးပျံ တစ်လုံး လွှတ်တင်ခဲ့ပြီး မသိုးသင်္ကန်း ကပ်လှူပူဇော်ပွဲနဲ့အတူ တန်ဆောင်တိုင်ပွဲတော်အဖြစ် တစ်ရက်တာ အကျဉ်းကျုံး ကျင်းပခဲ့ပါသေးတယ်။
CJ-007
#MeKongNews
#တောင်ကြီး
#တန်ဆောင်တိုင်
#အဝေရာ
#မီးပုံး
#ယတြာ
