မဲခေါင်၊ မေ ၂၁

တာချီလိတ်မြို့က လူကုန်တားရဲတပ်ဖွဲ့ဝင်ဟောင်း တစ်ဦးဖြစ်သူ ဗိုလ်လုံမြင့်ထွေးကို တာချီလိတ်ခရိုင်တရားရုံးက မူးယစ်ဆေးဝါးအမှုနဲ့ ထောင်ဒဏ် ၁၁နှစ် ချမှတ်လိုက်တယ်လို့ စုံစမ်းသိရပါတယ်။

ဗိုလ်လုံမြင့်ထွေးကို မေလ ၁၈ရက်က အမိန့်ချမှတ်ခဲ့တာဖြစ်ပြီး မူးယစ်ဆေးဝါးနဲ့ ဆက်စပ်တဲ့အမှုတွေအတွက် ထောင်ဒဏ် ၁၁နှစ် ချလိုက်တာဖြစ်ကာ နောက်ထပ်အမှုတွေလည်း ကျန်နိုင်သေးတယ်လို့ သတင်းရင်းမြစ်တစ်ဦးက မဲခေါင်ကို ပြောပါတတယ်။

“အခုချလိုက်တာက မူးယစ်ဆေးအမှုတွေအတွက်ပေါ့။ သူ့ဆိုင် Music Zone အဆောက်အဦနဲ့ပတ်သက်ပြီးတော့ စသုံးလုံးက ထပ်စွဲဦးမယ်” လို့ သူက ပြောပါတယ်။

၂၀၂၂ ခုနှစ် ဒီဇင်ဘာလ ၁ရက် ညပိုင်းက တာချီလိတ်မြို့က ကေတီဗီတစ်ခုမှာ ဗိုလ်လုံမြင့်ထွေးဆိုသူကို ဖမ်းဆီးလိုက်တာဖြစ်ပြီး သူဖွင့်ထားတဲ့ Music Zone KTV ကိုလည်း ဝင်ရောက်စီးနင်းရှာဖွေခဲ့တာဖြစ်ပါတယ်။ အဲဒီကေတီဗီမှာ ဝန်ထမ်းတစ်ချို့လည်း ဖမ်းဆီးခံရပြီး ဒေသအခေါ် ‘ခေး’လို့ ခေါ်တဲ့ မူးယစ်ဆေးတွေလည်း ဖမ်းဆီးရမိခဲ့ပါတယ်။

ဗိုလ်လုံမြင့်ထွေးဟာ တာချီလိတ်မြို့လောင်းကစားရုံဖွင့်လှစ်တာ၊ မူးယစ်ဆေးဝါးဖြန့်ဖြူးတာတွေနဲ့ ပတ်သက်ပြီး နာမည်ဆိုးထွက်နေသူတစ်ဦးလည်း ဖြစ်ပါတယ်။

MK – 004

#MeKongNews

#တာချီလိတ်

#ဗိုလ်လုံမြင့်ထွေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)