မဲခေါင်၊ ဧပြီ ၁၆
တာချီလိတ်မြို့ သင်္ကြန်ရေကစားမဏ္ဍပ်တချို့မှာ ရေကစားနေတဲ့ အမျိုးသားတွေဟာ မူးယစ်ရမ်းကားပြီး လမ်းသွားလမ်းလာအမျိုးသမီးတွေကို ကာအိန္ဒြေပျက်ပြားအောင် ထိပါးနှောက်ယှက်မှုတွေရှိတယ်လို့ တာချီလိတ်မြို့ခံတွေက မဲခေါင်သတင်းဌာနကို ပြောပါတယ်။
ဧပြီလ ၁၅ရက် ညပိုင်းက J My King ဟိုတယ်ရှေ့က ရေကစားမဏ္ဍပ်မှာ ရေကစားနေတဲ့အမျိုးသားတွေက လမ်းသွားလမ်းလာအမျိုးသမီးတစ်ဦးကို ကာအိန္ဒြေပျက်အောင် ထိပါးနှောက်ယှက်တဲ့ သတင်းဖော်ပြပြီးနောက် တာချီလိတ်မြို့ရဲ့ တခြားနေရာတွေမှာ ကြုံတွေရသူတွေကပါ မဲခေါင်သတင်းဌာနကို ဆက်သွယ်ပြောဆိုလာတာ ဖြစ်ပါတယ်။
ဧပြီလ ၁၄ရက် ညပိုင်းကလည်း တာချီလိတ်မြို့၊ ဗိုလ်ချုပ်လမ်းပေါ်က ဒေသအခေါ် ကျွန်းတောလို့ ခေါ်တဲ့နေရာမှာ ရေကစားနေသူတွေထဲက တစ်ယောက်က လမ်းသွားလမ်းလာမိန်းကလေးတွေကို ရေလောင်းတာအပြင် တင်ပါးကိုရိုက်တာ၊ ကာအိန္ဒြေပျက်အောင် ထိပါးနှောက်ယှက်တာတွေ ပြုလုပ်ခဲ့တယ်လို့ မျက်မြင်တွေ့သူတစ်ဦးက ပြောပါတယ်။
“ကျွန်းတောအရှေ့ကအုပ်စုကောပဲ။ မိန်းကလေးတွေက ဆင်းပြောတော့ ရန်ပြန်ဖြစ်သေးတယ်။ အနောက်ကပါလာတဲ့လူတွေလဲအကုန်မြင်တယ်၊ လုပ်တာကို။ မလုပ်ဘူးဆိုပြီးငြင်းပြီးအုပ်စုလိုက် ပြန်ရန်ရှာပါတယ်” လို့ သူက ပြောပါတယ်။
ဒါ့အပြင် ပုန်းထွန်ဘက်က ရေကစားတဲ့ နေရာတွေမှာလည်း မူးယစ်ရမ်းကားပြီး လမ်းသွားလမ်းလာ မိန်းကလေးတွေကို ထိပါးနှောက်ယှက်တာတွေရှိတယ်လို့ ကိုယ်တွေ့ကြုံရသူတွေက ပြောပါတယ်။
တာချီလိတ်မြို့မှာ သင်္ကြန်ရေကစားတာကို ဧပြီလ ၁၀ရက်ကတည်းက စတင်ကစားတာဖြစ်ပြီး ညဘက် ၉နာရီအထိကစားကြလို့ မြို့နေပြည်သူတွေ စိတ်အနှောက်အယှက်ဖြစ်ရတဲ့ ဖြစ်စဉ်တွေလည်း ရှိနေပါတယ်။
ပုံအညွှန်း – တာချီလိတ် ကျွန်းတောရှေ့တွင် အမျိုးသမီးများအား ထိပါးနှောက်ယှက်သူ
MK – 004
#MeKongNews
